මාලිමා ආණ්ඩුව බටහිර "ප්‍රොක්සි" ආණ්ඩුවක්.. - ඥානසාර හිමි සිද්ධිය සහ රටේ වත්මන් තත්ත්වය ගැන වෛද්‍ය වසන්ත බණ්ඩාරගෙන් විශේෂ හෙළිදරව්වක්..

Oct 10, 2026 at 03:07 PM

|

Lanka Leader

පූජ්‍ය ගලබඩඅත්තේ ඥානසාර හිමියන් අධිකරණ කටයුතු සඳහා ඉදිරිපත් කිරීමේදී උන්වහන්සේගේ සිවුර ඉවත් කර වෙනත් ඇඳුමකින් සැරසවීම බන්ධනාගාර නීති හා ස්ථාවර නියෝගවලට සම්පූර්ණයෙන්ම පටහැනි බව දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර මහතා ප්‍රකාශ කරයි. 

හිරු බලය වැඩසටහනට එකතු වෙමින් ඒ මහතා පෙන්වා දුන්නේ, බන්ධනාගාර නියෝගවලට අනුව සිරකරුවෙකු උසාවියට ඉදිරිපත් කිරීමේදී ඔහු පෙර ඇඳීමට පුරුදු වූ ඇඳුම (භික්ෂූන් වහන්සේ නමක් නම් චීවරය) ලබා දිය යුතු අතර, ඒ සඳහා කිසිදු නීති සංශෝධනයක් අවශ්‍ය නොවන බවයි. මහනායක හිමිවරුන් ද මේ සම්බන්ධයෙන් ජනාධිපතිවරයාට සහ අදාළ අංශ වෙත ලිඛිතව දන්වා ඇති බවත් ඒ මහතා සඳහන් කළේය.

වර්තමාන රජය විවිධ බලවේගවල උවමනා එපාකම් ඉටු කරන "නියෝජිත ආණ්ඩුවක්" (Proxy Government) ලෙස ක්‍රියාත්මක වන බව පෙන්වා දුන් වෛද්‍ය වසන්ත බණ්ඩාර මහතා, ඉන්දියාව ඇතුළු රටවල් සමඟ අත්සන් කර ඇති ආරක්ෂක සහ වෙළඳ ගිවිසුම් හරහා රට බරපතල අර්බුදයකට හා "දාස රාජ්‍යයක්" වැනි තත්ත්වයකට පත්වෙමින් තිබෙන බවට චෝදනා කළේය.

විශේෂයෙන්ම ඉන්දියාව සමඟ අත්සන් කර ඇති සහ අත්සන් කිරීමට නියමිත ගිවිසුම් හරහා මෙරට ආරක්ෂක ක්ෂේත්‍රයට, ඛනිජ සම්පත්වලට සහ පුරවැසියන්ට එල්ල විය හැකි බලපෑම් පිළිබඳව ඔහු මෙහිදී දීර්ඝ වශයෙන් අනාවරණය කළේය.

අනුරාධපුර පූජා භූමිය ඇතුළු ඓතිහාසික ස්ථානවල උරුමයට හානි වන අයුරින් සහ පුරාවස්තු ආඥා පනත සංශෝධනය කරමින් ජාතික උරුමයන්ට බලපෑම් ඇති කිරීමට උත්සාහ දරන බවද හෙතෙම පෙන්වා දුන්නේය. බෞද්ධ සංස්කෘතිය හා මහා සංඝරත්නයේ බලය බිඳවැට්ටවීමේ ක්‍රමානුකූල සැලසුම් මේ පිටුපස ක්‍රියාත්මක වන බවත් ඒ මහතා වැඩිදුරටත් කියා සිටියේය.

සවිස්තරාත්මක වීඩියෝව නරඹන්න..