සමාගම්වලට කැමති මිලකට ඉන්ධන විකුණන්න පුළුවන්- ඛනිජ තෙල් නීතිගත සංස්ථාවේ සභාපති ඩී.ජේ. රාජකරුණා

Oct 7, 2026 at 11:50 AM

|

Lanka Leader

ලංකා ඛනිජ තෙල් නීතිගත සංස්ථාවේ සභාපති ඩී.ජේ. රාජකරුණා මහතා, පෞද්ගලික ඉන්ධන සමාගම්වලට සිය අභිමතය පරිදි ඕනෑම මිලකට ඉන්ධන අලෙවි කිරීමට කිසිදු බාධාවක් නොමැති බව පැවසීය. එළැඹෙන මාස තුනක කාලය තුළ ලෝක වෙළෙඳපොළේ දැවැන්ත පෙරළියක් සිදු නොවන්නේ නම්, සිපෙට්කෝ සමාගම නිකුත් කරන ඉන්ධන මිල ඉහළ දැමීමේ සූදානමක් නොමැති බව ද ඒ මහතා අවධාරණය කළේය. පෞද්ගලික ඉන්ධන සමාගම් මුහුණ දී ඇතැයි පැවසෙන පාඩුව සහ අර්බුදය සම්බන්ධයෙන් මාධ්‍ය වෙත අදහස් දක්වමින් සභාපතිවරයා පවසා සිටියේ, යම් හෙයකින් රජය නියම කරන මිලකට ඉන්ධන අලෙවි කිරීමට සිදුවීමෙන් එම සමාගම්වලට අලාභයක් සිදුවුවහොත්, එම පාඩුව රජය විසින් පියවිය යුතු බවට ගිවිසුම්ගත කොන්දේසියක් පවතින බවයි.

කෙසේ වෙතත්, කිසියම් නිශ්චිත මිලකට ඉන්ධන අලෙවි කරන ලෙස රජය මෙතෙක් එම සමාගම් වෙත ලිඛිතව කිසිදු නියෝගයක් නිකුත් කර නොමැති බව ඔහු අවධාරණය කළේය.

එම සමාගම් දැනට සිදු කරන්නේ ඛනිජ තෙල් නීතිගත සංස්ථාවේ මිල ගණන් ස්වේච්ඡාවෙන්ම අනුගමනය කිරීම පමණක් බවත්, එබැවින් පාඩු ලබන්නේ නම් තමන්ට කැමති මිලක් නියම කර ඉන්ධන අලෙවි කිරීමට එම සමාගම්වලට පූර්ණ නිදහස පවතින බව සභාපතිවරයා පෙන්වා දුන්නේය.

වෙළෙඳපොළේ කුමන අර්බුදයක් නිර්මාණය වුව ද ඒ සියල්ලට මුහුණ දී ජනතාවට බරක් නොවී සේවය සැපයීමේ හැකියාව ලංකා ඛනිජ තෙල් නීතිගත සංස්ථාව සතුව පවතින බව සභාපතිවරයා අවධාරණය කළේය.

"මම ඉතා වගකීමෙන් යුතුව ප්‍රකාශ කරන්නේ නම් මෙම මාසය අවසන් වන තෙක් හෝ බොහෝ දුරට ඉදිරි මාස තුනක කාලය තුළ ඉන්ධන මිල ඉහළ දැමීමට සංස්ථාව කිසිදු යෝජනාවක් ඉදිරිපත් නොකරන බවයි" යනුවෙන් ඔහු පැවසීය.

වැඩිදුරටත් අදහස් දක්වමින් "මෙරට පවතින ඉන්ධන සංචිත පිළිබඳව අනියත බියක් ඇති කරගත යුතු නැහැ. සංචිත සම්බන්ධයෙන් කිසිදු ගැටලුවක් නොමැතිව ඉදිරි කාලය සාර්ථකව කළමනාකරණය කර ගැනීමට පියවර ගෙන තිබෙනවා" යනුවෙන් සභාපති ඩී.ජේ. රාජකරුණා මහතා වැඩිදුරටත් අවධාරණය කළේය.