දළදා මාළිගාවේ පත්තිරිප්පුව ඉදි කළ විශිෂ්ට ගෘහ නිර්මාණ ශිල්පියාගේ කතාව..

Sep 30, 2026 at 06:09 AM

|

Lanka Leader

මහනුවර යුගයේ බිහිවූ විශිෂ්ටතම ඉංජිනේරුවෙකු සහ ගෘහ නිර්මාණ ශිල්පියෙකු වන දේවේන්ද්‍ර මූලාචාර්යයන් (ඩිංගිත්තා අප්පු) පිළිබඳව තොරතුරු අනාවරණය වන යූටියුබ් වීඩියෝවක් Next page යූටියුබ්  නාලිකාව මගින් ප්‍රකාශයට පත්කර තිබේ. 

1747 - 1812 කාලය තුළ ජීවත් වූ එතුමා, කීර්ති ශ්‍රී රාජසිංහ, රාජාධි රාජසිංහ සහ ශ්‍රී වික්‍රම රාජසිංහ යන මහනුවර යුගයේ රජවරුන් තිදෙනෙකු යටතේ රාජකීය ශිල්පියා ලෙස සේවය කර ඇත. 

මහනුවර දළදා මාළිගාවේ පත්තිරිප්පුව, මහනුවර මගුල් මඩුව, නුවර වැව, වලාකුළු බැම්ම, දියරැල්ල බැම්ම, ඇම්බැක්කේ දේවාලයේ අලුත්වැඩියා කටයුතු, දෙගල්දොරුව ලෙන් විහාරය, සහ ධනකිරිගල රජමහා විහාරය ඇතුළු පූජනීය හා ඓතිහාසික ස්ථාන රැසක ප්‍රධාන නිර්මාණකරු වූයේද එතුමාය. 

ශ්‍රී වික්‍රම රාජසිංහ රජුගේ කාලයේදී ඉදිවූ පත්තිරිප්පුවේ ආකෘතිය එතුමා මුලින්ම කෙසෙල් පතුරුවලින් සකසා රජුට පෙන්වා ඇති අතර, එය ඉදි කිරීමට වසර 2ක පමණ කාලයක් ගතවී තිබේ.

වර්ෂ 1812 දී, එනම් එතුමාට වයස අවුරුදු 65 දී, තමන් විසින්ම නිර්මාණය කළ නුවර වැවට පැන සියදිවි නසාගත් බවට ජනප්‍රවාදයේ සඳහන් වේ. 

එකල පැවති රජවාසල කුමන්ත්‍රණ සහ රාජ සභාවේ අයෙකු එතුමාට එරෙහිව කළ කේළම් බස් නිසා රජුගෙන් දඬුවම් ලැබීමට ඇති බිය හේතුවෙන් ඔහු මෙසේ කළ බව පැවසේ. 

කෙසේ වෙතත්, එතුමා සැබවින්ම සියදිවි නසා නොගත් බවත්, දේශපාලන බලපෑම්වලින් මිදීමට සියදිවි නසාගත් බවට මතයක් පතුරුවා හැර වෙනත් ප්‍රදේශයකට පලාගොස් අඥාතව ජීවත් වූ බවටද මත පවතී. 

මෙම තොරතුරු ඇතුළත් වීඩියෝව සඳහා පාදක වී ඇත්තේ ඩී.එම්.ඩී. වෛද්‍යසේකර මහතා විසින් රචිත "මහනුවර රාජධානියේ විශිෂ්ට රාජකීය නිර්මාණ ශිල්පී දේවේන්ද්‍ර මූලාචාරී" නමැති ග්‍රන්ථය සහ ජෝන් ඩේවිගේ සටහන් ඇතුළු ඓතිහාසික මූලාශ්‍රයන්ය.

වීඩියෝව නරඹන්න..