අනුරගේ රතු හැට්ටයට යටින් ඉන්නේ වෙනිසියුලාවේ ඇමෙරිකානු පදයට නැටූ ඩෙල්සිලා.. උතුරේ කොටි සැමරුම් හා සිංහල බෞද්ධ උරුමයට එල්ල වන තර්ජන හමුවේ විපක්ෂයේත් අශුද්ධ එකඟතාවක්.. - විමල්ගෙන් හෙළිදරව්වක්

Sep 29, 2026 at 11:46 AM

|

Lanka Leader

ශ්‍රී ලංකා පදනම් ආයතන ශ්‍රවණාගාරයේදී ඉකුත් 27 වෙනි ඉරිදා පැවැති විශේෂ ප්‍රසිද්ධ දේශනය අමතමින් ජාතික නිදහස් පෙරමුණේ නායක, හිටපු පාර්ලිමේන්තු මන්ත්‍රී විමල් වීරවංශ මහතා වර්තමාන ආණ්ඩුවේ දෙවසරක විනාශකාරී ක්‍රියාකලාපය, රට මුහුණ දී සිටින දැවැන්ත භූ-දේශපාලනික අර්බුදය සහ අනාගත දේශපාලන අරගලයේ ගමන් මග පිළිබඳව අතිශය උණුසුම්, දීර්ඝ සහ විවේචනාත්මක හෙළිදරව්වක් සිදු කළේය.

වෙනිසියුලාවේ ඩෙල්සිගේ පාවාදීමට සමාන වූ අනුර කුමාරගේ නියෝ-ලිබරල් පාලනය

දේශනය ආරම්භ කරමින් විමල් වීරවංශ මහතා පෙන්වා දුන්නේ වර්තමාන ජනාධිපති අනුර කුමාර දිසානායක මහතාගේ පාලන තන්ත්‍රය, වෙනිසියුලාවේ හියුගෝ චාවේස් සහ නිකොලස් මදුරෝගේ විප්ලවීය පාලනයන්ගෙන් පසුව අධිරාජ්‍යවාදී වුවමනාවන් මත බලයට පත් වූ ඩෙල්සි රොඩ්‍රිගස්ගේ පාවාදීම් සහිත පාලනයට අතිශයින්ම සමාන වන බවයි.

වෙනිසියුලාවේ චාවේස්ගේ සහ මදුරෝගේ ඡායාරූප පසුපස ප්‍රදර්ශනය කරමින් ඩෙල්සි රොඩ්‍රිගස් විසින් එරට සරුසාර තෙල් ළිං සහ ස්වාභාවික සම්පත් ඇමෙරිකානු බහුජාතික සමාගම් වෙත ඉතා කුණුකොල්ලයට පාවා දුන්නා සේම, වත්මන් ආණ්ඩුව ද මාක්ස්, එංගල්ස්, ලෙනින් සහ රෝහණ විජේවීර වැනි විප්ලවවාදී නායකයන්ගේ පින්තූර තමන්ගේ කාර්යාලවල ප්‍රදර්ශනය කරමින් අන්ත-ලිබරල්, පරගැති සහ දේශීය සම්පත් බටහිරට හා ඉන්දියාවට පාවාදෙන නියෝ-ලිබරල් වැඩපිළිවෙළක් ඉතා සූක්ෂ්ම ලෙස ක්‍රියාත්මක කරන බව හෙතෙම සපථ කළේය. වාමාංශික හා සමාජවාදී වෙස්ගෙන සිටියද වත්මන් ආණ්ඩුව අධිරාජ්‍යවාදී සහ ඉන්දියානු ව්‍යාප්තවාදී න්‍යායපත්‍රයන්ට සම්පූර්ණයෙන්ම යටත්ව රටේ ස්වාධීනත්වය පාවාදෙන බවට ඔහු දැඩි ලෙස චෝදනා කළේය.

ආර්ථික අගාධය, ගොවියා අසරණ කිරීම සහ විදුලි ක්ෂේත්‍රයේ නරුම වංචා

වත්මන් ආණ්ඩුවේ අසාර්ථක ආර්ථික භාවිතාවන් එකින් එක හෙළිදරව් කරමින් වීරවංශ මහතා කියා සිටියේ, හොරාකෑම නතර කළ සැනින් බඩු මිල පහත බසින බවට මැතිවරණ වේදිකාවල දුන් බොළඳ පොරොන්දු මුළුමනින්ම කඩවී ඇති බවයි. රටේ දේශීය ණය ප්‍රමාණය රුපියල් ට්‍රිලියන 18.32 සිට රුපියල් ට්‍රිලියන 20.43 දක්වා තවත් දැවැන්ත ලෙස ඉහළ ගොස් ඇති අතර, ලෝක බැංකු වාර්තාවල පවා සඳහන් වන පරිදි රටේ දුප්පත්කම 65% දක්වාත්, තරුණ රැකියා විරහිතභාවය 35% දක්වාත් භයානක ලෙස ඉහළ ගොස් ඇති බව පෙන්වා දුන්නේය.

දේශීය කෘෂිකර්මාන්තය සහ අසරණ වී ගොවියා මුළුමනින්ම අඩපණ කරමින් ඉන්දියාවෙන් හාල් ගෙන ඒමේ ජාවාරමක ආණ්ඩුව නිරත වන බවත්, MAS, Brandix, Hydramani වැනි මෙරට ආර්ථිකයට සෙවන දුන් දැවැන්ත දේශීය ඇඟලුම් සහ මෘදුකාංග සමාගම් අධික පිරිවැය සහ දරුණු බදු බර නිසා සිය ව්‍යාපාර වියට්නාමය, ඩුබායි සහ ඉන්දියාව වැනි රටවලට සංක්‍රමණය කරමින් පවතින බවත් ඔහු අවධාරණය කළේය.

එමෙන්ම, තමන්ගේම වහල මත සවි කරන ලද සූරිය බල පද්ධති (Solar panels) මගින් ජනතාව ලබමින් සිටි අතිරික්ත ආදායම මුළුමනින්ම නැවැත්වීමට කටයුතු කරමින්, නෙට්-ප්ලස් (Net Plus) ක්‍රමය පමණක් ඉතිරි කර කුඩා හා මධ්‍ය පරිමාණ විදුලි නිෂ්පාදකයන් අගාධයට ඇද දමා, මහ පරිමාණ සමාගම්වලට පමණක් සිය ගණනින් වාසි සැලසීමට ආණ්ඩුව කටයුතු කරමින් සිටින බවත්, බාල ගල්අඟුරු නැව් ගෙන ඒම පිටුපස දැවැන්ත වංචා සහ දූෂණ සිදුවන බවත් හෙතෙම කරුණු සහිතව හෙළි කළේය.

සිංහල බෞද්ධ උරුමය පිටුපසින් වනසන මර්දනය සහ උතුරේ දෙවැනි කොටි නැගිටීම

ගාලුමුවදොර අරගලයේ සිට පැවත එන බෞද්ධ විරෝධී සහ රණවිරු විරෝධී උමතු මානසිකත්වය වත්මන් පාලනය විසින් ඉතා සංවිධානාත්මකව ඉදිරියට ගෙන යන බව විමල් වීරවංශ මහතා අවධාරණය කළේය. රාජ්‍ය හා පාර්ලිමේන්තු උත්සවවලින් ජයමංගල ගීත පවා ඉවත් කිරීම, රණවිරු සමරුවලට ජනාධිපතිවරයා ඉතා නොකැමැත්තෙන් සහභාගී වීම, රට වෙනුවෙන් දිවි පරදුවට තබා ක්‍රියා කළ බුද්ධි අංශ ප්‍රධානීන් හා හමුදා නිලධාරීන් සිරගත කිරීම සහ චෙම්මනි මිනීවලවල් යළි හාරමින් ජාත්‍යන්තරය හමුවේ ශ්‍රී ලාංකේය හමුදාව අපකීර්තියට පත්කිරීම ආණ්ඩුවේ ජාතිද්‍රෝහී හා රණවිරු විරෝධී පිළිවෙතට පැහැදිලි නිදසුන් බව දැක්වීය.

එපමණක් නොව, උතුරේ සහ නැගෙනහිර පවතින ඓතිහාසික සිංහල බෞද්ධ උරුමයන් මුළුමනින්ම අහෝසි කර, එම ප්‍රදේශ හින්දු කරණය කිරීමේ හා බෙදුම්වාදීන්ට බිලිදීමේ අතිශය භයානක වැඩපිළිවෙළක් ක්‍රියාත්මක වන බවට ඔහු චෝදනා කළේය. වඩුනාගල පූජනීය භූමිය බෞද්ධයන්ට තහනම් කලාපයක් කිරීම, යාපනයේ නාගදීපයට බෞද්ධයන් යාම සීමා කිරීම, මඩකලපුවේ අසරණ සිංහල ගොවීන්ගේ වගා භූමි පරසතුරන් විසින් අත්පත් කරගැනීමට ඉඩහැර බලා සිටීම සහ යාපනය නගර සභාවේදී මෙන්ම පාලක පක්ෂයේ මන්ත්‍රීවරුන් ඉදිරියේම එල්.ටී.ටී.ඊ. ත්‍රස්තවාදී තිලීපන් මුසිපත්ව සමරනු ලැබීම ආදිය මගින් උතුරේ කොටි ත්‍රස්තවාදය නැවත වටයකින් දේශපාලනමය වශයෙන් ශක්තිමත්ව ස්ථාපිත වෙමින් පවතින බව පෙන්වා දුන්නේය.

පලාලි හමුදා කඳවුර ඉවත් කිරීම, මහවැලි අධිකාරිය, විහාර දේවාලගම් පනත සහ පුරාවිද්‍යා පනත අඩපණ වන පරිදි සංශෝධනය කරමින් උතුරු-නැගෙනහිර පළාත් සභාවලට පොලිස්, ඉඩම් සහ පුරාවිද්‍යා බලතල ලබාදීමට ආණ්ඩුව සහ LTTE ඩයස්පෝරාව අතර රහසිගත අශුද්ධ එකඟතාවක් ඇති බවට ද ඔහු චෝදනා කළේය. මෙහි අතිශය දරුණු අවසාන ප්‍රතිඵලය ලෙස, ඉතියෝපියාවෙන් එරිට්‍රියාව වෙන් කළාක් මෙන් ජාත්‍යන්තර ජනමත විචාරණයක් හරහා උතුර සහ නැගෙනහිර ශ්‍රී ලංකා මාතාවගෙන් වෙනම රාජ්‍යයක් ලෙස වෙන්වීමේ භයානක විනාශයට සිංහල බෞද්ධයන්ට සහ මුළු මහත් ජාතියටම නුදුරේදීම මුහුණ දීමට සිදුවනු ඇති බව උදාහරණ සහිතව පෙන්වා දුන්නේය.

'නියෝ-පොල්පොට්' මර්දනය, තක්කඩි විපක්ෂයේ හෙංචයියාකම සහ ජාතික බලවේගවල අරගලය

22 වන ආණ්ඩුක්‍රම ව්‍යවස්ථා සංශෝධනය සහ අල්ලස් හෝ දූෂණ විමර්ශන පනත් සංශෝධන අවියක් කරගනිමින් අධිකරණයේ ස්වාධීනත්වය මුළුමනින්ම විනාශ කර, විපක්ෂයේ නැගී එන ඕනෑම කොන්දක් සහිත ශක්තිමත් නායකයෙකු ව්‍යාජ චෝදනා මත සිරගත කිරීමට ආණ්ඩුව කුමන්ත්‍රණය කරමින් සිටින බවත්, මෙය "නියෝ-පොල්පොට්" මාදිලියේ ම්ලේච්ඡ දේශපාලන මර්දනයක් බවත් හෙතෙම පැවසීය.

වත්මන් පාර්ලිමේන්තු විපක්ෂයේ නිෂේධනාත්මක භූමිකාව දැඩි ලෙස හෙළාදුටු වීරවංශ මහතා, රටට සහ සිංහල බෞද්ධ උරුමයට එරෙහිව සිදුවන මෙම කිසිදු ජාතික විනාශයකදී විපක්ෂය වචනයකින් හෝ හඬක් නොනගන්නේ ආණ්ඩුව සහ විපක්ෂයේ ප්‍රධානීන් අතර ඇති කරගෙන තිබෙන "තක්කඩි අශුද්ධ එකඟතාවයක" ප්‍රතිඵලයක් ලෙස බව පැවසීය. ඉදිරි මැතිවරණවලදී ප්‍රතිවාදී සැබෑ දේශප්‍රේමී බලවේග සම්පූර්ණයෙන්ම මර්දනය කර, තමන්ට හිතකර මෙල්ල වූ විපක්ෂයක් පමණක් ඉතිරි කරගනිමින් ද්විපක්ෂ ක්‍රමයක් ඇතුළත පමණක් රූකඩ මැතිවරණ පවත්වා බලය තහවුරු කරගැනීමට ආණ්ඩුව සැලසුම් කරන බව ද හෙළි කළේය.

තත්ත්වය මෙසේ හෙයින්, මෙම පරගැති, බෙදුම්වාදී සහ නියෝ-ලිබරල් විනාශකාරී න්‍යායපත්‍රයට එරෙහිව බියක් නැතිව කෙලින් සිටගත හැකි, සිංහල බෞද්ධ උරුමය, රණවිරු අභිමානය සහ රටේ ස්වෛරීභාවය සුරකින සැබෑ දේශප්‍රේමී සහ ප්‍රගතිශීලී ජාතික එකමුතුවක් වහාම මහපාරේ ගොඩනැගිය යුතු බවත්, ඊට එකතු නොවන දේශපාලනඥයන් ඉතිහාසයේ කුණුබූමියට ඇදවැටෙමින් ස්වාභාවික දේශපාලනික වඳවී යාමකට ලක්වනු ඇති බවත් ජාතික නිදහස් පෙරමුණේ නායක විමල් වීරවංශ මහතා වැඩිදුරටත් ගිගුම් දෙමින් අවධාරණය කළේය.

ජාතික නිදහස් පෙරමුණේ නායක හිටපු පාර්ලිමේන්තු මන්ත්‍රී විමල් වීරවංශ මහතා ශ්‍රී ලංකා පදනම් ආයතනයේදී පවත්වන ලද දේශනයේ සම්පූර්ණ පිටපත, 

"වැඩමවා වදාළ නුගේගොඩ නාලන්දාරාමාධිපති, බෙන්තර පාර්ශ්වයේ ප්‍රධාන සංඝනායක, ශ්‍රී ලංකා මහාබෝධි සංගමයේ උපසභාපති, අප හිතවත් අති පූජ්‍ය තීනියාවල පාලිත නාහිමිපාණන් වහන්සේ ප්‍රධාන මේ අවස්ථාවට වැඩමකොට වදාළ ගෞරවනීය වන්දනීය පූජනීය මහා සංඝරත්නයෙන් අවසරයි. 

ඒ වගේම ශාරීරිකව කොපමණ අමාරුකම් තිබුණත් අප වෙනුවෙන් මේ අවස්ථාවට සහභාගී වීමට සපැමිණි, මනසින් තවමත් තරුණ, තව චිරාත් කාලයක් අප සමඟම ජීවත් වේවායි කියලා පතන, ලංකාවේ “කොඳු බිඳ නොගත් පරමාදර්ශී බුද්ධිමතුන්ගේ පරපුර නියෝජනය කරන” ආචාර්ය ගුණදාස අමරසේකර මැතිතුමනි. එම මැතිනියනි, පුතුණුවනි, ඔබ සියලු දෙනාගෙන් අවසරයි. ඒ වගේම මේ වේදිකාවේ සිටින ජාතික නිදහස් පෙරමුණේ දේශපාලන මණ්ඩල සභික ආචාර්ය සුපුන් සහෝදරයාගෙන් අවසරයි. ඒ වගේම මාතර දිස්ත්‍රික් අපේ නායක දේශපාලන මණ්ඩල සභික වෛද්‍ය හේවා ගමගේ සහෝදරයාගෙන් අවසරයි.

හිටපු පාර්ලිමේන්තු මන්ත්‍රී හිටපු අමාත්‍ය ජයන්ත සමරවීර මැතිතුමනි, ජ්‍යෙෂ්ඨ නීතිඥ කල්‍යාණන්ද තිරාණගම මැතිතුමනි, කථිකාචාර්ය මහින්ද පතිරණ මැතිතුමනි, ජනතා සේවක සංගමයේ ප්‍රධාන ලේකම් ජයන්ත විජේසිංහ මැතිතුමනි, ගෝලීය ශ්‍රී ලංකා සංසදයේ ලේකම් යසස් ධර්මදාස මැතිතුමනි, ඒ වගේම දේශප්‍රේමී ජාතික ව්‍යාපාරයේ මහලේකම් වෛද්‍ය වසන්ත බණ්ඩාර මැතිතුමන් ඇතුළු අපගේ ආරාධනාව පරිදි මේ අවස්ථාවට සහභාගී වීමට පැමිණි ගරුතර මව්වරුනි, පියවරුනි, සහෝදර සහෝදරියනි, දූ දරුවනි ඔබ සියලු දෙනාගෙන් අවසරයි. 

අපි මේ දේශනය පවත්වන වෙලාව වෙනකොට “වර්තමාන ආණ්ඩුවේ ආයු කාලය වසර දෙක සම්පූර්ණ කොට තිබෙනවා”. සාමාන්‍යයෙන් ආණ්ඩුවක අවුරුදු දෙකක් ප්‍රමාණවත් වෙනවා ඒ ආණ්ඩුව ගමන් කරමින් තියෙන්නේ කවර ගමනාන්තයක් කරාද කියන නිශ්චිත නිගමනයකට එළඹෙන්න. සමහරවිට පළවෙනි අවුරුද්ද පමණක් ඒකට ප්‍රමාණවත් නෙවෙයි. දෙවසර කියන්නේ ඒ ආණ්ඩුවේ ගති ලක්ෂණ, විභවතාව, දුබලතාව, අරමුණ, යටි අරමුණ මේ යනාදී සියල්ල කියවා ගැනීමට සමත් එක්තරා දුරකට ඔවුන් නිරාවරණය වෙච්ච කාල පරිච්ඡේදයක්. ඒ නිසා අපිට වගකීමක් තිබෙනවා, සමාජයට මග පෙන්වන්නන් හැටියට මේ දෙවසරක භූමිකාව, දෙවසරක භාවිතාව හරියට විග්‍රහ කරගෙන අනාගත පාර කපාගෙන යන්නේ කොතනටද කියන එක පිළිබඳව නිවැරදි පුරෝකථනයකට එන්න. 

එහෙම නිවැරදි පුරෝකථනයකට එන්න පුළුවන් වුණොත් විතරයි කරන්න යන්නේ රටට අවාසිදායක දෙයක් නම් වළක්වා ගන්න පුළුවන් වෙන්නේ, කරන්න යන්නේ රටට යහපත් දෙයක් නම් උදව් කරන්න හිතෙන්නේ. ඒ නිසා තමයි අපි අදහස් කළේ “අනුර නමින් ඩෙල්සි ඇවිත්” කියන මේ දේශනය ඔබ හමුවට අරගෙන එන්න. මේක ටිකක් කලබලයකින් තොරව සංයමයෙන් ඉවසිල්ලෙන් සාකච්ඡාවක් කරගත යුතු දෙයක් නිසා තමයි අපි මේ විදියේ පීඨිකාවක් මේ සඳහා තීරණය කරනු ලැබුවේ.

දැන් අපි මේ කතා  කරන වෙලාව කොට ඇමෙරිකා එක්සත් ජනපදයට යනවා චීන ජනාධිපති ෂී ජින්පින්ග්. ඩොනල්ඩ් ට්‍රම්ප් ජනාධිපතිතුමා ඇමෙරිකා එක්සත් ජනපදයේ ගුවන් යානයේ තරප්පු පෙළ පාමුලට වෙලා බලාගෙන ඉන්නවා, චයිනා ගුවන් යානයෙන් ආපු ෂී ජින්පින්ග් ජනාධිපතිතුමා පඩිපෙළ බැහැලා පල්ලෙහාට එනකන් පිළිගන්න. ෂී ජින්පින්ග් ජනාධිපතිතුමාවයි එම ආර්යාවයි, ජනාධිපති ට්‍රම්ප් සහ ආර්යාව එකිනෙකා ඉතාම සුහදව පිළිගන්නවා. 

මේකේ තියෙනවා අපිට කියවාගන්න කතාවක්. පරණ බලකේන්ද්‍රය සලිත වෙච්ච, නැගී එන බලකේන්ද්‍රයක් පිළිබඳ කතාවක් ඒකේ තියෙනවා. එක බලකේන්ද්‍රයකට සීමා වූ ලෝකය “බහුධ්‍රැවීය බලකේන්ද්‍ර ගණනාවකට නිර්මාණය වෙන කතාවක්” ඒකතුළ සංකේතාත්මකව ප්‍රකාශයට පත්වෙන්නේ ඒක. ඒ නිසා මුලින්ම තේරුම් ගන්න ඕනා අපි මේ ඉන්නේ ඒ එක කේන්ද්‍රයකට කැමැත්තෙන් හෝ අකමැත්තෙන් අවනතව සිටිය යුතුයි කියලා බලකරන තත්ත්වයක නෙවෙයි. ඊට වඩා නිදහස්ව තීරණ ගත හැකියි, නිදහස්ව තීරණ ගනු ලබන රටවල් මේ පොළොව මත තිබෙන වටපිටාවක. එතකොට අපිට සලකා බලන්න වෙනවා වර්තමාන අනුර කුමාර පාලනය මේ ලෝක බල වෙනස්කම්වලදී කුමන හැසිරීමකද ඉන්නේ කියලා. 

පසුගිය දවස්වල “බ්‍රික්ස් රාජ්‍ය නායක සමුළුව” තිබුණා නවදිල්ලියේ. ඔවුන් ඉතාම ප්‍රිය කරන කියුබාවේ ජනාධිපතිවරයා ඇතුළු, බොලීවියාවේ ජනාධිපතිතුමා ඇතුළු ඒ වාමාංශික පරපුරට අයත් ජනාධිපතිවරු රැසක් ඒ අවස්ථාවට ඇවිල්ලා හිටියා. නවදිල්ලියේ තියෙන සමුළුවට ආරාධනා කිරීමේ බලය තියෙන්නේ සත්කාරක රට හැටියට ඉන්දියාවට. ගිය වර සත්කාරක රට වුණේ රුසියාව, රුසියාවෙන් ආවා බ්‍රික්ස් එකට එන්න කියලා ජනාධිපතිවරයාට ජනාධිපති පුටින්ගේ අත්සන සහිතව ලියුමක්. එතුමා හිතුවා ඒකට යනවට වඩා වටිනවා ඡන්දෙට ඉන්න එක කියලා. ගියේ නැහැ. ගියේ නැති හින්දද කොහෙද අල්ලපු රටේ අගමැතිවරයාත් ආරාධනා කරන්නේ නැහැ. ඇයි පුටින් එවපු ලියුමට වඩා රැස්වීම් වටිනවා කියපු කෙනාට මෝඩි එවපු ලියුමට වඩා ගම්පහ රැස්වීම වටිනවා කිව්වොත් එක මෝඩිට ලැජ්ජාවක්. එහෙම තීරණ ගන්න කෙනෙක් කියලනේ පේන්නේ, ඒ නිසා ආරාධනාවක්වත් නැහැ. ලෝකයේ අද එතන තමයි ප්‍රධාන නව බලකේන්ද්‍රය එතනයි. 

දේශසීමා පසමිතුරුතා තිබියදී ඉන්දියාව සත්කාරක රට වෙද්දී චීන ජනාධිපති ෂී ජින්පින්ග් එනවා පරිවාර සේනාවකුත් එක්ක. ඇමෙරිකානු ඩොලර් ආධිපත්‍යයෙන් කොහොමද ලෝකය මුදාගන්නේ කියන ප්‍රශ්නය සාකච්ඡා කරන තැන, ඒවට තීරණ ගන්න තැන. ඉන්දියාවේ තියෙන ශ්‍රී ලංකා තානාපති කාර්යාලයේ ඉන්න නෝනලා දෙන්නෙක් ගිහිල්ලා හිටියා අර ආරාධිතයන් හැමෝම එන උත්සව අවස්ථාවට, එතනත් නැහැ. දැන් මේ දවස්වල එක්සත් ජාතීන්ගේ මහා මණ්ඩල සැසිය. 

පශ්චාත් අරගලයකින් අගමැති වෙච්ච නේපාලයේ අගමැති හිටපු “රැප් ගායකයා” ගිහිල්ලා එක්සත් ජාතීන්ගේ සංවිධානයේ මහා මණ්ඩලය අමතලා කියනවා. නේපාල අනන්‍යතාවය සහිතව ගිහිල්ලා තියෙන්නේ, ඒක කියන්න ඕන රැප් වුණාට. නේපාලයට අදාළ අර තොප්පිය දාගෙන නේපාල අනන්‍යතාවයෙන්. ඩබල් පොකට්වලින් එහෙම නෙවෙයි. එහෙම ගිහිල්ලා ඔහු කියනවා නේපාලය, ශ්‍රී ලංකාව වගේ දකුණු ආසියාතික රටවලට උඹලා දෙන්න ඕනේ ණය නෙවෙයි, ආධාරයි, ඇයි උඹලාගේ පව් අපි ගෙවන්නේ කියලා. මෙහේ රාජ්‍ය නායකයා ගම්පහ ජනතාව අමතනවා. එතකොට දැන් මේකෙන් පේන්නේ නැද්ද ජාත්‍යන්තරව වල්මත් වෙච්ච තත්ත්වයක්? 

දැන් අර සෞදි අරාබියේ කොහෙද නේද අර තරුණයෙක්ව මරණ දණ්ඩනයට තීන්දු කරලා තියෙන්නේ? ලංකාවේ දෙමළ සහෝදරයෙක්, පුතෙක්. ඒ පුතා සමාජ මාධ්‍යයේ පළ කරපු මොකක්ද එකකට. මුලින්ම උසාවිය දුන්නේ අවුරුදු හතරක දඬුවමක්. අපේ තානාපති කාර්යාලය සල්ලි වියදම් කරලා ඇපීල් කළා. ඇපීල් කළාම ගියේ ශ්‍රේෂ්ඨාධිකරණය වගේ එහේ තියෙන. ඒකට, එහේ ඉන්නේ ආගමික මූලධර්මවාදීන්. ඒ ඇපීල් එකෙන් වුණේ අර අවුරුදු හතරෙන් එළියට එන්න හිටපු කොල්ලට මරණ දණ්ඩනයක් හම්බවුණා. ඔන්න ඔය වගේ රාජතාන්ත්‍රික ජයග්‍රහණ නම් ලබා දෙන්න පුළුවන් මේ රටට. 

ඒ හැර රාජතාන්ත්‍රික දේශපාලනය, භූ දේශපාලනය මොන වමේ කියලවත්, දකුණේ කියන පාලනයන් තිබිච්ච කාලෙකවත් ලංකාවේ කවුරුත් කිව්වේ නැහැ අපි “නේටෝ එකට” යන්න, නේටෝ එකත් එක්ක එකතු වෙන්න කැමතියි කියලා. මෙහේ කිව්වනේ ආරක්ෂක ලේකම් තුයියකොන්තා, නේටෝ එකත් එක්ක වැඩ කරන්න කැමතියි කිව්වා. අන්ත දක්ෂිණාංශිකයැයි කියපු යැංකි ඩිකී කාලෙවත් එහෙම කිව්වේ නැහැ. එතකොට මේ මොකක්ද වෙලා තියෙන විකාරය? ඒ අස්සේ තාම පැලවත්තේ මාක්ස්, එංගල්ස්, ලෙනින් පින්තූර තුන තියෙනවා. අනිත් පැත්තේ විජේවීර සහෝදරයාගේ පින්තූරයකුත් තියෙනවා. 

දැන් මේ අල්ලපනල්ලේ පහුගිය මාර්තු 26 ඉන්දියාවේ ජාතික විමර්ශන ඒජන්සිය (NIA) කොල්කටා ගුවන් තොටුපොළේදී අත්අඩංගුවට ගන්නවා ඇමෙරිකන් ජාතිකයෙකුයි, යුක්‍රේන ජාතිකයන් පස් දෙනෙකුයි, මැතිව් වැන්ඩයින් කියන්නේ ඇමෙරිකානුවා. යුක්රෙන් 6ක්. ඒගොල්ලෝ සංචාරක වීසා මගින් ඉන්දියාවට ඇවිල්ලා මිසෝරාම් ප්‍රාන්තය හරහා මියන්මාරයට ඇතුළු වෙලා, මියන්මාරය කියන්නේ ථේරවාදී බෞද්ධ රටක් අපි වගේම, මියන්මාරයට ඇතුළු වෙලා මියන්මාරය තුළ ඉන්න බෙදුම්වාදී සන්නද්ධ කණ්ඩායමකට පුහුණුව ලබා දීලා තියෙනවා “ඩ්‍රෝන මගින් ප්‍රහාර එල්ල කරන්නත් අනෙකුත් ප්‍රහාර එල්ල කරන්නත්. 

දැන් ඉන්දියානු මාධ්‍ය වාර්තා කරනවා මේ අය CIA කියා. මැතිව් වැන්ඩයික් කියන්නේ මීට කලින් ලිබියාවේ, ඉරාකයේ, යුක්‍රේනයේ මේ හැමතැනම කරගහපු “CIA ඒජන්ට් කෙනෙක්” කියලා. ඊට පස්සේ 2026 ජූලිවල ජෝඩන් බ්‍රවුන් කියන හිටපු ඇමෙරිකානු විශේෂ බලකා සෙබළා ඉන්දියාවේදී අත්අඩංගුවට ගන්නවා, වීසා හෝ කිසිම ගුවන්ගමන් බලපත්‍රයක් නැතුව ඉන්දියාව තුළට ඇතුළු වෙලා ඉඳලා. ඉන්දියානු මාධ්‍ය වාර්තා කරනවා මෙයත් CIA කියලා. දැන් මේ අනාවරණය වෙච්ච උදාහරණ දෙකෙන් අපිට පේනවා.....( මේක ඇතුලේ මොනවා ක්‍රියාත්මක වෙනවද කියලා අපි කවුරුත් දන්නේ නැහැ, ආණ්ඩුව දන්නෙත් නැහැ, ආණ්ඩුව හොයන්නෙත් නැහැ). අපිට පේනවා කලාපයේ ප්‍රධාන බලවතා හැටියට සැලකෙන ඉන්දියාව ඇතුලෙත් CIA ක්‍රියාත්මක වීම් ක්‍රමානුකූලව බහුල වෙලා තියෙනවා. 

දැන් මේ සිදුවීම් මෙහෙම තියෙද්දී අපි මේ ඉන්නේ පශ්චාත් අරගල කාලපරිච්ඡේදයක. ලංකාවේ තිබුණා ගාලු මුවදොර අරගලය. ඒක ඊට පස්සේ ගියා බංග්ලාදේශයට. එතනින් පැතිරිලා නේපාලයට ගියා. ඊට පස්සේ කැරපොත්තු ව්‍යාපාරයක් එක්ක ඒක ඉන්දියාවට ආවා. අනිත් රටවල් ලබාගත්ත ජයග්‍රහණ ලබාගන්න ඉන්දියාවේදී දිගහරින්න බැරි වුණා, ඉන්දියාව අඩු හානියකින් ඒක නිවාගත්තා. ඉන්දියානු මාධ්‍ය කිව්වා මේ “කැරපොත්තු සටන පිටිපස්සේ ඉන්නේ ඇමෙරිකානු සල්ලි” කියලා, සාක්ෂි ඇතුව සමහර යූටියුබර්ස්ලා අනාවරණය කළා. 

දැන් මේ කතා කරන වෙලාවේ ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහත්මයා ඇතුළු හතර දෙනෙකුගේ කණ්ඩායමක් ඉන්දියාවට ගිහිල්ලා ඉන්නේ බී ජේ පී එක ගැන, මෝඩිගේ පක්ෂය ගැන හදාරන්න. හොඳයි, ඕක 80 ගණන්වල හැදෑරුවා නම් 60,000ක් විතර බේරගන්නත් තිබුණා. දැන් අරගලවලින් පස්සේ නේපාලය ගත්තත් විෂම තත්ත්වයක් නිර්මාණය වුණා. බලසම්පන්න සම්ප්‍රදායික වාමාංශික සහ මධ්‍යම වාමාංශික පක්ෂ දේශපාලන පිටියෙන් බලහත්කාරය සහ ප්‍රචණ්ඩත්වය යොදවලා පළවා හැරෙව්වා. ඒ අලුත් බලහත්කාරය සහ ප්‍රචණ්ඩත්වය රජවීම ඇතුලේ කොහේවත් හිටපු රැප් ගායකයෙක් රටේ අගමැති වුණා. වෛරය ජනිත කරවලා, වෛරය සුසර කරලා තමයි ඒ නව තත්ත්වය ඇතුලේ නව පාලනයන් නිර්මාණය වුණේ. 

බංග්ලාදේශයේ ආවා යූනුස් කියලා පිටරට හිටපු බංග්ලාදේශ වැසියෙක්, නොබෙල් සාම තෑග්ග හිමිකරගත්තු එක්කෙනෙක්. සැලැස්ම වෙලා තිබුණේත් පවත්වපු ඡන්දයෙන් තවුහිත් ජමාත් ඇතුළු මුස්ලිම් අන්තවාදී සංවිධාන රැසකට පාලන බලය අරගෙන දෙන්න. ඒ සැලැස්ම ඉන්දියානු බුද්ධි සේවා මගින් ව්‍යර්ත කළා. බංග්ලාදේශයත් වෙනස් දෙසකට අරගෙන යාම තමයි න්‍යායපත්‍රය වෙලා තිබ්බේ. දැන් මෙතන තියෙන්නේ ඒ පශ්චාත් අරගල තත්ත්වය. ඒක ඇතුලේ ඇති කළා වෛරය, ජනිත කළා ද්වේෂය. ඒ ජනිත කරපු වෛරය ද්වේෂය මනසේ අඳුරු පැත්ත අවදි කළා, මිනිසාගේ මනසේ තියෙන අවදි නොකළ යුතු අඳුරු පැත්ත අවදි කෙරුණා. 

මට අනුව නම් මේ තියෙන්නේ අපේ සමාජයේ මනසේ අඳුරු පැත්ත විසින් තෝරාගනු ලැබූ, ඒ අරගලය විසින් ඉල්ලා සිටි පාලනයයි. ඒ ගාලුමුවදොර තිබිච්ච අරගලය “මූලික වශයෙන් බෞද්ධ විරෝධී එකක්”. වෙසක් දවසේ කළු වෙසක් කූඩු ප්‍රදර්ශනය කළේ ඒ හින්දා. වෙසක් කූඩු මොන පාටෙන් හැදුවත් කළු පාටෙන් හදන්නේ නැහැ. බෞද්ධයා කළු පාට එතරම් විශේෂ කරගන්නා සමාජයක් නෙවෙයි. ඒ අරගලය මූලික වශයෙන් බෞද්ධ විරෝධී. එතන සිවුරු ඇඳගත්තු ගිහියෝ හිටියා. කොණ්ඩ වවාගත්තු, රැවුල වවාගත්තු, සිවුරු පැළඳගත්තු ගිහියෝ හිටියා. වෙනත් ආගමික ඇඳුම් ඇඳගත්තු වෙන කවුරුවත් හිටියේ නැහැ, ඇත්ත අය හිටියා මිසක් බොරුවට හිටියේ නැහැ. 

ඕමල්පේ සෝභිත හාමුදුරුවෝ කිව්වා අදින් පස්සේ “සිංහල බෞද්ධයා” අවසානයි කියලා. ඒ නිසා ඒ අරගලයේ එක ගති ලක්ෂණයක් තමයි බෞද්ධ විරෝධී බව. අනිත් එක මොකක්ද? “රණවිරු විරෝධී බව”. ඔබට මතක ඇති යුධ හමුදාවේ හිටපු ප්‍රධානීන්ගේ ඡායාරූප තියෙන ඒවාට අවමන් සහගතව සලකපු ක්‍රියාමාර්ග එතන තිබුණා. ඔබට මතක ඇති හමුදා සෙබළුන්ගේ මුහුණ ළඟට ඇවිල්ලා ඊයේ පෙරේදා ඉපදිච්ච පුංචි කුළුගැටෙක් ප්‍රභාකරන් කළෙත් මේ වගේ වැඩක් කියලා හමුදාවට චෝදනා කරන වීඩියෝ දර්ශන තිබුණා. ගමේ පන්සලේ බුදු පිළිමයට මුස්ලිම් සහෝදරයෙක් ඇවිල්ලා ගහලා කඩනවා නම්, ඒ මුස්ලිම් සහෝදරයාට ගහන්නේ නැහැ නේද? කියලා අහනකොට... “ඔව්” කියන කට්ටියක් එතන හිටියා. මූලික වශයෙන් එතන බෞද්ධ විරෝධී, රණවිරු විරෝධී. ඒ වගේම එතන IMF එකට එන්න කියන සටන් පාඨ තිබුණා. 

දැන් මේ අන්තර්ගතය එක්ක බලද්දී ලැබිලා තියෙන ආණ්ඩුවේ ගමනයි මේ අන්තර්ගතයයි ගැලපෙන්නේ නැද්ද? මේ පාලනය මූලික වශයෙන් බෞද්ධ විරෝධී නැද්ද? එහෙම නෙවෙයි නම් ජෙරොම්ලට කියන්න පුළුවන්ද අපට “මිත්‍යාදෘෂ්ටික කිව්වොත් ICCPR යටතේ නඩු දාලා හිරේ දානවා” කියලා? ජෙරොම්ලට ඒ හයිය උපදින්නේ කොහෙන්ද? ජෙරොම්ලට හිතෙන්න ඕනේ උසාවිය දැන් තමන්ගේ කියලා. එහෙම හිතෙන්නේ ඇයි? ඒ හයිය ඇවිල්ලා තියෙන්නේ මේ ආණ්ඩුව මූලික වශයෙන් බෞද්ධ විරෝධී නිසයි. අපි සමහර දේවල් විවෘතව කතා කරන්නේ නැහැ, කෙනෙක් ඒක ආගම්වාදය කියලා දකින්න පුළුවන් හින්දා. හැබැයි එළියට නිරාවරණය නොවූ ඕනෑ තරම් තීරණ තියෙනවා. 

ඊළඟට රණවිරු විරෝධී නැද්ද? ජනාධිපති වෙලා පළවෙනි විජයග්‍රහණ සමරුවේ රණවිරු උත්සවයට යන්නේ නැතුව ඉන්න හැදුවේ ජනාධිපති. බංකු බංකුව යවන්න හැදුවේ, ආරාධනා පත්‍ර තිබ්බේ බංකු බංකුගේ ප්‍රධානත්වයෙන් පවත්වනවා කියලා. සමාජයෙන් ආපු විරෝධය නිසා අකමැත්තෙන් ආවා. රණවිරුවා කියන වචනයවත් කිව්වේ නැහැ. ඒ විතරක් නෙමෙයි, ආපු දවසේ ඉඳලා මේ රටේ අභිමානවත් රණවිරුවාගේ ප්‍රතිරූපයට ගහලමයි පටන් ගත්තේ. මේජර් ජෙනරල් සලේලා අත්අඩංගුවට ගන්නවා, කරුණාගොඩලා උසාවි ගානේ ගෙනියනවා, උළුගෙතැන්නලා හිරේ දානවා, බුද්ධි අංශ ඇතුලට දානවා. චෙම්මනි මිනීවල රාජ්‍ය වියදමින් හාරලා මෙන්න සමූහ මිනීඝාතන කළා කියලා ලෝකෙට කියනවා. තව ඒ වගේ මිනීවලවල් දෙකක් තියෙනවා, ඒවත් හාරනවා කියලා අතුරුදහන් වූවන්ගේ කාර්යාලය කියනවා. 

ජනාධිපතිතුමාට ප්‍රධාන වශයෙන් “ඇලර්ජික් අවස්ථා” දෙකක් තියෙනවා. එකක් විජයග්‍රහණ සමරුව, දෙක සිංහල අලුත් අවුරුද්ද. ජයමංගල ගීතත් ඇලර්ජික්. පාර්ලිමේන්තු සභාවාරය පටන් ගන්න අවස්ථාවේ ජයමංගල ගීත අයින් කළා. කිව්වා. ඒකට යනවාලු එක්කෝටි විසිපස්දහසක් ජයමංගල ගීත කියන්න; ඒ විදියට අඩු කළා. IMF ඇලර්ජික් නැහැ, නොන්-ඇලර්ජික්. නේටෝ (NATO) එකත් එක්ක වැඩ කරන්න කැමතියි, ඒක නොන්-ඇලර්ජික්. දැන් එතකොට මේ ඔක්කොම එකතු කරලා බලද්දී පේන්නේ අරගලයේ තිබිච්ච විෂම මනසට අනුව ගොඩනැගුණු පාලනයක් නෙවෙයිද? මොනවාද සිස්ටම් චේන්ජ් කියලා කළේ? කරපු එකක් කියන්න. ඒ කාලේ කිව්වේ චොපර්වල යන්නේ නැහැ, පිටිපස්සෙන් ඇම්බියුලන්ස් යන්නේ මැරෙන්න යනවද කියලා. දැන් ඇම්බියුලන්ස් යනවා, චොපර් දෙක ගානේ යනවා. හඳුන්නෙත්ති අහනවා අනිත් අයට සර් කිව්වා නම් අපේ ජනාධිපතිතුමාට සර් කියන්නේ නැත්තේ ඇයි කියලා. 

දැන් මොකක්ද වෙලා තියෙන්නේ? වඩුනාගල පුදබිම අද බෞද්ධයාට තහනම් තැනක් වෙලා. බෞද්ධ ඓතිහාසික පුරාවිද්‍යාත්මක ස්ථාන හිතාමතාම හින්දුකරණය කරගෙන යනවා සුල් කල්ලියක්. අවුරුදු දහස් ගණනක් පැරණි දේවානම්පියතිස්ස රජ්ජුරුවෝ කරවපු යාපනය නාගදීපයේ හෝ අදාළ විහාරස්ථානවලට පෝය දවසට යන එක තහනම් කරලා. තිලීපන්ව මරපු අයව සමරනවා. දවස් හතරක සමුරු උත්සව පවත්වන්න ඉඩ දීලා පස්වෙනි දවසේ පොලීසිය ගිහින් ගලවගෙන ඇවිත් ආරක්ෂිතව තියාගෙන ඉන්නවා ඊළඟ අවුරුද්දේ දෙන්න. තිලීපන්ලා වීරයෝ ගානට දානවා. ලුතිනන් කර්නල් තිලීපන්... බිමල් රත්නායකලා, බිමල් රාජපක්ෂලා කියනවා දෙමළ ජනතාවගේ සංස්කෘතික නායකයෝ කියලා. බිමල්ට අනුව තිලීපන් කියන්නේ භරත නාට්‍යම් නටපු සංස්කෘතික නායකයෙක්. භරත නැටුම් නටපු කෙනෙක්. උතුරේ පාසල් දරුවන් ලවා චිත්‍ර අන්දවමින් මනසට විෂ පොවනවා. සලේලා ත්‍රස්තවාදීන් වෙනවා, තිලීපන්ලා වීරයෝ වෙනවා. 

එතකොට පේනවා අර විෂම උවමනාව, බෞද්ධ විරෝධය සහ රණවිරු විරෝධය අතින් අත යන හැටි. එක්තරා යූටියුබර් කෙනෙක් කියනවා මේජර් ජෙනරල් සුරේෂ් සලේ වගේ කෙනෙක් අත්අඩංගුවට ගන්න පුළුවන් වුණ එකෙන්ම මේ ආණ්ඩුව හදපු එකේ වටිනාකම තේරෙනවා කියලා. එක යූටියුබ්කාරයෙක් ඉන්නවා, මම කැමති නැහැ නමවත් කියන්න. ඔහු තව යූටියුබ්කරුවෙක් එක්ක ඉන්ටර්විව් එකේදී කියනවා "මම ජීවිතයට විශ්වාස කළේ නැහැ මේජර් ජෙනරල් සුරේෂ් සලෙයි වගේ කෙනෙක් අත්අඩංගුවට ගන්න පුළුවන් වෙයි කියලා. ඒකෙන්ම මේ ආණ්ඩුව හදපු එකේ වටිනාකම මට දැනෙනවා" කියලා. ඒ කියන්නේ මේ කොහොම මිනිස්සුද? ඒ කියන්නේ ගැබිනි අම්මලා කපපු යුගය ඉවර කරපු, බෙදුම්වාදී ෆැසිස්ට්වාදය ඉවර කරපු, තමන්ගේ ජීවිත අවදානම අරගෙන සටන් කරපු මිනිහෙක් අත්අඩංගුවට ගත්තාම ආණ්ඩුව මරු කියන්නේ මොන වගේ උන්ද? ඡන්දය දීපු 65 ලක්ෂයේ අභිලාෂයන් අතර ඒවා තිබුණද? නැහැ. 

දැන් බලන්න මේ ආර්ථික අර්බුදය ජය ගන්නවා කියලා දුන්න පොරොන්දු. හොරාකන පංගුව නතර කරපු ගමන් බඩු මිල බහිනවා කිව්වා. එනකොට දේශීය ණය රුපියල් ට්‍රිලියන 18.32යි, බිලියන 18 326යි. “අද රුපියල් ට්‍රිලියන 20.43යි, ට්‍රිලියන 2.11කින් වැඩි වෙලා”. දේශීය කෘෂිකර්මය, වී ගොවියා අස්වැන්න විකුණගන්න බැරුව හූල්ලන මට්ටමට ඇද දමලා. ඉන්දියාවෙන් හාල් ගෙනල්ලා මුළු වෙළඳපොළම පුරවලා. වී අස්වැන්න නෙළන උතුරු මැද පවා ඉන්දියානු හාල් විකුණනවා. බදු අඩු කරන්න ආපු අය අධ්‍යාපන, සෞඛ්‍ය, බෙහෙත් කිසි එකක වැට් අඩු කළේ නැහැ. බදු වැඩි කරලා වැඩි කරලා එක බද්දක්වත් අඩු කරලා නැහැ. 

ඒ අස්සේ බලු බද්දකුත් දාන්න යනවා. බල්ලෙක් හැදුවොත්, දැන් ඇමෙරිකාව වගේ රටවල තියෙන්නේ ලියාපදිංචි ගාස්තුව කියලා තමයි බද්ද ගන්නේ, අවුරුද්දකට පාරක්. බල්ලෝ දෙන්නෙක් හිටියොත් බද්ද දෙගුණ වෙනවා. සමහර රටවල ඔය බද්ද හදන්නේ බරට, බල්ලාගේ බරට. බල්ලාට හොඳට කන්න දුන්නොත් බද්ද වැඩි වෙනවා, බල්ලා නොකා හිටියොත් බද්ද අඩු කරගන්න පුළුවන්. මේ රටේ සතා සිව්පාවා, විශේෂයෙන්ම මේ බල්ලෝ හා පූසෝ වගේ සත්තු අපේ පවුල්වල මිනිස් ඇසුරේ, පවුල් ඇසුරේ ඉන්නේ. ඒක අපේ සංස්කෘතිය. අපේ ඉපැරණි ගොවියා වගා කළාම එක කොටසක් ඉතුරු කරනවා කුරුල්ලන්ට, "කූඹි පංගුවයි, කුරුළු පංගුවයි" කියලා. ඒක තමයි අපිට තිබිච්ච ශිෂ්ටාචාරය. සතා සිව්පාවා එක්ක අපිට ආරවුලක් තිබ්බේ නැහැ, කැලේ අයිති සතාට කියලා පිළිගෙන ජීවත් වෙච්ච සමූහයක්. දැන් අර යුරෝපීයයන්ගෙන් මේ හැමදේම දිහා බලන්න මුදලට බරවෙලා, බලු බද්දත් ගහනවා.

ඒ මදිවට සින්දු බද්දකුත් ගහන්න යනවා. මඟුල් ගෙදර සින්දු කිව්වත් සින්දුවෙන් සින්දුවට බද්ද වදිනවා. ලෝකයේ කොහෙවත් නැහැ මේ පෞද්ගලික උත්සවවල ගීත ගායනා කරනකොට ඒකට ගාස්තු ඉල්ලන ක්‍රමයක්. ටිකට් ගහලා, විකුණලා කරන ඒවට ඉල්ලන එක වෙනයි. මඟුල් ගෙදරට ටිකට් ගහනවාද? උපන්දින පාටියට ටිකට් ගහනවාද? ආදායම් උපදවනවාද? "බදු ගහන්නේ නැහැ" කියලා කියපු අය, අන්තිමට මඟුල් ගෙදර දාන්න වෙන්නේ අනුර කුමාරගේ පරණ කතාවක්; බයිලයක් කියලා හිතාගෙන අහගෙන ඉන්න පුළුවන්!

ඉතින් ඒ නිසා ආර්ථිකයේ කියපු දේවල් කිරීම කෙසේ වෙතත්, නිවැරදි අතට හරවන්න එක දශම එකක පියවරක් තියලා නැහැ. විදේශ විනිමය පනත සංශෝධනය කරන්න එක පියවරක් තියලා නැහැ. අපේ රටේ විදේශ විනිමය රටින් එළියට ගිහිල්ලා ඕන නම් තියාගෙන ඉන්න පුළුවන්, ගෙනාවේ නැහැ කියලා කාටවත් කරන්න පුළුවන් කෙංගෙඩියක් නැහැ. මාස තුනෙන් ගේන්න ඕනේ කියලා තිබ්බට, ඒක නොගෙනත් දඬුවම් දෙන්න බැහැ. ඒ නිසා උපදවන විදේශ විනිමය වෙන රටවල්වල පාර්ක් කරන්න පුළුවන්. විදේශ විනිමය අර්බුදයක ඉන්න රටක්! ඉන්දියාවේ නීතිය තියෙනවා, එහෙව් රටක් ඇයි ඒ නීතිය සංශෝධනය නොකරන්නේ? මාස තුනක් ඇතුළත ගෙන ඒම සහ නොගෙන ඒම අපරාධමය වරදක් හැටියට දකින්නේ නැත්තේ?

දැන් ඉන්නේ ඔය කවුද, හුළුගල්ල නේද? හුලංගමුව. හුලංගමුව කියන්නේ වාණිජ මණ්ඩලයේ සභාපතිනේ. ඔය විදේශ විනිමය කතන්දරයේ ඉන්න සංවිධානයේ කට්ටිය ඉන්නේ ගොඩක් ඒකෙනේ. ඉතින් ඒගොල්ලන්ට යන්තම්වත් අගතියක් වෙන තීරණ ගන්නේ නැහැ. අපේ සින්දුවටත් බද්ද ගැහුවාට.

ඊළඟට මහ බැංකුව ඉහළ ස්වාධීනත්වයකට ලක් කළා. ඒක වෙනස් කරලා, රජයේ අත්‍යවශ්‍යතාව මත මහ බැංකුව ක්‍රියාත්මක වෙන විදිහක් හදන්න හිතලවත් නැහැ. ඒ පනතට අත තියන්න හිතලවත් නැහැ, ඕනකමක් තියෙනවා කියලා පෙනෙන්නවත් නැහැ. අඩුගානේ වාමාංශික නෙවෙයි, මධ්‍යම වාමාංශික නෙවෙයි, දක්ෂිණාංශිකවත් රටට අත්‍යවශ්‍ය වෙලා තියෙන රැඩිකල් තීරණ එකක්වත් ගන්න ධෛර්යයක් පෙන්නලා නැහැ.

දැන් 2028 ඉඳන් බැඳුම්කර හිමියන්ගේ ණය ගෙවන්න පටන් ගන්නවා. අද අපි ගෙවනවා රටවල්වලට, ආයතනවලට ගත්තු ණයවල පොඩි වාරික. 28දී ඕකට එකතු වෙනවා පුද්ගලික ණය හිමියන්ගේ බැංකු පොලිය, ණය හා පොලිය. දැනට බිලියන තුනක්, තුනහමාරක් අවුරුද්දකට යනවා නම්, ඕකට තව තුනහමාරක් විතර අලුතෙන් එකතු වෙනවා. එතකොට අපේ විදේශ විනිමය ප්‍රවාහය මීට වඩා ශක්තිමත් නොවුණොත්, විදේශ විනිමය ගලා ඒම මීට වඩා ශක්තිමත් නොවුණොත්, දෙවන වතාවටත් ණය ගෙවීමට නොහැකි රටක් බවට හම්වඩුව ගසා ගැනීමේ අවදානම පාමුලයි අපි ඉන්නේ. ඒවා ගැන දැක්මක් නැහැ.

අද කර්මාන්ත දිරිගැන්වීමක් තියෙනවාද? විදේශ විනිමය උපයන්න දේශීය කර්මාන්ත දිරිගැන්වීමක් තියෙනවාද? ගෝඨාභයගේ පාලනය යටතේ මේ රට දේශීය නිෂ්පාදනවලින් ස්වයංපෝෂිත වෙලා තිබුණා. ඔය සීනි කර්මාන්තශාලා ලාභ ලැබුවා. අද ඒවා වහලා දාලා, බංකොලොත් කරලා.

අද MAS කියන ප්‍රධාන පෙළේ ඇඟලුම් සමාගම ඉන්දියාවට යනවා, විශාලම ඇඟලුම් නිෂ්පාදන ආයතනයක් වෙන MAS වියට්නාමයට යනවා, බංග්ලාදේශයට යනවා. මෙහේ පිරිවැය වැඩියි, නිෂ්පාදන පිරිවැය වැඩියි, දරාගන්න බැහැ, ලෝකයත් එක්ක තරග කරන්න බැහැ. “බ්‍රැන්ඩික්ස්” ඒගොල්ලන්ගේ ප්‍රධානම නිෂ්පාදන මධ්‍යස්ථානය ඉන්දියාවේ විශාඛාපට්නම්වලට අරගෙන ගියා, පිහිටෙව්වා. “හයිඩ්‍රාමණීලත්” යනවා. දැනටමත් සැලකිය යුතු කර්මාන්ත ප්‍රමාණයක් බංග්ලාදේශයට, වියට්නාමයට හා ඉතියෝපියාවටත් යනවා බලශක්ති පිරිවැය වැඩි නිසා. දැන් ගොඩක් සෙරමික් කර්මාන්ත ශාලාවල අය එක්කෝ ඉන්දියාවේ ෆැක්ටරිය හදනවා, නැත්නම් ඉන්දියාවේ හදපු සෙරමික් ගෙනල්ලා මෙහේ විකුණනවා; බ්‍රෑන්ඩ් නේම් එක විතරයි මෙහේ, ප්‍රොඩක්ට් එක ඉන්දියාවේ.

ප්‍රධාන පෙළේ තොරතුරු තාක්ෂණ හා මෘදුකාංග සමාගම් රැසක්, මේ ගහපු අලුත් බදු නිසා ඒගොල්ලන්ගේ ප්‍රධාන කාර්යාල ලංකාවේ තිබිච්ච ඒවා ගලවාගෙන ඩුබායිවලට අරගෙන යනවා. එහෙම නැත්නම් සිංගප්පූරුවට, ඇමෙරිකාවට ගෙනියනවා. රාශියක් නිෂ්පාදන, මෙහෙයුම් පිරිවැය අවම කරන්න වියට්නාමයට යනවා, තායිලන්තයට යනවා. කර්මාන්ත දිරිගන්වන ප්‍රතිපත්තියක් නැහැ, කර්මාන්ත බලගන්වන ප්‍රතිපත්තියක් නැහැ, බලශක්ති පිරිවැය අවම කරන ප්‍රතිපත්තියක් නැහැ.

සුනෙත්ය විදුලියට දැන් මොකද කරන්නේ? සෝලාර්වලින් ගෙදර සෝලාර් ටික වහලේ සවි කරගෙන, තමන් පරිභෝජනය කරලා විදුලිය උපදවලා, අතිරික්තය විදුලිබල මණ්ඩලයට විකුණලා කීයක් හරි ගත්තු මිනිහා, දැන් ඒ ක්‍රමය නවත්තන්න යනවා නොවැම්බර් මාසේ පළවෙනිදා. ආකාර තුනක් තිබුණා සෝලාර් වහල මත සවි කරගත්තු අයට තෝරාගන්න. එකක්, නෙට් මීටරින් (Net Metering). උපදවනවා, තමන් පාවිච්චි කරනවා, වැඩි ටික ඊළඟ මාසේ බිලට එකතු වෙනවා; වැඩි විදුලි පිරිවැය එහෙම යනවා, මුදල් ලැබෙන්නේ නැහැ. ඇකවුන්ටින් (Net Accounting) කියන්නේ ඊළඟ ක්‍රමය. ඒක තමයි ජනනය කරනවා, තමන් පරිභෝජනය කරනවා, ඉතුරු ටික මණ්ඩලයට විකුණනවා, සල්ලි අතට ලැබෙනවා. ඒ ක්‍රමයත් නැහැ. දැන් ඉතුරු වෙන්නේ නෙට් ප්ලස් (Net Plus) විතරයි. සැප්තැම්බර් ඉඳන් ගිවිසුම්ගත වෙන අයට, මේ ගිවිසුම් අලුත් වන කරන වෙලාවට ඒ ක්‍රමය විතරයි ඉතුරු වෙන්නේ, නෙට් ප්ලස් කියන ක්‍රමය. ඒ නිසා නෙට් ප්ලස් කියන්නේ ගෙදර පරිභෝජනයට බැහැ. උපදවන ටික මණ්ඩලයට දෙනවා, ගෙදර විදුලි බිල තමන් ගෙවනවා.

මෙගාවොට් දෙදහසක පමණ පද්ධතියක් පද්ධතියට අද විදුලිය ලැබෙනවා මේ සෝලාර් පැනල්වලින්. මේ කරන්නේ මොකක්ද? ගෙදර වහලේ සෝලාර් හයි කරගෙන, තමන්ගේ විදුලි බිලත් ඒකෙන් ආවරණය කරගෙන, අතිරික්තය විදුලිබල මණ්ඩලයට දීලා කීයක් හරි හොයාගන්න තිබිච්ච අවස්ථාව, මේ රටේ වහලවල් මත සෝලාර් පැනල් හයි කරලා විදුලිය උපදවන්න මිනිස්සුන්ට තිබුණු උනන්දුව නැති කරනවා. මේ ආණ්ඩුව ආපු ගමන් බදු වැඩි කළා පැනල්වලට. බදු වැඩි කරලා අධෛර්යයට පත් කළා ඒ ව්‍යාපෘතිය.

දැන් මේ ඔක්කොම කරන්නේ මොකටද? බාල ගණයේ අඟුරු ගෙනල්ලා, අද ගිණුම් විගණන වාර්තා ඇවිල්ලා තියෙනවා, නැව් දෙකක බාල ගල්අඟුරු. එක පැත්තකින් බාල ගල්අඟුරු, අනිත් පැත්තෙන් ප්‍රමාණය - නැව් දෙකක් නැහැ, නැව් දෙකක ප්‍රමාණය නැහැ! මේකෙන් පෙනෙනවා අද බලශක්ති ක්ෂේත්‍රය තමන්ගේ ධනය හොයන, යටිමඩියන් හොරකම් කරන තැනක් බවට පත් කරගෙන තියෙනවා. අවුරුදු දෙකක් යනකොට ජයකොඩි ඇමතිට ඉල්ලා අස් නොවී බැරි වුණා, ඒ තරමටම හොරකම එළියට පැන්නා. හොරු අල්ලන්න ආවේ, ඒ තරමටම හොරකම එළියට පැන්නා. රෙදි ගැලවෙන මට්ටමට හොරකම එළියට ආවා. අන්තිමට අනන්තය දක්වා ගල්අඟුරු ටෙන්ඩර් ගැන හොයන්න කොමිසමක් දාලා ජයකොඩිව අයින් කරගත්තා.

හැබැයි අද ඒ නිසා මේ රටේ විදුලි පාරිභෝගිකයා, ඩීසල්වලින් උපදවන විදුලියට විදුලි අයට ගෙවනවා. එක ඒකකයකට රුපියල් 200 ගානේ ගෙවනවා, 200 ගණනක් ගෙවනවා. දැන් මේ සෝලාර් පැනල් එකටත් වැඩේ දෙනවා. සෝලාර් කියලා කියන්නේ, ප්‍රගතිශීලී ආණ්ඩුවක් නම් - වාම වෙන්න ඕනේ නැහැ, ප්‍රගතිශීලී නම් - ප්‍රවර්ධනය කරන්න ඕනේ. හැම වහලකටම පැනලයක් ගේන මට්ටමට ඒක ප්‍රවර්ධනය කරන්න ඕනේ. 

අද ඉලෙක්ට්‍රික් වාහන තමයි ලෝකයේ ප්‍රධාන පෙළේ වාහන. ජර්මනියේ පහුගිය අවුරුද්දේ වැඩියෙන්ම අලෙවි වෙලා තියෙන්නේ ඉලෙක්ට්‍රික් වාහන. චීනය අද ලෝකය පුරාම ප්‍රවර්ධනය කරන්නේ විදුලි වාහන. ඒ ප්‍රවණතා කිසිවක් ගැන අවධානයක් නැතුව, තියෙන සෝලාර් පැනල් එකත් වහලෙන් ගලවලා කාමරයක් ඇතුළට දාගන්න වෙන ඉරණමකට ඇද දමනවා.

මෙහෙම ආණ්ඩුවක්ද මේ රටේ 65 ලක්ෂයක් පතාලා තෝරාගත්තේ? ප්‍රගතිශීලීත්වය ගෑවිලාවත් තියෙනවා නම්, ආර්ථික තලයේ, බලශක්ති තලයේ මේ නරුම පියවර ගන්න පුළුවන්ද? ඒ නිසා අපි මේවා තේරුම් ගන්න ඕනා. දැන් මේකෙන් වෙන්නේ අර ඉතුරු වෙන ක්‍රමයට මහා පරිමාණ සෝලාර් හයි කරලා විදුලිය මණ්ඩලයට දෙන සමාගම්වලට හොඳයි. දැන් ඔය ධම්මිකගේ හේලීස් (Hayleys) වගේ අය ඒ ව්‍යාපාරයේ ඉන්නවා. 

මට නඩු තුනක් දාලා තියෙනවා, හේලීස් එකෙන් දෙකයි, තව මොකක්ද සමාගමකින් එකයි. ඒකේ එක ඉල්ලීමක්, අපේ හාමුදුරුවනේ, "එහෙම සමාගමේ නාමයට කැලලක් වෙන විදිහට අදහස් පළකිරීමෙන් වලකින්න" කියලා. මම දැන් මුකුත් කීර්තිනාමයට කැලලක් වෙන දෙයක් කිව්වේ නැහැ, මම කිව්වේ ඒගොල්ලොත් ඒ ව්‍යාපාරයේ ඉන්නවා කියලා. නැත්නම් මේ දවස්වල කට වරද්දා ගන්නකල්නේ බලන් ඉන්නේ.

එතකොට ලොකු සමාගම්වලට නෙට් ප්ලස් ක්‍රමය හොඳයි. පොඩි උන් ටික නැත්තටම නැති කරලා, සුනෙත්ය විදුලි බලයත් ලොකු සමාගම් ටිකට කොටු කරගන්න එක තමයි මේ උපායමාර්ගයේ උවමනාව. මෙන්න මොකක්ද අර සින්දුවේ තිබ්බේ? අනුරගේ තේමා ගීතය මතකද? "එක මිටකට සෝල් ධම්මිකට!” ඊළඟට දැන් මේවට තමයි අපේ පැරණි මිනිස්සු කිව්වේ "කටින් මීපැණි, හදවතින් මිරිස් පැණි" කියලා. ගමේ ගොඩේ අය කිව්වේ එහෙමයි.

ලෝක බැංකු වාර්තාවක් පිටවුණා මේ ඊයේ පෙරේදා. දුප්පත්කම 65% දක්වා වැඩිවෙලා ජනගහනයෙන්. රැකියාවිරහිතභාවය 43% දක්වා වැඩිවෙලා; තරුණ ප්‍රජාවගේ රැකියා විරහිතභාවය 35%යි. මේවාට ආමන්ත්‍රණය කරන්න, මේවා අඩු කරගන්න මොකක්ද තියෙන උපායමාර්ගික සැලැස්ම? කොහෙද මොකක්ද පෙනෙන්න තියෙන්නේ? කෝ කතාවක්?

නගිනවා ස්ටේජ් එකට, "4G ටවර් 10ක් දානවා" කියනවා. ආණ්ඩු මොකටද 4G ටවර් දාන්නේ? ඒවා දාන්නේ... දැන් මේ ෂේප් එකේ එන්නේ ඩයලොග් (Dialog) එකේ කණු ටික අපේ සල්ලියෙන් ගහලා දෙන්න. අනෙක මේ රටේ හිටපු ජනාධිපතිවරු 4G කණු හිටවන ඒවා, 5G කණු හිටවන ඒවා වේදිකාවල කිව්වේ නැහැ. ඒවා හිටෙව්වා; මොකෝ ඒවායේ ගෙඩි හැදෙන්නේ නැහැනේ.

දැන් මේ ආර්ථිකයේ ප්‍රධාන තැන්, ප්‍රධාන මර්මස්ථාන ප්‍රශ්න - 65%ක් දුප්පත්කමේ රේඛාවෙන් පහළ, රැකියා විරහිතභාවය 43%යි, තරුණ රැකියා විරහිතභාවය 35%යි. මේවට ආමන්ත්‍රණය කරනවාද? සැලැස්මක් පෙනෙනවාද? කිසිවක් නැහැ, මුකුත් කොහෙවත් පෙනෙන්න නැහැ.

වාමාංශික වෙස්ගෙන අන්ත-ලිබරල් ප්‍රතිපත්තිය කරේ තියාගෙන යනවා. ඉන්දියානු ව්‍යාප්තවාදය ගැන කතාව විතරක් දොඩවලා, අද ව්‍යාප්තවාදය ජනනය කරන නියෝජිතයන් බවට පත්වෙලා ක්‍රියා කරනවා. ගිවිසුම් හතක් ගැහුවා, රටම දන්නේ නැහැ! පරමාධිපත්‍ය බලය හිමි ජනතාව දන්නේ නැහැ ඉන්දියාවත් එක්ක ගැහුව ගිවිසුම් හත මොනවාද කියලා. හොඳ නම් පෙන්නන්න බැරිකමක් නැහැනේ?

ඉන්දියානු පාමකොපියා එකට ප්‍රමිතිය බැස්සුවා අපේ ඖෂධ වෙළඳපොළේ. ප්‍රමිතියෙන් ඉහළ, දැනට වෙළඳපොළේ තියෙන ගුණාත්මක වශයෙන් දියුණු බෙහෙත් වෙළඳපොළෙන් එළියට විසිවුණා. ඉන්දියානු බාල බෙහෙතට මාකට් එක ඕපන් වුණා. ඒ විදිහට තමන් පෙනී සිටපු ප්‍රතිපත්ති සහ උපායමාර්ග නොසලකා හැරලා, ඒවා තඹ දොයිතුවකට සලකන්නේ නැතුව, ඊට සම්පූර්ණයෙන්ම ප්‍රතිවිරුද්ධ වූ ගමනක යනවා නම් ඒකට කියන්න වෙන්නේ "රෑ බණ කියලා දවල් කුකුළන් හොරකම් කරන්න යනවා" වගේ කියලා තමයි. වේදිකාවේ කියන බණයි, දවල් භාවිතාවයි සම්පූර්ණයෙන්ම දෙකක්.

දැන් මේ දවස්වල රනිල්ගේ, ටින් (TIN) නම්බර් එකත් නැතුව බැලූනේ... කඩේට ගියත් ටින් නම්බර් එක කියන්න ඕනේ. ටින් නම්බර් එක දානකොට පාරේ පෙළපාලි ගිය JVP එක, ඒ මට්ටමටම ප්‍රතිපත්ති විරහිත දේශපාලනයේ, ප්‍රතිපත්ති විරහිතභාවයේ, තමන් කියූ දේට පටහැනිව ක්‍රියාත්මක වන නග්නම දේශපාලන භාවිතාවක අද නියැලෙනවා.

මම මේ කතා කළේ ආර්ථික පැත්ත. දේශපාලන සදාචාරය "නිර්ප්‍රභූන්නේ" මේ ගත්තයි කියන්නේ. දැන් නිර්ප්‍රභූද, ප්‍රභූද? දැන් චොපර් දෙක යනවා. මේවා අපිට ප්‍රශ්න වෙලා තිබ්බේ නැහැ කවදාක්වත්. රාජ්‍ය නායකයා යන්න ඕනේ චොපර් දෙකෙන් තමයි; චොපර් දෙකක් යනවා ඕනෑම රටක අඩුම තරමින්. රාජ්‍ය නායකයා ඉන්න ඕනේ... දැන් මේ රාජ්‍ය නායකයා දෙයියනේ පාරේ ගිහිල්ලා පැය පහක් ගෙවන්න ඕනේ නැහැ. පැය භාගයෙන් ඒ ගමන ගිහිල්ලා ඇවිල්ලා, ආයෙත් විවේකගෙන ඊළඟ වැඩසටහනට සම්බන්ධ වෙන්න පුළුවන් නම්, රාජ්‍ය නායකයා එහෙම වෙන්න ඕනේ. මේගොල්ලෝ කිව්වේ එහෙම නෙවෙයිනේ?

ආරක්ෂක මුරත් යනවා, දැන් ඇම්බියුලන්ස් එකත් යනවා. ඉස්සර කිව්වේ "අර නාකි ගෝඨා මගදී මැරෙයි කියලා හිතලා යනවා ඇම්බියුලන්ස් එකේ" - එහෙමයි කිව්වේ! පාර්ලිමේන්තු කැන්ටීනයේ වාර්තාගත ආහාර වියදම්. ආහාර සඳහා මම දැක්කා කවුද මන්ත්‍රීතුමෙක් කියනවා "කනවා විතරක් නෙමෙයි, එකා බැඳගෙන ගෙදරත් ගෙනියනවා" කියලා.

"හඳුන්නෙත්ති අහනවා ඇයි අපේ ජනාධිපතිට 'සර්' කියන්න බැරි කියලා. කන්ටේනර් 323ක් ගියා. ගියාමයි, මොනවා වුණාද කියලා දන්නේ නැහැ.

අයිස් කන්ටේනර් එකක් හම්බවුණා. රන්මල් කොඩිවකුලා ගිහිල්ලා වටලව්වා. වටලලා සම්මාන දීලා වෙනකොට, වටලපු අයට විරුද්ධව පරීක්ෂණයක් පටන් ගත්තා. ඇයි? ඒකෙන් තේරෙනවා, ඒ අයිස් කන්ටේනර් එකේ අයිස් තිබිලා අහුවුණා නම්, අර 323 අයිස් තියෙන්න බැරිද කියන ප්‍රශ්නය සමාජය තුළ නිතැතින්ම පහළ වුණා.

දැන් අල්ලන අල්ලන කොට බඩු නැත්තේ නැහැනේ. දන්න කියන ඔය සමහර තැන්වල වැඩට ඉන්න අය අයිස් ගහනවා. මම ඒ හාමුපුතාලගෙන් එහෙම ඉන්න අයගෙන් අහනවා උන්ට අඩුවක් එහෙම තියෙනවද කියලා. හාමුපුතාලා දන්නවා මුන් අයිස් ගහනවා කියලා. මොකද යක්කු වගේ වැඩ කරන හින්දා හාමුපුතාලත් ඒකට ඉඩදීලා තියෙනවා. කිසිම අඩුවක් නැහැ.

ඒකෙන් පේනවා පටන් ගත්තෙම සුද්ධයකින්. බලයට ඇවිල්ලා හුස්ම ගන්න යන්න කලින් පටන් ගත්තේ සුද්ධයෙන්. බලාගෙන යනකොට වෙළෙඳ අමාත්‍යාංශය අක්‍රමිකතා මගඩි තිප්පොළක් බවට පත්වෙලා තියෙනවා.

ඊළඟට බලන්න මේ දූෂණ විරෝධී පනතට ගෙනාපු සංශෝධනය. ඒකේ 11 වෙනි වගන්තියේ කලින් පනතේ තිබ්බේ, අපේ හාමුදුරුවනේ, කෙනෙක්ගේ වත්කම් බැරකම් ප්‍රකාශයක් ඕනෑම කෙනෙකුට ඉල්ලලා ගන්න පුළුවන්. ඒක ගැන සාකච්ඡා කරන්න පුළුවන්.

මෙන්න දූෂණ විරෝධී අනුර කුමාරගේ පාලනය මේ 11 වෙනි වගන්තියට සංශෝධනයක් ගේනවා; ඒක ගන්න පුළුවන්, හැබැයි ඒක ප්‍රසිද්ධ කරන්න බැහැ! ඒක අරන් ගිහිල්ලා පැමිණිල්ලක් කරන්න පුළුවන් ඒගොල්ලෝ කියන ආයතනවලට. ඇයි ප්‍රසිද්ධ කරන්න බැරි?

අර වත්කම් බැරකම් ටික ආවේ එකපාරට චන්ද ප්‍රතිඵලය එනවා වගේ. ක්‍රිප්ටෝ කරන්සි තිබිලා තිබ්බේ. විජිත හේරත් ඇමැතිතුමාට තියෙනවා ලංකාවේ අඩුම මිලට ගත්තු ලොකුම ඉඩමක්, ගොඩනැඟිල්ලකුත් එක්ක. ඒවා හෙළි වෙනවා. පරණ ප්‍රභූන්ගේ ඒවා ඕකේ හෙළි වුණාට කමක් නැහැ, නිව් ප්‍රභූන්ගේ වත්කම් වැඩි වෙන හැටි උඹලා දැනගන්න ඕනේ නැහැ! ඒ ගැන උඹලට සාකච්ඡා කරන්න බැහැ! ඒ ගැන මුහුණු පොතේ දාලා කතා කරන්න බැහැ! අන්න නිව් ප්‍රභූන්ගේ වත්කම් වැඩිවීම වහගත්තා.

එතකොට පේනවා මේ දූෂණ විරෝධය කියන්නේ ඒගොල්ලොන්ගේ බොරු කටගැස්මක් විතරයි. ඒක අවංක චේතනාවෙන් නිසඟයෙන් තමන් තුළින් පැනනැගි දෙයක් නෙවෙයි. තමන් ඇතුළු කල්ලිය කරන හොරකම වහගන්නයි, හොරකම් කරා කියන චෝදනාව, ලේබල් එක ගහලා දඬුවම් කරන්නයි පුළුවන් වෙන විදියේ පිටියක් නිර්මාණය කරගන්න එක තමයි ඔවුන්ගේ මේ උවමනාව.

දැන් 22 වෙනි සංශෝධනය මහා දවල් අලුත්කඩේ අධිකරණ සංකීර්ණය පැත්තට ගෙනාවා. දැන් වසන්ත සමරසිංහ, මහින්ද ජයසිංහ, රංජන් ජයලාල්ගේ නඩුව තිබුණා ගල්කිස්ස උසාවියේ, වෘත්තීය සමිති ගොඩනැඟිල්ලක් බලහත්කාරයෙන් අත්පත් කරගෙන. ඒ නඩුව අහඅහා හිටපු විනිසුරුතුමිය අන්තිම වරට නියෝග කළා පොලීසියට වහාම ප්‍රකාශයක් අරන් ඉදිරිපත් කරන්න කියලා. ඊළඟ නඩු දිනේ වෙනකොට ඒ විනිසුරුතුමිය වෙන තැනකට මාරු වෙලා! මාරු කළාට පස්සේ අර නියෝග ආවේ නැහැ. ඉතින් වසන්ත සමරසිංහලා, මහින්ද ජයසිංහලා, රංජන් ජයලාල්ලා ඒ අතින් හරිම වාසනාවන්තයි.

22 වෙනි සංශෝධනයෙන් අධිකරණයේ ඉතුරු වෙලා තිබුණා නම් යම්කිසි ස්වාධීනත්වයක්, ඒකත් නැත්තටම නැති කළා.

මේගොල්ලෝ ඉල්ලන්නේ රාජ්‍ය බලය. 2024 මහ මැතිවරණයෙන් රටේම බලය දුන්නා මිනිස්සු 61.56%ක්. රාජ්‍ය සේවකයෝ විතරක් තැපැල් ඡන්ද දුන්නා 70.38%ක්. ඉතින් රාජ්‍ය සේවකයාගේ කැමැත්තනේ රාජ්‍ය බලය කියලා ඔය හිතන්න ඕනේ. රාජ්‍ය සේවකයෝ 70.38%ක් ඡන්දය දීලා නම්, ඡන්දය දෙන අවස්ථාවේ රාජ්‍ය සේවකයෝ ඉඳලා තියෙන්නේ මේගොල්ලොත් එක්කනේ. තව මොකටද රාජ්‍ය බලයක්? ඇයි මේ තව මොකටද රාජ්‍ය බලයක් ඉල්ලන්නේ?

තමන්ගේ නියෝගයට, විධානයට වැඩ කරන්න ඕනේ. විනිසුරුවරු තමන් කියන විදිහට නඩු තීන්දු දෙන්න ඕනේ. පරිපාලන සේවය තමන්ගේ නියෝගවලට අනුව ක්‍රියාත්මක වෙන්න ඕනේ. එහෙම නොවුණොත් දඬුවම් ලබන්න ඕනේ. බිය පතුරුවන්න ඕනේ. මෙච්චර බලයක් ලැබිලා, තුනෙන් දෙකකුත් ලැබිලා, ජනාධිපති බලයත් ලැබිලා, ආයේ මේ රාජ්‍ය බලයක් ඉල්ලන්නේ මොකටද? කෝඳුරු තෙල් හත්පට්ටයකුයි තව චුට්ටකුයි ඉල්ලන්නේ මොකටද? මොකක්ද ඒකේ අරමුණ?

මේගොල්ලෝ ඊළඟට අතට ගන්නේ මැතිවරණ කොමිෂන් සභාව. දැන් ඉන්න කොමසාරිස්ලාගේ කාලසීමාව අහෝසි වෙනකොට ඒකත් සම්පූර්ණ ජේ.වී.පී.කරණයට භාජනය කරනවා. 'හොරු වළනවා' කියමින් ඊළඟට කරන්නේ ප්‍රජාතන්ත්‍රවාදය වළලන එක. තමන්ට දේශපාලන වශයෙන් අභියෝගයක් විය හැකි සියලුම ප්‍රතිවිරුද්ධ දේශපාලනඥයන් කුමන හෝ චෝදනාවකට ගොනු කරලා හිරේට දමනවා. දැන් අල්ලස් හෝ දූෂණ විමර්ශන කොමිෂන් සභාවේ සභාපතිට පුළුවන්... ඒ කියන්නේ එතුමා එකවර දෙන්නෙක්ව අත්අඩංගුවට ගත්තා කියමුකෝ එකම හා සමාන වරදකට, චෝදනාවකට.

එක්කෙනෙකුට එයාගේ සහතිකය දෙන්නේ නැහැ, එක්කෙනෙකුට එයාගේ සහතිකය දෙනවා. උසාවියට යවන්නේ ඒ සහතිකය එක්ක. ඒ සහතිකය දුන්නොත් මහේස්ත්‍රාත් අධිකරණයට බලයක් නැහැ සුවිශේෂී හේතුවක් නැතුව ඇප දෙන්න. දැන් එකම දේට අත්අඩංගුවට ගත්තා ජොන්ස්ටන් සහ නාමල් රාජපක්ෂ. ජොන්ස්ටන් උසාවියට ගෙනිච්චේ සහතිකය නැතුව, ඇප හම්බුණා. නාමල් උසාවියට ගෙනිච්චේ සහතිකය ඇතුව. කොහොමද සහතිකය යෙදෙන විදිහ? එතුමාගේ චිත්ත අභ්‍යන්තරය තුළට ඒ වෙලාවේ කොහෙන් හෝ දෙන අධ්‍යාත්මික දේව පණිවිඩයකින් වෙන්න ඕනා ඒ තීරණය ගන්නේ!

දැන් රවී කරුණානායක මිසින්නේ 22 සංශෝධන ඡන්දෙ... රවී කරුණානායකව ගත්තනේ, අර සේවකයෝ කිහිපදෙනෙක් එයාගේ වැඩවලට ගත්තා කියලා වැටුප් සහිතව, මොකක්ද ලොතරැයි මණ්ඩලයේ. එයාව උසාවියට දැම්මේ සහතිකය නැතුව, එතකොට ඇප. අනිත් අය උසාවියට දාන්නේ සහතිකය ඇතුව, එතකොට ඇප නැහැ. මෙන්න මෙතැනට, මෙතැනට මේ මර්දනකාරීත්වය වැදීගෙන එනවා. ඒ නිසා මේ 22 වෙනි සංශෝධනයෙන් පස්සේ ඇත්තටම NPP කියන්නේ, මට අනුව 'නියෝ පොල්පොට්' එකක්. P එකක් 'පොල්', අනිත් P එක 'පොට්'.

දැන් බලන්නකෝ, ඒ ජාතික ජන බලවේගයේ ප්‍රතිපත්ති ප්‍රකාශනයේ දෙවසරක ප්‍රගති සමාලෝචනය කරන රැස්වීමක් තියෙනවා පැෆරල් එකෙන්. අපේ හාමුදුරුවනේ, ස්වාධීනයි කියන අල්ලස් හෝ දූෂණ විමර්ශන කොමිෂන් සභාවේ අධ්‍යක්ෂ ජෙනරාල් යනවා ඒ මාලිමාවේ ප්‍රතිපත්ති ප්‍රකාශනයේ ප්‍රගතිය හොඳයි කියලා කියන්න. එතකොට කොහොමද එතුමා ස්වාධීන වෙන්නේ?

"නැහැ නැහැ, වැඩ කරලා තියෙනවා. ඕක ඔහොම කියලා හරියන්නේ නැහැ. විධායක ජනාධිපති ක්‍රමය ගැන මෙහෙමයි මෙහෙමයි" කියලා එහෙම කතා කරන්න පුළුවන්ද? ඒ පෙන්නන්නේ නැද්ද පක්ෂපාතීත්වය? පක්ෂපාතීත්වයට ස්වාධීනයි කියලා ලේබල් ගහලා මර්දනය දියත් කරන එක තමයි අද අනුර කුමාරගේ එකම සහ අවසාන ක්‍රමය වෙලා තියෙන්නේ. එහෙම කරන්නේ බලවත් තරඟකාරයෙක් නැති දේශපාලන පිට්ටනියක් නිර්මාණය කරගන්න. එහෙම කරලා ඊළඟ වටයත් කොහොමහරි දිනාගන්න.

ඒක විතරක් නෙවෙයි, ඒකත් එක්ක බැඳුණු තව වැඩක් තියෙනවා. මේ යන්නේ සිංහල සමාජයේ ප්‍රතිවිරෝධතාවය නොසලකා හරින පාලනයක්. ඊළඟ සැලැස්ම තමයි - දැන් ඔය ටික ටික පේන්නේ - තිස්ස විහාරයට යන බෞද්ධයන්ට පෝය දවසට එන්න එපා කියන්නේ, වඩුනාගල බෞද්ධ පුරාවිද්‍යා ස්ථානය හින්දුකරණයට ලක් කරන්නේ, චෙම්මණි මිනීවල හාරලා සමූහ මිනීඝාතන කළා කියලා ලෝකෙට පෙන්නන්න යන්නේ, යාපනය නගර සභාවේ මාලිමා මන්ත්‍රීවරු හිටගෙන තිලීපන්ගේ පින්තූරය තියලා විනාඩියක නිශ්ශබ්දතාවය තියලා සමරන්නේ, ධීවර ඇමති රාමලිංගම් චන්ද්‍රසේකරන් තිලීපන්ගේ පිළිමය ගාවට ගිහිල්ලා හිටගෙන ඉන්නේ...

ඒ විතරක් නෙවෙයි, දැනටමත් නීතියේ ආදිපක්‍යය උතුරට සහ නැඟෙනහිරට බිලිදීලා තියෙන්නේ. මඩකලපුවේ සිංහල ජනයා පන්නා හරින සානක්‍යන්ලා වැඩ බයක් නැතුව කරන්නේ, මහවැලි අධිකාරිය අවසර දීලා නැහැ වැස්ස වැටුණට පස්සේ සිංහල මිනිස්සුන්ට වගා කරන්න. සානක්‍යන් කියනවා ඒවා කිරි දෙන එළදෙනුන්ට, හරක්ට වෙන් කරපු ප්‍රදේශ කියලා. දැන් කිරි එළදෙනුන්ට, හරක්ට තැන තියෙනවා, සිංහල මිනිහට එතැන තැන නැහැ!

ඒ විතරක් නෙවෙයි, දැන් හමුදා කඳවුරුත් එක එක ගලවාගෙන එනවා. මේවා ගැන කතා කරන්න එක මිනිහෙක් නැහැ පාර්ලිමේන්තුවේ. සානක්‍යන් නැගිටලා සිංහල මිනිහව මඩකලපුවෙන් එළවන්න කතා කරනකොට, ඒකට ප්‍රතිචාර දක්වන්න එක මිනිහෙක් නැහැ පාර්ලිමේන්තුවේ. දැන් අන්තිමට ඉවත් කරන්න නියමිතව තියෙන්නේ පලාලි ගුවන්හමුදා, යුද හමුදා ඒකාබද්ධ මූලස්ථානය. ඒක කරන්නේ 'පලාලි ගුවන්තොටුපළ ජාත්‍යන්තර ගුවන්තොටුපළක් බවට පරිවර්තනය කරන්න මේක බාධාවක්' කියන තර්කය ඉස්සරහට දාලා.

දැනටමත් කොටි සංවිධානය යෝජනා කරලා ඉවරයි, "රහසිගතව පලාලි යුද හමුදා මූලස්ථානය ගලවලා අයින් කරනවා නම් අපි ලෑස්තියි සල්ලි අරගෙන ඇවිල්ලා ජාත්‍යන්තර ගුවන්තොටුපළ හදන වැඩේට සල්ලි ආයෝජනය කරන්න." මේ වැඩ ටික කරගෙන යන්න ඕනේ. ඊට පස්සේ තව වැඩ ටිකක් තියෙනවා. මහවැලි අධිකාරිය අහෝසි කරන්න ඕනේ. මහවැලියට අයිති ඉඩම් ටික ප්‍රාදේශීය ලේකම්ගේ බලය යටතට පත් කරන්න ඕනේ.

විහාර දේවාලගම් පනත අහෝසි කරන්න ඕනේ හෝ සංශෝධනය කරන්න ඕනේ. ඒ පනතට අයිති උතුරේ සහ නැඟෙනහිර තියෙන භූමිය ක්‍රමානුකූලව ප්‍රාදේශීය ලේකම්ට අත්පත් කරගන්න ඉඩ හදලා දෙන්න ඕනේ. පුරාවිද්‍යා පනත අහෝසි කරලා ජාතික සංස්කෘතික උරුමයන් සුරැකීමේ පනතක් ගේන්න ඕනේ. ඒ පනතෙන් මේක විමධ්‍යගත විෂයක් බවට පත් කරන්න ඕනේ. එතකොට උතුරු පළාත් සභාව තමයි, උතුරු පළාත් පුරාවිද්‍යා ප්‍රඥප්තිය තමයි එහේ නීතිය වෙන්නේ.

මේ ටික කරගෙන යන්න ඕනේ. ඒ ඔක්කොම කරලා, පොලිස් බලතල ඔක්කොම දීලා, උතුරෙයි නැඟෙනහිරෙයි පමණක් පළාත් සභා ඡන්දය තියන්න ඕනේ. ඡන්දය තියලා දිනන මහඇමතිට අනුකූල ආණ්ඩුකාරයෙක් පත් කරලා දෙන්න ඕනේ.

එතකොට පොලිස් ප්‍රඥප්තිය ගේන්න ඕනේ, ආණ්ඩුකාරයා අත්සන් කරන්න ඕනේ. ඉඩම් ප්‍රඥප්තිය ගේන්න ඕනේ, ආණ්ඩුකාරයා අත්සන් කරන්න ඕනේ. පුරාවිද්‍යා ප්‍රඥප්තිය ගේන්න ඕනේ, ආණ්ඩුකාරයා අත්සන් කරන්න ඕනේ. ඒවට විරුද්ධව උසාවියට යන්නත් බැහැ. පාර්ලිමේන්තු පනතකට විරුද්ධව දවස් කිහිපයකට කලින් උසාවි යන්න පුළුවන් වුණාට මේවට බැහැ. අභියෝගයකින් තොරව ඒ සියලු පළාත් ප්‍රඥප්ති සම්මත කරගෙන යනවා. ඊට පස්සේ රජයේ නීතියයි, පළාත් ප්‍රඥප්තිවලින් හැදෙන නීතියයි අතර ගැටීම් ඇතිවෙන්න පටන් ගන්නවා. ගැටීම් එනකොට මධ්‍යම රජයට තව තව අකුළගන්න සිද්ධ වෙනවා.

ඔබතුමන්ලා දකින්න ඇති, වඩුනාගල පුරාවිද්‍යා භූමියට ඇවිල්ලා ඒ හින්දු අන්තවාදීන් කිහිපදෙනෙක් ඇවිල්ලා පොලීසියට දාන සද්දේ. පොලීසිය හා පැටව් වගේ ඉන්නවා. දැනටමත් එහෙම නම්, පොලිස් ප්‍රඥප්තිය පනවනවා, ඉඩම් ප්‍රඥප්තිය පනවනවා, පුරාවිද්‍යා ප්‍රඥප්තිය පනවනවා. ආයේ මේ පාර්ලිමේන්තුවේ ආණ්ඩුක්‍රම ව්‍යවස්ථා සංශෝධනයකින් අමුතු දෙයක් දෙන්න ඕනේ නැහැ. ස්වායත්ත බලාධිකාරයන් පිහිටුවා ගන්නවා. ඒ ස්වායත්ත බලාධිකාරයන් වැඩ කරන්න පටන් ගන්නවා, පැතිරෙන්න පටන් ගන්නවා. මේක තමයි අනුරයි LTTE ඩයස්පෝරාවයි අතර තියෙන රහසිගත එකඟතාවය.

ඊට පස්සේ අනුර කුමාර හිතනවා දෙමළ සියලු දෙනාගේම ඡන්ද, වතුකරයේ ඇත්තන් ඇතුළුව, මුස්ලිම් සියලු දෙනාගේ ඡන්ද ලැබෙයි කියලා. අර පාස්කු ප්‍රහාරයට සම්බන්ධ වෙලා අවුරුදු 200 ගණන් දඬුවම් ලැබිලා බස් එකේ යනකොට කියන්නේ, "අනුර කුමාර මහත්තයා ඉන්නවා, අපිට ප්‍රශ්නයක් නැහැ" කියලා. සහරාන්ලාට ප්‍රශ්නයක් නැහැ, සහරාන්ලාගේ එක්කෙනෙක් ජනාධිපති පිටුපස තියෙනවා.

එතකොට අන්න ඒ සුළු ජාතික ඡන්දයි, සිංහල සුළු කොට්ඨාසයකගේ ඡන්දයි එකතු කරලා ජනාධිපතිවරණය දිනාගන්න ඕනේ. ඒක දිනාගත්තාම ඊළඟ වටයේ තියෙන්නේ, එයාගේ ඊළඟ අවුරුදු හතර-පහ තුළ ගැටෙනවා, ජාත්‍යන්තරව ප්‍රශ්න මතු වෙනවා, තව සමූහ මිනීවලවල් එළියට ගන්නවා, හදනවා, හදලා හරි ගන්නවා. එක්තරා මොහොතක් එනවා ජාත්‍යන්තර පිළිගැනීම යටතේ උතුර සහ නැඟෙනහිර පළාත් දෙකේ ජනමත විචාරණයක් තියෙනවා. ප්‍රශ්න දෙකක් අහනවා; "අපි ඒ පළාත් දෙක එකතු වෙමුද? සිංහල රාජ්‍යයෙන්, ශ්‍රී ලංකා රජයෙන් වෙන් වෙමුද?" කියලා. ඉතියෝපියාවෙන් එරිට්‍රියාව කැඩුවේ ඔය විදිහට.

එතකොට නැවත LTTE එක මහ ලොකු සන්නද්ධ ව්‍යාපාරයක් වෙන්න ඕනේ නැහැ. ඒ දේශපාලන අරගලයේ පෙරහුරුව තමයි තිලීපන්ලා සමර සමර එන්නේ. නොවැම්බර් මාසේ කෙලින්ම එළිපිට ප්‍රභාකරන්වත් සමරයි. ඒකට තමයි මේ පාර කපාගෙන යන්නේ. 'දෙමළ ඩයස්පෝරාව' කියන වචනය නෙවෙයි මම කියන්නේ, 'LTTE ඩයස්පෝරාව'.

ඔය තත්ත්වය යටතේ ඉන්දියාව මේක දිහා කොහොමද බලන්නේ? ඔය වෙනකොට අනුර කුමාර තෙල් තෙල් ටැංකි ටික දීලා නම්, ඔය වෙනකොට අනුර කුමාර එකතු වෙලා පාලම හදලා නම් (හනුමන් පාලම), ඉන්දියාව බලයි මේ වෙන් වෙන කෑල්ල ඊළඟට සිකීම් ඇඳාගත්තා වගේ ඊළඟ ප්‍රාන්තය හැටියට සලකන්න. මේ යමින් තිබෙන්නේ ඉතාම අඳුරු මාවතක. මේ රටේ භූමියට පණ දීපු, මාතෘභූමියට පණ දීපු ඒ ආදරණීය දූ දරුවන්ගේ, මහා වීරයන්ගේ සියලු කැපවීම් තීන්ත පෑනකින්, පෑන් තුඩකින් කරනු ලබන පාවාදීමකින් විනාශ වෙනවා.

එක්සත් ජාතීන්ගේ සංවිධානයේ මෙහෙයුම් නියෝජිතයා කිව්වේ, "මේ විපක්ෂයේ මන්ත්‍රීලා පවා කියවන්නේ නැහැ" කියලා. ආණ්ඩුවේ මන්ත්‍රීවරු මේ අන්ධයෝ ටිකක් ඉන්නේ. මේගොල්ලොන්ට සමහරු කිව්වනේ, "විශේෂයෙන් හරිනි, හරිනිට නැගිටලා වෙනස් මතයක් ගන්න බැහැ." NPP එකේ, 'නියෝ පොල්පොට්' එක ඇතුළේ ඒවා බැහැ. එතකොට ඇස් පියාගෙන මේ යන්නේ ඒ ගමන.

ඒක කරනකොට, ඒ අපරාධයට විරුද්ධව මහජනයා පෙළගස්වන නායකයෝ පිටියේ නැති කරන්න ඕනේ. උන්ට 'හොරු' කියලා හංවඩු ගහලා හිරේ දාලා කියන්න ඕනේ. සිංහල බෞද්ධ නායකයෙක් බිමේ නැති කරන්න ඕනේ. කටක් හරි අරින්න පණ තියෙන හැම එකාවම කූඩු කරන්න ඕනේ, උන්ට 'හොරා' කියන්න ඕනේ.

සමහර මේ රටේ උන් ටිකක් හිතන් ඉන්නවා, "අම්මපා හොරකන් කරයිද හොරු අල්ලනවුන්?". හොරකම් කරන එවුන්... කන්ටේනර් 323 බලන්නේ නැතිව පිට කරපු උන් පට්ට හොරු නේවෙයිද? බාලගල්අගුරු ගෙනලා නැව් දෙකක් අතුරුදහන් කරපු උන් පට්ට හොරු නෙවෙයිද? ගොවියාගේ වී ටිකට මිලක් නැහැ, හාල් ගෝනි ඉන්දියාවෙන් ගෙනැල්ලා කොමිෂන් ගත්ත උන් පට්ට හොරු නෙවෙයිද?

අන්න තව වෙළෙඳ අමාත්‍යාංශය තව වැඩක් කරනවා. අවුරුදු 76ක් තිස්සේ කරපු නැති වැඩක්. 2000 වසරේ චන්ද්‍රිකා ආණ්ඩුව ඉන්දියාවත් එක්ක අත්සන් කරපු වෙළෙඳ ගිවිසුම අනුව, ලංකාවට අවුරුද්දකට ඩොලර් මිලියන 9ක ඇඟලුම් කෝටාවක් හිමියි ඉන්දියානු වෙළෙඳපොළට ඇදුම් යවන්න. අපෙන් ඒගොල්ලෝ බලාපොරොත්තු වෙන්නේ හයි-එන්ඩ් (high-end) ඒවා, උසස් නිෂ්පාදන, මිල වැඩි ඒවා.

මෙච්චර කල් කළේ, අපේ හාමුදුරුවනේ, ඇඟලුම්කරුවන්ගේ සංගමයක් හදාගෙන ඒගොල්ලෝ එකතු වෙනවා, කෝටා එක බෙදාගන්නවා. ඔය බ්‍රෑන්ඩික්ස් වගේ ලොකු සමාගම් පවා ගන්නේ පොඩි කොටසයි, වැඩිම වුණොත් 3%යි, 3.5%යි. ඒක පොඩි මිනිහටත් යනවා. මෙච්චර කල් බෙදාගත්තේ එහෙම.

පුනරුද ආණ්ඩුව ආවනේ, පුනරුද්‍රයට පින් සිද්ධ වෙන්න.... මේක වෙළෙඳ මණ්ඩලය යටතේ තමයි කරන්නේ. මෙච්චර කල් හිටපු රිෂාඩ් බදියුදීන්වත් මේකට අත ගැහුවේ නැහැ. බලන්නකෝ මෙයාගේත් හොඳ කියන්න වුණානේ. මේ කරුමය කියන්නේ! ඊට වඩා හොඳයි වෙන දඬුවමක් දුන්නා නම්, අන්න ඒ තරම් කාල තියෙන්නේ.

දැන් බලන්න... මේ කෝටා එක පළමු වතාවට දෙනවා ඉන්දියානු සමාගමකට. මොකක්ද ඉන්දියානු සමාගම? කෝටා එක ඩොලර් මිලියන අටයි, ඒකෙන් මිලියන 7.3ක පංගුවක් දීලා තියෙනවා... ඒ මොකක්ද සමාගම? ඉන්දියාවේ ධනවත්ම පුද්ගලයා වන මුකේෂ් අම්බානිගේ “රිලායන්” සමාගමට! දැන් ඒක අයිති මුකේෂ් අම්බානිට.

7.3ක් ඒකට, ඉතුරු ටිකට තමයි මෙහේ අය බෙදාගන්නේ. කවදාවත් ඇමැති කිව්වේ නැහැ ඒක. දැන් මේකෙන් ඩොලර් ටික අපිට එනවාද? ඒක ඉන්දියාවේ නතර වෙනවා. මේවා දුන්නේ මේ ඇඟලුම් යවලා ඩොලර් ටිකක් ගෙන්නගන්න රටට. ඩොලර් නැති රටේ කරන්න හිතන්නවත් පුළුවන් අපරාදද මේවා? ඩොලර් තියෙන වෙලාවකවත් මේ රටේ ඇමැතිවරු ඔය කුප්ප වැඩේ කළේ නැහැ.

එහෙව් බඩජාරි, කෑදර, හොර නඩයක් අනිත් මිනිස්සුන්ට 'හොරා' කියලා ලේබල් කරලා හිරේ දාලා, අන්න අර දෙමළ ඊළාම් ඉල්ලීම නිර්මාණය කරලා දෙන පාපතර පාවාදීමේ ගමන යන්න පාර සුද්ධ කරගන්නවා. පාර සුද්ධ කරගන්නේ බලයට එන්න විතරක් නෙවෙයි, බලයට එන ගමන් ඒ පාවාදීමේ අවසාන මරණය, අවසාන ඇණය ගහලා ඉවර කරන්න. එතැනටයි මේ යන්නේ. ඒ නිසා අපි තේරුම් ගන්න ඕනේ, ඉතියෝපියාවෙන් එරිට්‍රියාව කඩපු විදිහට ඒකට ඒකටයි මේ යන්නේ.

මේක හරියට හූයුගෝ චාවේස්ට පස්සේ ආවා වෙනිසියුලාවේ “මදුරෝ” කියලා නායකයෙක්. මදුරෝ පාලනය චාවේස්ගේ ප්‍රතිපත්ති අනුගමනය කළා, නමුත් ප්‍රජාතන්ත්‍රවාදය පැත්තෙන් ඇතැම් විවේචන එල්ල වුණා. මදුරෝ පාලනය වෘත්තීය සමිති නායකයන් මර්දනය කළා කියලා චෝදනා එල්ල වුණා. ඒ වගේම සමහර වාමාංශික පක්ෂවල තිබිච්ච ලියාපදිංචිය නැති කළා, තරඟවලට ඉදිරිපත් වෙන්න තියෙන අවස්ථාව අහිමි කළා.

එහෙත් මදුරෝ, හියුගෝ චාවේස් නියෝජනය කරපු ආර්ථික ප්‍රතිපත්තිය, අධිරාජ්‍ය විරෝධී ප්‍රතිපත්තිය එහෙම්පිටින්ම රැක්කා. තෙල් ජනසතු කළා, ඒවට අත තියන්න ගියේ නැහැ. බලශක්ති ක්ෂේත්‍රය රජය යටතට ගත්තා, එහෙම අත තියන්න ගියේ නැහැ. ඒවා ඔක්කොම රැක්කා.

දැන් මදුරෝව එකපාරට ඉස්සුවා අමරිකාව. ඊට පස්සේ බලය ගියා අන්තර්කාලීන ජනාධිපතිටද, අනුප්‍රාප්තික ජනාධිපතිටද දන්නේ නැහැ, “ඩෙල්සි රොඩ්‍රිගස්ට”. එයාගේ සහෝදරයෙක් ඉන්නවා ඇමැති කෙනෙක්, ඩෙල්සි රොඩ්‍රිගස් දැන් වෙනිසියුලාවේ තෙල් ළිංවලින් 97% ගණනක් අවුරුදු 100කට ඇමෙරිකානු සමාගම්වලට දුන්නා. ඉතුරු තෙල් ළිංවලින් නිපදවන තෙල්වලින් 20%ක් විතර ලාභ තියාගන්නේ නැතුව ඇමෙරිකාවට විකුණන්න එකඟ වුණා. ඉතුරු ටික විකුණනකොටත් මූලිකත්වය ඇමෙරිකාවට දෙන්න එකඟ වුණා. ට්‍රම්ප් කිව්වා "ඉතිහාසයේ ගහපු ලොකුම තෙල් ගිවිසුම අපි අත්සන් කළා වෙනිසියුලාව එක්ක" කියලා.

දැන් ඩෙල්සි මේ ඔක්කොම කරන්නේ චාවේස්ගේ පින්තූරයයි, සිමොන් බොලිවර්ගේ පින්තූරයයි, මදුරෝගේ පින්තූරයයි පිටිපස්සේ තියාගෙන! එයා තාම ඒ පින්තූර පිටිපස්සේ තියාගෙන බ්‍රැස්ටරීන් අමතනවා. එයා ඒකට කියනවා 'යථා තත්ත්වයට හැඩගැසීම' ලු, 'ස්වෛරීත්වය රැකගැනීම' ලු!

දැන් මේ යන්නෙත් ඒ “ඩෙල්සිගේ” වැඩේ වගේ එකක් නෙවෙයිද? විජේවීරගේ පින්තූරය, ලෙනින්ගේ, මාක්ස්ගේ ඔක්කොම පින්තූර පිටිපස්සේ තියාගෙන යන්නේ නව-ලිබරල්වාදයේ, පරගැතිභාවයේ, ප්‍රගතිශීලීත්වය ගෑවිලාවත් නැති ගමනක! බෙදුම්වාදයට ඕන ගමනක! ජාතීන් අතර අසමගිය වපුරන ගමනක! "කිසිම ජාතිවාදයකට ඉඩ දෙන්නේ නැහැ" කිව්වට, සුළුජාතික අන්තවාදයට වැඩෙන්න දීලා යන ගමනක. ඒක කොහොමද?

අඩු ගානේ ජනතා විමුක්ති පෙරමුණෙන් ජනාධිපති කෙනෙක් හැදුනාම, මොන මොන හුටපට තිබ්බත් තමන්ගේ පක්ෂයේ නිර්මාතෘවරයාගේ ජීවත් වෙලා ඉන්න බිරිඳ සහ දරුවෝ, එක්කෝ තමන් ඉන්න තැනට ගෙන්නගෙන, නැත්නම් ඒ අය ඉන්න තැනට ගිහිල්ලා හම්බවෙලා, කතාබහ කරලා "මොනවාද වෙන්න ඕනේ?" කියලා අහන්න ඕනේ සිරිතක් නැද්ද? එහෙම ගුණධර්ම කියලා දේවල් ගෑවිලාවත් නැද්ද? එහෙම ආචාරධර්ම කියලා දේවල් ඇත්තටම නැද්ද?

අවුරුදු 76ක පාලකයෝ බලාගත්තු විදිහටමනේ මේ මිනිස්සුත් බලාගන්නේ. ඒ පුතා වෙනම දේශපාලනයක් කරනවා, ඒවා ප්‍රශ්න කරගන්න බැහැ. ඒ අම්මා හිතේ වේදනාවට කියපු දේවල් ඇති, කියවිච්ච දේවල් ඇති, ඒවා ප්‍රශ්න කරගන්න බැහැ. උසස් මනසක් තියෙනවා නම්, උසස් මනසක් තියෙන මිනිස්සු නම්... අර 'පුංචි මිනිස්සු' කියලා කියන්නේ ඕකටයි. උසස් මනසක් තියෙන මිනිස්සු නම් දැන් අවුරුදු දෙකක් ගියා, අඩු ගානේ විජේවීර අක්කා, දරුවෝ, බනිස් ගෙඩියක් අරගෙන බලන්න ගියාද?

මෙහෙම අයට පුළුවන්ද මේ 65%ක් වෙන දුප්පතා ගැන සහකම්පනයක් ඇති කරගන්න? අර 43%ක් වී අස්වැන්න තියෙන කොල්ලා ගැන සහකම්පනයක් තියෙයිද? මේක තමයි නියම නරුම මනස! ඒ නිසා මේ ඉන්නේ 'අනුර' නමින් ආපු 'ඩෙල්සි'. ඩෙල්සිට ගාණක් නැහැ. නියෝගයක් ආපු ගමන් එකඟ වෙනවා. ට්‍රම්ප් එක්ක බලනකොට නිකන් අක්කයි මල්ලියි වගේ. ට්‍රම්ප් එක්ක අතට අත දීලා හොඳට හිනා වුණා. ඊට කිලෝමීටර් සිය ගාණක් එහායින් මදුරෝ ඉන්නවා හිරකූඩුවේ, බලන්නවත් ගියේ නැහැ! බලන්නවත් ගියේ නැහැ! ඒ තමයි නරුම මනස. නරුම මනස! මෙහෙත් තියෙන්නේ ඒ මනස.

ඉතින් ඒ නිසා උපායමාර්ගික මාවත පස්සට හරවලා, ඒ මාවතට පිටුපාලා, පෙනී හිටපු ප්‍රතිපත්තිවලට පිටුපාලා, දැන් නව-ප්‍රභූ, නියෝ-ලිබරල් මාවතේ මේ රට ඇදගෙන යන, බොරුවෙන්ම පමණක් ජීවත් වෙන්න දන්න, ඒ වගේම ඉන්දියාව කියන ඕනෑම පදයකට නටන, ඇමෙරිකාවේ ඉන්දු- පැසිෆික් න්‍යාය පත්‍රයට අනුව අනුගත වෙන, නේටෝ (NATO) එකටත් ත්‍රිකුණාමලය අල්ලන්න කුරුමානම් අල්ලන, ප්‍රජාතන්ත්‍රවාදය, මිනිස් නිදහස දවසින් දවස පටු කරන...

චීන කතාවක් තියෙනවා; එක් ලස්සන දියණියකට මනමාලයෙක් හම්බවුණා නැඟෙනහිර පළාතෙන්. මනමාලයාට සල්ලි තියෙනවලු, හැබැයි කැතයිලු. බස්නාහිර පළාතෙන් මනමාලයෙක් හම්බවුණා, එයාට සල්ලි නැහැ, ලස්සනයි. දෙමාපියන් ඇහුවලු දියණියගෙන්, "මොකද දුවේ දැන් කාවද තෝරගන්නේ?" කියලා. දියණිය කිව්වලු, "නැඟෙනහිරින් කාලා, බස්නාහිරින් බුදියගන්න පුළුවන් නම් හොඳයි" කිව්වලු!

දැන් මේකත් එහෙම තමයි. නැඟෙනහිරින් කාලා, බස්නාහිරින් බුදියගන්නවා! ඒ තරම් තක්කඩි! ඊට වෙනස් නැහැ. එතකොට තාප්පය උඩ තියෙන තණකොළ වගේ; හුළඟ හමන අතට හැරිලා හමාගෙන යනවනේ. මේගොල්ලොන්ගේ ප්‍රතිපත්ති තාප්පය උඩ තියෙන තණකොළ වගේ. ඒවට බරක් නැහැ, ඒවට වටිනාකමක් නැහැ. ඒවා අත්‍යන්තයෙන්ම තමන්ගේ ජීවිතයත් එක්ක බැඳුණු දේවල් නෙවෙයි. ඒ නිසා ඒවා විසි කරන්න, හලන්න කිසිම වේදනාවකින් තොරව හැකියාව තියෙනවා.

ඒ නිසා තමයි අවුරුදු දෙකක් ගිහිල්ලත් ජනාධිපතිට වේදිකාවට නැඟලා 'පෝ ජී කනු දාහක්' ගහනවා කියලා කියන්න වෙන්නේ. යකෝ, වමේ කියලා පාලනයක් නම් දැන් කියන්න ඕනේ, "අන්න අර දුප්පත්කම 65%යි, ලබන අවුරුද්ද වෙනකොට මේක 60%ට ගේන්න මෙන්න හදලා තියෙන සැලැස්ම, ඒක මහා ප්‍රාදේශීය ලේකම් කාර්යාල මට්ටමෙන් ගොඩනගාගෙන යන වැඩපිළිවෙළ" කියලා. එහෙම කතාවක් නැහැ.

"සුනිත්‍ය විදුලි බලය අපි කොහොමද ඉදිරි අවුරුද්දේ මොන ටාගට් එකටද ගේන්නේ?" කතාවක් නැහැ. පෝජී කනු දාහයි, විශ්වවිද්‍යාල 50යි! තියෙන විශ්වවිද්‍යාල 17 ආචාර්යවරුන්ගේ හිඟයක්. ආචාර්යවරු, කථිකාචාර්යවරු වැඩවර්ජනය කරනවා, අලුත් ශිෂ්‍යයන්ට උගන්නන්නේ නැහැ කියනවා. ඒවට උත්තර නැහැ. තව 50ක් හදනවලු! අර 'මචං' වගේ, ඔය තියෙන එක ෂොප් එකක් වගේ කියලා තමයි ජනාධිපතිතුමා හිතාගෙන ඉන්නේ මේ විශ්වවිද්‍යාල හදන එක!

ඊළඟට ගෙදරට නර්ස්ලා එවනවාලු! අනේ දෙයියෝ සාක්කි! ඉස්පිරිතාලේ ගෝස් නැහැ! ගෝස්.... නර්ස්ලා එවන්න කලින් ඉස්පිරිතාලයට ගෝස් ටික දෙන්න! ඉස්පිරිතාලේ ගෝස් නැති රටේ හෙට එවනවාලු නර්ස්ලා ගෙදරට! කාටද කියන්නේ? කරපු දෙයක් කියන්න නැහැ. මේ තරම් අර්බුදකාරී මනසකට, මේ තරම් අසරණ වෙච්ච මනසකට මොකක්ද වෙන්නේ? මේ වගේ මනසක් කියන්නේ බියෙන් ඔත්පල වෙච්ච මනසක්. ඇතුළතින් බියයි.

සාමාන්‍යයෙන් ඇතුළතින් බිය වෙන කෙනා බලනවා තමන් බිය බව නොපෙන්වා එළිය බිය කරන්න, බිය පතුරුවන්න. බිය පතුරුවන එක තමයි ඇතුළතින් බිය වෙච්ච මනුස්සයාගේ උපාය. මේ තමයි ඔහුගේ ඇතුළත තියෙන බිය සමාජය මත මුදාහරින්නේ. 22න් සමාජය මත මුදාහරිනවා, දූෂණ විරෝධී පනතෙන් සමාජය මත මුදාහරිනවා. සින්දු කිව්වොත් මඟුල් ගෙදර බද්ද ගහනවා, බල්ලා හැදුවොත් ගෙදර බද්ද ගහනවා. හැම තැනම එක විදිහට භීතිය පතුරවනවා.

තව චීන කතාවක් තියෙනවා; ගුයිපෝ කියන ප්‍රාන්තයේ බූරුවෝ ඉඳලා නැහැ. එක දවසක් එක මනුස්සයෙක් ඔය ප්‍රාන්තයට හාපුරා කියලා බූරුවෙක් ගෙනාවා. කැලෙන් එළියට ආපු ව්‍යාඝ්‍රයා මේක දැක්කා. දැන් දැකපු නැති සතෙක්නේ, ව්‍යාඝ්‍රයා කල්පනා කළා "මූ මොකාද වැඩ්ඩෙක්ද දන්නේ නැහැ" කියලා. දැකපු නැති පොර!

ව්‍යාඝ්‍රයා ලං වෙනකොට මේ බූරුවා මොකද කළේ? කෑගහන්න ගත්තා, පයින් ගහන්න ගත්තා. ව්‍යාඝ්‍රයා ටිකක් වෙලා බලන් හිටියා. ව්‍යාඝ්‍රයාට තේරුණා මූ දන්නේ කෑගහන්නයි, පයින් ගහන්නයි විතරයි කියලා. එතකොට තේරුණා වැඩකාරයෙක් නෙවෙයි කියලා.

දැන් මේ බූරුවට වෙලා තියෙන්නෙත් ඒ වැඩේමයි. දැන් තේරෙනවා වැඩකාරයෙක් නෙවෙයි කියලා. හැබැයි අර නරුම මනස, දුෂ්ට මනස, රට අවසාන වශයෙන් දෙපළු කරන මනස, ඒකට විරුද්ධ වෙන මිනිස්සු දඬුකඳේ ගහන මනස, ඒ රුදුරු මනස එහෙම්පිටින්ම තියෙනවා. ඒ නිසා අපි තේරුම් ගන්න ඕනේ මෙතන තව පැත්තක් තියෙනවා; විපක්ෂයේ අර්බුදය.

දැන් ජනාධිපතිතුමාගේ වර්තමාන භාවිතය ප්‍රශ්න කෙරෙන ඔහුගේම වූ අතීත කතාවක් ඇත, අර මොකක්ද නියුටන්ගේ නියමය වගේ. ඒ වගේම ජනාධිපතිතුමාගේ වර්තමාන නරක භාවිතයට සුජාතභාවය ලබාදෙන විපක්ෂයේත් අතීත කතාවක් තියෙනවා, දිට්ඨධම්මවේදනීය කර්මය වගේ!

දැන් උදාහරණයක් ලෙස, සාලය “ඩියෝ” ගහලා තියාගන්නවා. ඒක සාධාරණීකරණය කරන්න විපක්ෂයේ හිටපු අය පාස්කු ඉරිදා ප්‍රහාරයට යුද හමුදාව සම්බන්ධයි, සාලයලා සම්බන්ධයි කියලා කියපු කතා තියෙනවා. ඒවයෙන් අරක සාධාරණීකරණය කරනවා. කවුද මරදානේ... කවුද මේ මුස්ලිම් මන්ත්‍රීතුමා? මුජිබර් රහුමාන් කරපු කතා තියෙනවා, හරින්ලා මනුෂලා කරපු කතා තියෙනවා, එදා SJB එකේ, අද UNP එකේ තිබිච්ච. මේක දේශපාලන පිටියේ කවදාවත් නොවිච්ච අපබ්‍රංසයක්නේ.

දැන් බලන්න, රණවිරු මර්දනයට විපක්ෂයේ ඒ කොටස සද්ද නැහැ. වඩුනාගල බෞද්ධ පුරාවිද්‍යා භූමිය බලහත්කාරයෙන් අන්‍යාගමිකරණය කරන්න යනවා, සද්ද නැහැ. කොට් සැමරුම් යනවා, තිලීපන්ව සමරනවා, සද්ද නැහැ, කට වහන්. ඒ එකකටවත් කට අරින්නේ නැහැ.

කරන්නාගොඩ උසාවි දානවා, සද්ද නෑ. උලුගේතැන්නලව හිරේ දානවා, කට වහන්. මඩකලපුවේ සිංහල මිනිහව වගා කරන්න නොදී එළවන්න හදනවා, කට වහන්. එල්නිනෝ එනවා කට ඇරලා... එල්නිනෝ එනකොට කට ඇරලා... 'සබ්මැරීන්' කට ඇරලා! සබ්මැරීන් කියන්නේ අර බනිස් නෙවෙයි, මේ මුහුද යටින් යන ඒවා!

ලෙනින් කියලා තියෙනවා, "විපක්ෂයේ පාලනයද අපවිසින්ම  සිදුකිරීම තමයි වඩා හොඳ වන්නේ" කියලා. අනුරලා ලෙනින් කියපු වෙන මොනවා දේවල් නොගත්තත් ඒ කෑල්ල හරියටම අරන් තියෙනවා.

මම පොඩි ප්‍රකාශයක් කියන්නම්; කවුරුන්, කවදා, කාට, කුමන වෙලාවකද කියන ලද්දක්ද. එක්තරා කෙනෙක් තව කෙනෙකුට කියනවා, "ඔයා කලබල වෙන්න එපා. මේක ඔයාට බලපාන්නේ නැහැ. 29 ඉලෙක්ෂන් එකේ ඉන්නේ ඔයයි මායි විතරයි. එක්කෝ ඔයා දිනයි, නැත්නම් මම දිනයි. ඔයා දිනුවොත් ඔයා මාව බලාගන්න. මම කොහොමත් ඔයාව බලාගන්නවා." කවුරු, කවදා, කවරෙකුට කියන ලද්දක්ද කියලා අර ප්‍රශ්න පත්තරවල අහනවා වගේ, පුළුවන් නම් උත්තර දෙන්න.

එතකොට එහෙම අශුද්ධ එකඟතා තියෙනවා. අනුර මේ හලාගෙන යන න්‍යායපත්‍රයට විරුද්ධ නොවෙන, අර කියන පොලිස් බලතල, ඉඩම් බලතල, අරවා මේවා ඔක්කොම දෙන වෙලාවට, ප්‍රඥප්ති අනුමත කරන වෙලාවට විරුද්ධ නොවන තක්කඩි විපක්ෂයක් තියෙනවා. ඒ තක්කඩි විපක්ෂය රකිනවා. ඒ තක්කඩි විපක්ෂය ඔතන තියාගෙන, හුරතල් කරගෙන, මෙතන මේ මාර්ගය මාර්ග බාධකයක් බවට පත් කරලා තියෙනවා. සමාවෙන්න අපේ හාමුදුරුවනේ.

ඒ නිසා අපිට අද සිද්ධ වෙනවා මේ රටේ ප්‍රගතිශීලී, ජාතිකවාදී බලවේගවලට, මේ රටට ආදරය කරන බලවේගවලට, ඉතිහාසය විසින් ඉතා අසීරු, දුෂ්කර කොන්දේසි යටතේ දැවැන්ත පුරෝගාමී අභියෝගයක් භාරදීලා තියෙනවා.

ඒ තමයි මේ පොළොව ගොඩගන්න, ආර්ථිකමය වශයෙන් ගොඩගන්න, ස්වෛරීත්වය බලගන්වන්න, අසරණ කොට, හුදකලා කොට, මැඩලා, කොන් කොට තිබෙන සිංහල බෞද්ධයාව ආරක්ෂා කරන්න, කීතු කීතු විකෘති අර්ථකථන දෙමින් බුදුදහමට කරන විනාශය වළක්වන්න, නැවත සංගායනාවක් පවත්වලා බුදුදහමට එල්ල වී තිබෙන අභියෝගවලින් බුදුදහම ආරක්ෂා කරගන්න...

මේ පින්බිම, මහින්ද මහරහතන් වහන්සේ කෙලින්ම බණ දේශනා කළේ දේවානම්පියතිස්ස රජතුමාට, පාරේ යන කොබෙයියන්ට නෙවෙයි. රජාවත් අහුවුණේ දඩයමේ ගිහිල්ලා එනකොට. මුලින්ම දුන්නේ පාඩම, සොබාදහම සහ රජු අතර තියෙන සම්බන්ධය. "මහරජ, ඔබ මෙහි හිමිකරු නොව භාරකරු පමණයි."

දේශපාලන විද්‍යාවේ ඒ තරම් උසස් මූලධර්මයක් කොහෙන්වත් වෙන මට ඇහිලා නැහැ. පහුගිය කාලේ නඩු තීන්දුවලට, “එප්පාවල පොස්පේට් නිදියේ' නඩු තීන්දුවටත් ඔය වගන්තිය ඇතුළත් කළා ඒ විනිශ්චයකාරතුමන්ලා, ධර්මය ගැන දන්නවනේ. එතකොට මේ රටේ නඩු තීන්දු කියන්නේ ඒ සභ්‍යත්වයටත් අනුකූල වෙන්න ඕනේ, නීතියට පමණක් නෙවෙයි. සද්ධර්මය කියන්නේ ඒකට.

එහෙම දර්ශනයක් දීපු නිසා තමයි මේ රටේ අන්‍ය ආගමිකයන්, අන්‍ය ජාතිකයන් ඔවුන්ට තර්ජනයක් නොමැතිව මේ පොළොවේ නිදහසේ ජීවත් වෙන්න පුළුවන් වෙලා තියෙන්නේ. මේ දහම, මේ බුදු සසුන මෙතැන විනාශ කළොත් ඉතුරු වෙන්නේ මස් මඩුවක්!

රට මස් මඩුවක් නොවෙන්න නම්, පන්සල් 12,000ක් තියෙනවා නේද අපේ හාමුදුරුවනේ? 14,200ක් තියෙනවා. ඒවයේ අනන්ත දුක් වේදනා විඳගෙන, මිනිස්සුත් එක්ක ජීවත් වෙමින් මේ ශාසනය රකින, උරුමය රකින මහා සංඝරත්නය ඉන්නවා. අද ඒකට නිගරු කරනවා. ත්‍රෛනිකායික මහනායක ස්වාමීන් වහන්සේලා "විසිදෙක මේ වෙලාවේ ගේන්න එපා" කියලා නිවේදනයක් දැම්මා. ඒකට JVP දායක සභාව කුණුහරුපයෙන් බහිනවා උන්වහන්සේලාට සමාජ මාධ්‍යවල. ඒ අශික්ෂිත, අශීලාචාර, අසිෂ්ට ක්‍රමය මේ රටේ ඇති කළේ මේ උන්දලා.

ඒ නිසා අපිට තියෙනවා මෙන්න මේ මහා කාර්යභාරයක් කළ යුතු, දෙවුර පටලා ගත යුතු මහා ජාතික න්‍යායපත්‍රයක් මුල් කරගත්තා වූ, හොරගල් අහුලන එහෙම නෙවෙයි, බොරු රැවටිලි නැති, අවංක ආයාසයෙන් දිවි හිමියෙන් නිදහස් කරනවාය කියන මහා උතුම් උවමනාවෙන් පණ පෙවුණු ජාතික න්‍යායපත්‍රයක් සහිත මහා දේශපාලන එකමුතුවක් මේ පොළොවේ නිර්මාණය කරන්න.

ඒකට මේ ඉන්න නායකයෝ රැකගන්න ඕනේ. ඒ නායකයෝ හිරේ දානකොට සතුටු වෙන්න නෙවෙයි, ඒ නායකයන්ට මොනවා හරි චෝදනාවක් පටවලා, ගරහලා, අවමානයට භාජනය කරලා... මහින්ද රාජපක්ෂ යුද්ධ කළේ නැත්නම් ඔය පවුලේ කාටවත් මොන හොරකම කරලා තිබ්බත් - මම කියන්නේ නැහැ කළා කියලා, තිබ්බත් - ඔය පීඩනය එල්ල වෙන්නේ නැහැ.

ඇයි රිෂාඩ්ලාට එල්ල වෙනවාද? බබ්බුද? වසන්ත සමරසිංහලා ඉඳලා දැනුත් කරනවා, කෝ ඒ පීඩනය? මලික් සමරවික්‍රම ඉන්නේ දකුණු සාක්කුවේ. මහ බැංකු බැඳුම්කර නඩුවේ එදා ප්‍රධාන චූදිතයෙක්. කෝ?

ඒ තමයි ඓතිහාසික LTTE ඩයස්පෝරාවට ඕන කරන වෛරය තමයි මේ පිරිමහන්නේ. සාලයට දුක් විඳින්න වෙලා තියෙන්නේ ඒ වෛරයට. යුද්ධයට සම්මාදම් වෙච්ච සෑම මිනිහෙක්වම 'හොරා' කියලා මඩ ගහන්නේ ඒ වෛරය පිරිමහන්න. 22 ගෙනැල්ලා අධිකරණය තමන්ගේ දකුණු අත බවට පත් කරගන්න හදන්නේ ඒ වෛරය ඒ විදිහට පිරිමහන්න.

ඒ නිසා අපි කවුරුත් අතීත මතකයන් අප වටා තිබුණත් ඒවා ගැන නිසි අවබෝධයකින්, ඒවා නැවත නොවෙන බවට වන සහතිකයකින්, අප තුළ වූ වැරදි අඩුපාඩු ස්වයංව දකිමින්, ධනාත්මක දේ රැකගනිමින් මේ ජාතික නව අභියෝගය තරණය කිරීම සඳහා වූ සුදුසු ඇඳුමෙන්, සුදුසු වස්ත්‍රයෙන් සැරසුණු මහා දේශප්‍රේමී, ප්‍රගතිශීලී එකමුතුවක් ඓතිහාසිකව ඉල්ලා සිටිනවා. එතැනට වෙනස් වෙන්න අද අපිට බලකෙරිලා තියෙනවා. ඒ වෙනස අව්‍යාජව විය යුතුව තියෙනවා.

"රාජ්‍ය පාලකයා දැහැමි නම් රටත් දැහැමියි" කියලා කියනවා. අපේ රටේ ඉතිහාසය ගත්තත් දැහැමි රජවරු හිටපු හැම කාලයකම අපිට යහපත උදා වෙලා තියෙනවා. දැහැමි නොවන රජවරු පහළ වෙච්ච හැම කාලයකම දුර්භික්ෂ, විපත්, යුද්ධ, කැරලි අපිට උරුම වෙලා තියෙනවා.

ඒ නිසා මේ රට ඓතිහාසික වෙනස්කමකට භාජනය කළ හැකියි. ඉතිහාසය විලිරුදාවෙන් පෙළෙන වෙනසට පෙකනිවැල කපන, විප්ලවය කරන දේශපාලන ගාමක බලවේගය නිපදවිය යුතුව තියෙනවා, බිහි කළ යුතුව තියෙනවා. ඒ සඳහා අපි සියලු දේශපාලන වාදභේද පසෙකලා ඒ අරමුණ වෙනුවෙන් නව උද්‍යෝගයකින් හා උනන්දුවකින් සියලු අභියෝග මැද එකට හිටගත යුතුව තියෙනවා.

ඉතිහාසය ඉල්ලා සිටින සැබෑ බලපෑම නොසලකා කවුරු හරි හරස් වෙන්න හදනවා නම්, දේශපාලන පිටියේ ඔවුන් 'අභාවයාගේ අභාවය' යන මූලධර්මයට අනුව දේශපාලනිකව වඳ වී යන සතුන් බවට පත්වෙනවා මිසක් වෙන දෙයක් වෙන්නේ නැහැ.

ඒ නිසා අද දේශපාලන පිටියේ ඉන්න කාටත් තෝරගන්න තියෙන්නේ අනුර කුමාරගේ අතේ තියෙන පරගැති, භයානක න්‍යායපත්‍රය දකින්න, ඒකට ප්‍රතිවිරුද්ධව හරියට කෙලින් හිටගන්න. හිටගන්න පුළුවන් අය විතරක් මොන අභියෝග මැද වුණත් මේ ගඟ තරණය කරයි. හිටගන්න බැරි වෙන අය ස්වාභාවික වඳවීමට භාජනය වෙයි.

වඳවෙන පැත්ත තෝරගන්නවාද, අලුත් නිර්මාණාත්මක ජාතියක් ජනනය කරන පැත්ත, උපද්දවන පැත්ත තෝරගන්නවාද කියන ඒ දෙකෙන් එකයි අද අපට තෝරගන්න නියමිතව තියෙන්නේ.

ඒ නිසා ආදරණීය අම්මේ, තාත්තේ, සහෝදරයා, සහෝදරිය, මේ තීරණාත්මක තත්ත්වය අපි හරියට හඳුනාගනිමු. අන් කවරදාටත් වඩා අපේ ආර්ථිකය දුර්වල වෙලා තියෙන වෙලාවක්, සමාජය නැතිබැරිකමින්, අගහිඟකමින් පීඩා විඳින වෙලාවක්, ඔළුවේ දහසකුත් ප්‍රශ්න ගැටගැහිලා තියෙන වෙලාවක්. ඒ මොනවා වුණත් මුතුන්මිත්තන් රැකලා දීපු පින්බිම වෙනුවෙන් කැපවීම් කරගත යුතු වෙලාවක්! මේ දුෂ්ට පාලනයට, ඒ පාපතර මෙහෙයුම දිගේල් කරන්න ඉඩ නොදී පරාජය කළ යුතු වෙලාවක්!

ඒ වෙලාවේ ඒ අරමුණ වෙනුවෙන්, ඒ සටන වෙනුවෙන්, ඒ ජාතියේ ඓතිහාසික උවමනාව වෙනුවෙන් පෙරමුණ ගන්න, රොද බැඳගන්න, සමගි වෙන්න, පෙළගැහෙන්න ඔබට සැමට ශක්තිය ලැබේවා! ධෛර්යය ලැබේවා! යෝධ බල, යෝධ වීර්යය ලැබේවා! මාතෘභූමියට ජය වේවා! ලක්මෑණියන්ට ජය වේවා! ඔබ සැමට ජයෙන් ජයම වේවායි පතමින් මගේ වචන ස්වල්පය අවසන් කරනවා. සියලු දෙනාටම ජය වේවා!"