ඥානසාර හිමියන් වෙනුවෙන් දළදා මාලිගාව අභියස අද අධිෂ්ඨාන සත්‍යක්‍රියාවක්..

Oct 10, 2026 at 07:29 AM

|

Lanka Leader

පූජ්‍ය ගලගොඩඅත්තේ ඥානසාර හිමියන්ගේ නිදහස සහ සිවුර ආරක්ෂා කරගැනීම වෙනුවෙන් වන අරගලයේ පළමු පියවර අද (10) මහනුවර ශ්‍රී දළදා මාලිගාවේ මහ මළුවෙන් ආරම්භ කරන බව පූජ්‍ය උලපනේ සුමංගල හිමියන් පවසති. 

ඒ අනුව, දළදා මාලිගාව ඉදිරිපිට විශේෂ අධිෂ්ඨාන සත්‍යක්‍රියාවක් සිදු කිරීමට නියමිතය.

මේ අතර, ඥානසාර හිමියන් යළි අධිකරණයට ඉදිරිපත් කිරීමට පෙර උන්වහන්සේ අයත් කෝට්ටේ ශ්‍රී කල්‍යාණී සාමග්‍රී ධර්ම මහා සංඝ සභාව සමඟ සාකච්ඡාවකට එක්වන ලෙස ඉල්ලා, එම සංඝ සභාවේ අනුනායක මහාචාර්ය පූජ්‍ය කොටපිටියේ රාහුල නාහිමියන් ජනාධිපති අනුර කුමාර දිසානායක වෙත ලිපියක් යොමු කර තිබේ.

ඥානසාර හිමියන් තම සංඝ සභාවේ භික්ෂුවක් බැවින්, උන්වහන්සේගේ චීවරය සම්බන්ධයෙන් තීරණ ගැනීමේ බලය ඇත්තේ ද තම සංඝ සභාවට බව උන්වහන්සේ පෙන්වා දී ඇත. එබැවින්, අදාළ අමාත්‍යවරුන් සහ බෞද්ධ කටයුතු කොමසාරිස්වරයාද සමඟ කෝට්ටේ රාජමහා විහාරයට පැමිණ සාකච්ඡා කරන ලෙස එම ලිපියෙන් ඉල්ලා තිබේ.

තවද, ඥානසාර හිමියන්ගේ සිවුර ඉවත් කිරීමට ගෙන ඇති තීරණය බලරහිත කරන ලෙස ඉල්ලා පූජ්‍ය තීනියාවල පාලිත හිමියන් විසින් අභියාචනාධිකරණයට රිට් පෙත්සමක් ද ඉදිරිපත් කර ඇත.

මේ සම්බන්ධයෙන් ත්‍රෛනිකායික මහානාහිමිවරුන්ගේ නියෝජිතයන් සහ ජනාධිපතිවරයා අතර පැවති සාකච්ඡාවකදී, වසර 3කට වැඩි කාලයකට සිරගත කෙරෙන භික්ෂූන් වහන්සේලා සම්බන්ධයෙන් අදාළ නිකායේ නිර්දේශ මත පමණක් ක්‍රියාත්මක වන පරිදි නව රෙගුලාසි මාලාවක් සකස් කිරීමට එකඟ වී ඇති අතර, සති දෙකක් ඇතුළත එය සකස් කර අවසන් කරන ලෙස ජනාධිපතිවරයා අධිකරණ අමාත්‍යවරයාට උපදෙස් දී තිබේ.