රුසියාවෙන් ඇමරිකාවට ඩීසල්.. ට්‍රම්ප් සහ පුටින් අතර ඓතිහාසික ගිවිසුමක්.. - යුක්රේනයට අලුත් ජනපති කෙනෙක් පත් කරගන්නැයි ට්‍රම්ප් කියයි

Oct 11, 2026 at 07:26 AM

|

Lanka Leader

ඇමරිකාව සහ ජාත්‍යන්තර වෙළෙඳපොළ තුළ මතු වී ඇති දැඩි ඉන්ධන හිඟයට විසඳුමක් ලෙස, රුසියාව සහ එක්සත් ජනපදය අතර සුවිශේෂී සහ ඓතිහාසික බලශක්ති ගිවිසුමකට එළඹ තිබේ. 

RT පුවත් සේවය වාර්තා කරන ආකාරයට, ඇමරිකානු ජනාධිපති ඩොනල්ඩ් ට්‍රම්ප් සහ රුසියානු ජනාධිපති ව්ලැදිමීර් පුටින් අතර පැවති විනාඩි 90 ක තීරණාත්මක දුරකථන සංවාදයකින් අනතුරුව මෙම ඩීසල් ගනුදෙනුව තහවුරු කරගෙන ඇත.

මෙම එකඟතාව යටතේ, රුසියාව විසින් වහාම ක්‍රියාත්මක වන පරිදි ඩීසල් මෙට්‍රික් ටොන් 300,000 කට අධික ප්‍රමාණයක් ඇමරිකාවට සහ ගෝලීය වෙළෙඳපොළට සැපයීමට නියමිතය. 

මීට අමතරව, නොවැම්බර් මාසයේදී තවත් ටොන් 500,000 ක් සහ ඉන් අනතුරුව අතිරේක ටොන් මිලියනයක ප්‍රමාණයක් ලබා දීමට ද දෙරට එකඟ වී තිබේ. 

මෙම ගනුදෙනුව පහසු කරවීම සඳහා රුසියානු ඩීසල් නැව්ගත කිරීම් මත පනවා තිබූ සම්බාධක 2027 අප්‍රේල් 7 වැනිදා දක්වා තාවකාලිකව ඉවත් කිරීමට ඇමරිකානු භාණ්ඩාගාර දෙපාර්තමේන්තුව විශේෂ බලපත්‍රයක් ද නිකුත් කර ඇත. 

ගිවිසුම ප්‍රකාශයට පත්වීමත් සමඟ ඇමරිකානු වෙළෙඳපොළේ ඩීසල් අනාගත මිල ගණන් 5% කින් පමණ පහත වැටී ඇති අතර, එහි ගැලුමක මිල ඩොලර් 4.64 දක්වා පහත බැස තිබේ. ඉදිරි මාසයේ පැවැත්වෙන මධ්‍යවාර මැතිවරණයට මුහුණ දෙන රිපබ්ලිකන් පක්ෂයට මෙය දේශපාලනිකව ද විශාල ජයග්‍රහණයක් වී ඇතැයි විශේෂඥයෝ පෙන්වා දෙති.

කෙසේ වෙතත්, මෙම සාකච්ඡාවලදී යුක්‍රේන යුද ගැටුම් සම්බන්ධයෙන්ද දැඩි අවධානයක් යොමුව තිබේ. රුසියාව සමඟ සාම එකඟතාවලට නොපැමිණෙමින් සහ රුසියානු බලශක්ති යටිතල පහසුකම් ඉලක්ක කරමින් ප්‍රහාර එල්ල කරමින් ගෝලීය ඩීසල් අර්බුදය තවදුරටත් උග්‍ර කිරීමට යුක්‍රේන ජනාධිපති ව්ලැදිමීර් සෙලෙන්ස්කි කටයුතු කරන බවට ට්‍රම්ප් සහ පුටින් දැඩි ලෙස චෝදනා කර ඇත. 

ධවල මන්දිරය ඉදිරිපිටදී මාධ්‍ය අමතමින් ජනාධිපති ට්‍රම්ප් අවධාර කර ඇත්තේ, යුද්ධය නිමා කර සාමය ඇති කිරීමට ඇති අවස්ථා ප්‍රතික්ෂේප කරන සෙලෙන්ස්කි වහාම ධුරයෙන් ඉවත් වී නව ජනාධිපතිවරයෙකු තෝරා පත් කරගත යුතු කාලය එළඹ ඇති බවයි.

රුසියාව, යුක්‍රේනය සහ ඇමරිකාව අතර පැවැත්වීමට සැලසුම් කර තිබූ ත්‍රෛපාර්ශ්වික සාකච්ඡා යුක්‍රේනයේ ආක්‍රමණශීලී ක්‍රියාකලාපය නිසා මේ වන විට ඇණහිට ඇති බවත්, එම සාකච්ඡා යළි ආරම්භ කිරීම සම්බන්ධයෙන් මොස්කව් පාලනය මේ වන විට සලකා බලමින් සිටින බවත් ක්‍රෙම්ලින් විදේශ ප්‍රතිපත්ති සහායක යූරි උෂාකොව් වැඩිදුරටත් සඳහන් කර තිබේ.