ෆ්ලයි ඩුබායි ගුවන් යානයේ සිදුවීම වැරදුණ කුරුමානමක්ද? - ආචාර්ය ජගත් චන්ද්‍රවංශගෙන් අනාවරණයක්..

Oct 2, 2026 at 05:12 AM

|

Lanka Leader

ඩුබායි සිට ඊශ්‍රායලයේ තෙල් අවීව් දක්වා පියාසර කරමින් තිබූ ෆ්ලයි ඩුබායි (Flydubai) ගුවන් යානය තුළ ඇති වූ හදිසි නොසන්සුන්කාරී තත්ත්වය සහ එය සෞදි අරාබියට ගොඩබෑම් සිද්ධිය පිටුපස කිසියම් දේශපාලනමය හෝ ඔත්තු සේවා අරමුණක් තිබේදැයි සැක පහළ වන බව ජාත්‍යන්තර දේශපාලන විශ්ලේෂක ආචාර්ය ජගත් චන්ද්‍රවංශ මහතා පවසයි. 

Lanka Voice යූටියුබ් නාලිකාව සමඟ පැවැති සාකච්ඡාවකට එක්වෙමින් ඒ මහතා පෙන්වා දුන්නේ, සිදුවීම සම්බන්ධයෙන් නිල පරීක්ෂණ අවසන් වීමටත් පෙර විවිධ පාර්ශව සහ මාධ්‍ය විසින් එකිනෙකට වෙනස් මත ප්‍රකාශ කිරීම සැකසහිත බවයි.

ඩුබායි සිට පිටත් වූ මෙම යානය තුළ ඇති වූ කලකෝලහලයක් හේතුවෙන් කාර්ය මණ්ඩලය විසින් එය පාලනය කරගැනීමෙන් පසු සෞදි අරාබියේ ආරක්ෂිත ස්ථානයකට ගොඩබස්වා තිබේ. 

මෙම සිද්ධිය මුලින් ගුවන් යානා පැහැරගැනීමක් (Hijack) ලෙස වාර්තා වූ අතර, පසුව නියමුවා සහ සහායක නියමුවා අතර ඇති වූ ගැටුමක් ලෙසත්, යානය තුළ සිටි මගීන්ගේ මැදිහත්වීමෙන් බේරාගත් එකක් ලෙසත් විවිධ මාධ්‍ය මඟින් ප්‍රකාශ කර ඇත. 

පරීක්ෂණ පවත්වාගෙන යන අතරතුර ඊශ්‍රායලයේ ඇතැම් දේශපාලඥයන් සහ ජාත්‍යන්තර මාධ්‍ය මෙය ත්‍රස්තවාදී ප්‍රහාරයක් ලෙස නම් කිරීමට උත්සාහ කිරීම පිළිබඳව  දේශපාලන විචාරකයන්ගේ දැඩි විවේචන එල්ල වී තිබේ.

ඉරානය, ඇමෙරිකාව සහ ඊශ්‍රායලය අතර පවතින ගැටුම්කාරී තත්ත්වයත්, හෝමුස් සමුද්‍ර සන්ධිය සහ ඉන්ධන හිඟය හේතුවෙන් ලෝක ආර්ථිකයට එල්ල වී ඇති බලපෑමත් මෙවැනි ජාත්‍යන්තර සිදුවීම් කෙරෙහි බලපාන බව ආචාර්ය ජගත් චන්ද්‍රවංශ වැඩිදුරටත් සඳහන් කළේය.

සවිස්තරාත්මක වීඩියෝව නරඹන්න..