ඥානසාර හිමි රිමාන්ඩ්..

Oct 4, 2026 at 05:14 PM

|

Lanka Leader

වරෙන්තු නිකුත් කර තිබියදී අත්අඩංගුවට ගන්නා ලද බොදුබල සේනා සංවිධානයේ ලේකම් පූජ්‍ය ගලගොඩඅත්තේ ඥානසාර හිමි හෙට (4) දක්වා රිමාන්ඩ් භාරයේ තබන ලෙස කොළඹ මහේස්ත්‍රාත් අධිකරණය නියම කළේය.

මෙම වරෙන්තුවලට අදාළ මෝසමක් කොළඹ අතිරේක මහෙස්ත්‍රාත් වරයගේ නිල මැදිරියේ කැඳවූ අවස්ථාවේදී කොළඹ අපරාධ කොට්ඨාශය විසින් අත්අඩංගුවට ගන්නා ලද ඥානසාර හිමියන්ව අද අධිකරණය හමුවට ඉදිරිපත් කර තිබුණි.

එහිදී කොළඹ අපරාධ කොට්ඨාශයේ නිලධාරීන් අධිකරණය හමුවේ කරුණු දක්වමින් දැනුම් දී ඇත්තේ, සැකකාර ඥානසාර හිමියන් අධිකරණය විසින් නිකුත් කරනු ලැබූ වරෙන්තුවලට අනුව අත්අඩංගුවට ගෙන ඉදිරිපත් කරන බවය.

උන්වහන්සේට අභියාචනාධිකරණයෙන්, කොළඹ මහාධිකරණයෙන් සහ කොළඹ මහෙස්ත්‍රාත් අධිකරණයෙන් වරෙන්තු නිකුත් කර තිබෙන බවත් පොලිසිය සඳහන් කර සිටියේය.

එම අවස්ථාවේ විත්තිකාර ඥානසාර හිමියන් වෙනුවෙන් නීතිඥ පසන් කරුණාරත්න මහතා සමග පෙනී සිටි නීතීඥ ඉරේෂ් සෙනෙවිරත්න මහතා අධිකරණය හමුවේ කරුණු දක්වමින් සිය සේවාදායක හිමියන් මානසික වශයෙන් කඩාවැටීමකට ලක්ව සිටි නිසා උන්වහන්සේ ආරණ්‍ය සේනාසනයකට ගොස් එහි රැඳී සිටි බව සඳහන් කළේය.

උන්වහන්සේට විශේෂ ආරක්ෂාවක් සලසා දෙන ලෙස පාස්කු ඉරුදින ත්‍රස්ත ප්‍රහාරය සම්බන්ධයෙන් සොයා බැලූ ජනාධිපති පරීක්ෂණ කොමිෂන් සභාව වාර්තාව තුළින් ද සඳහන් කර තිබූ බව පෙන්වා දුන් නීතිඥ සෙනෙවිරත්න මහතා, ඒ අනුව බන්ධනාගාරය තුළදී උන්වහන්සේට විශේෂ ආරක්ෂාවක් සලසා දීමට අවශ්‍ය නියෝග නිකුත් කරන ලෙසත් ඉල්ලා සිටියේය.

ඉදිරිපත් වූ කරුණු සලකා බැලූ අතිරේක මහෙස්ත්‍රාත්වරයා විත්තිකාර ඥානසාර හිමියන්ව රිමාන්ඩ් භාරයට පත් කරන ලෙස නියම කළේය.

ඒ අනුව ඥානසාර හිමියන්ව අභියාචනාධිකරණය හමුවේ පවතින වරෙන්තුව සඳහා හෙට දින එම අධිකරණයට ඉදිරිපත් කරන ලෙස නියෝග කළ අතර, කොළඹ මහාධිකරණය හමුවේ පවතින වරෙන්තුව සඳහා අනිද්දා කොළඹ මහාධිකරණයට ඉදිරිපත් කරන ලෙසත් මහේස්ත්‍රාත්වරයා නියෝග කරනු ලැබීය.

ඊට අමතරව කොළඹ මහෙස්ත්‍රාත් අධිකරණය හමුවේ පවතින වරෙන්තුව සඳහා ලබන බදාදා උන්වහන්සේව එම අධිකරණයට ඉදිරිපත් කිරීමට කටයුතු කරන ලෙසද මහෙස්ත්‍රාත්වරයා මෙහිදී බන්ධනාගාර නිලධාරීන්ට නියම කර ඇත.

එමෙන්ම රක්ෂිත බන්ධනාගාර ගත කරන ලද ඥානසාර හිමියන්ගේ ආරක්‍ෂාව සම්බන්ධයෙන් අවශ්‍ය පියවර ගන්නා ලෙසත් මහෙස්ත්‍රාත්වරයා මෙහිදී බන්ධනාගාර නිලධාරීන්ට නියම කළේය.

- අද දෙරණ