174 දෙනෙකුගේ ජීවිත බේරාගත් ඉන්දීය නියමුවාට මෝදිගෙන් සහ නෙතන්යාහුගෙන් ඉහළම ප්‍රශංසා!..

Oct 1, 2026 at 08:54 AM

|

Lanka Leader

එක්සත් අරාබි එමීර් රාජ්‍යයේ සිට ඊශ්‍රායලය දක්වා පියාසර කරමින් තිබූ flydubai (FZ1073) ගුවන් යානයේ නියමු කුටිය තුළදී සහායක නියමුවා විසින් සිදුකිරීමට තැත් කළ කඩාකප්පල්කාරී ක්‍රියාවක් හමුවේ, සිය ජීවිතය පවා පරදුවට තබමින් මගීන් 174 දෙනෙකුගේ ජීවිත සුරක්ෂිත කිරීමට ප්‍රධාන ගුවන් නියමුවා සමත් වී තිබේ.

සිදුවීමට මුහුණ දුන් ඉන්දීය ජාතික ප්‍රධාන ගුවන් නියමු ස්මිට් මච්ඡාර් (Smit Machhar) මහතාගේ මෙම අසමසම ධෛර්යය හා වීරත්වය ඉන්දීය අග්‍රාමාත්‍ය නරේන්ද්‍ර මෝදි සහ ඊශ්‍රායල අග්‍රාමාත්‍ය බෙන්ජමින් නෙතන්යාහු විසින් දැඩි ලෙස පැසසුමට ලක් කර ඇත.

ගුවන් යානය අඩි 14,000ක (මීටර් 4,267ක) උසක පියාසර කරමින් තිබියදී සහායක නියමුවා විසින් ප්‍රධාන නියමුවා වෙත හදිසියේම පිහි ප්‍රහාරයක් එල්ල කර ගුවන් යානය අනතුරට ලක් කිරීමට උත්සාහ කර තිබේ. එම අවස්ථාවේදී යානය තත්පර 30කටත් අඩු කාලයකදී වේගයෙන් පහතට කඩා වැටීමට පටන් ගෙන ඇත. නමුත්, තදබල ලෙස තුවාල ලබා රුධිරයෙන් තෙත්ව සිටි නියමු ස්මිට් මච්ඡාර්, අභීත ලෙස ක්‍රියා කරමින් නියමු කුටියේ දොර අගුල හැරීමට සමත් වී ඇත.

ඊශ්‍රායල අගමැති බෙන්ජමින් නෙතන්යාහු, "ඔහු ඊශ්‍රායල වැසියන් ඇතුළු විවිධ රටවල මගීන් 174 දෙනෙකුගේ ජීවිත බේරාගත් සැබෑ වීරයෙක්," යැයි එක්ස් (X) පණිවුඩයක් තබමින් සඳහන් කළේය.

ඉන්දීය අගමැති නරේන්ද්‍ර මෝදි, ස්මිට් මච්ඡාර් පෙන්වූ විශිෂ්ට ධෛර්යය අගය කරමින් ඔහුව "සැබෑ වීරයෙකු" ලෙස හඳුන්වා දුන්නේය.

මුම්බායි නගරයේ පදිංචිකරුවෙකු වන ස්මිට් මච්ඡාර්, flydubai සමාගමට එක්වීමට පෙර ඉන්දියාවේ SpiceJet ගුවන් සමාගමේ වසර 11කට වැඩි කාලයක් සේවය කළ පළපුරුදු නියමුවෙකි. ඔහු මේ වන විට තබූක් (Tabuk) නගරයේ රෝහලක ප්‍රතිකාර ලබන අතර, ඔහුගේ සෞඛ්‍ය තත්ත්වය යහපත් අතට හැරෙමින් පවතින බව වාර්තා වේ.

නියමුවන් දෙදෙනා අතර මෙවැනි ගැටුමක් ඇතිවීමට හේතුව මෙතෙක් අනාවරණය වී නොමැති අතර, සිදුවීම සම්බන්ධයෙන් විමර්ශන ආරම්භ කර ඇත. පරීක්ෂණ අවසන් වන තෙක් ඊශ්‍රායලය වෙත ක්‍රියාත්මක වන සියලුම ගුවන් ගමන් තාවකාලිකව අත්හිටුවීමට flydubai සමාගම පියවර ගෙන තිබේ.