ගෝඨාගෝගම අරගලකරුවන්ට පහරදීම ගැන මහින්දට නඩු නොපැවරීමට තීන්දු කරයි..

Sep 28, 2026 at 05:08 AM

|

Lanka Leader

2022 වසරේදී ගාලුමුවදොර 'ගෝඨාගෝගම' විරෝධතාකරුවන්ට එල්ල වූ ප්‍රහාරය සම්බන්ධයෙන් හිටපු අග්‍රාමාත්‍ය මහින්ද රාජපක්ෂ මහතාට එරෙහිව අධිචෝදනා ගොනු නොකිරීමට නීතිපතිවරයා තීරණය කර ඇති බව 'The Sunday Times' පුවත්පත වාර්තා කර සිටියි.

එම ප්‍රහාරය එල්ල වන අවස්ථාවේදී හිටපු ජනාධිපති ගෝඨාභය රාජපක්ෂ මහතාගේ රජයේ අග්‍රාමාත්‍යවරයා ලෙස කටයුතු කළ මහින්ද රාජපක්ෂ මහතාට එරෙහිව චෝදනා එල්ල කිරීමට තරම් ප්‍රමාණවත් සාක්ෂි විමර්ශන නිලධාරීන් විසින් ඉදිරිපත් කර නොමැති වීම මෙම තීරණයට හේතු වී තිබේ.

කෙසේ වෙතත්, ඇසින් දුටු සාක්ෂි, පරිවේෂණීය සාක්ෂි සහ වීඩියෝ දර්ශන විශ්ලේෂණය කිරීමෙන් ලබාගත් විද්වත් සාක්ෂි මත පදනම්ව වෙනත් සැකකරුවන් 34 දෙනෙකුට එරෙහිව චෝදනා ගොනු කිරීමට නිර්දේශ කර ඇතැයි 'The Sunday Times' පුවත්පත වැඩිදුරටත් සඳහන් කරයි. ඉන් සැකකරුවන් තිදෙනෙකු වන හිටපු රාජ්‍ය අමාත්‍ය සනත් නිශාන්ත, දෑන් ප්‍රියසාද් සහ හිටපු වෘත්තීය සමිති නායිකා වසන්තා හඳපාන්ගොඩ යන අය මේ වන විටත් ජීවිතක්ෂයට පත්ව සිටිති.

ඒ අනුව, දැනට ජීවතුන් අතර සිටින සෙසු සැකකරුවන් 31 දෙනාට එරෙහිව නීතිවිරෝධී රැස්වීමක සාමාජිකයන් වීම, මිනීමැරීමට තැත් කිරීම සහ බරපතළ තුවාල සිදුකිරීම ඇතුළු චෝදනා 327ක් යටතේ කොළඹ මහාධිකරණයේදී එක් අධිචෝදනා පත්‍රයක් ගොනු කිරීමට නියමිතය. මෙම නඩුව විභාග කිරීම සඳහා ත්‍රිපුද්ගල මහාධිකරණ විනිසුරු මඩුල්ලක් (Trial-at-Bar) පත් කරන ලෙස නීතිපති පරින්ද රණසිංහ මහතා විසින් අගවිනිසුරු ප්‍රීති පද්මන් සූරසේන මහතාගෙන් ඉල්ලීමක් කර ඇති බව ද එම වාර්තාවේ දැක්වේ.   

අධිචෝදනා ලැබීමට නියමිත පිරිස අතර හිටපු අමාත්‍ය ජොන්ස්ටන් ප්‍රනාන්දු, හිටපු පොලිස්පති දේශබන්දු තෙන්නකෝන්, මොරටුව හිටපු නගරාධිපති සමන්ලාල් ප්‍රනාන්දු, හිටපු පාර්ලිමේන්තු මන්ත්‍රී මිලාන් ජයතිලක, දෙහිවල-ගල්කිස්ස මහ නගර සභාවේ හිටපු විපක්ෂ නායක අමල් පුෂ්පකුමාර ද සිල්වා, කොළඹ මහ නගර සභාවේ හිටපු විපක්ෂ නායක අජන්ත ලියනගේ, හිටපු නාගරික මන්ත්‍රී මහින්ද කහඳගම සහ 'අරාබි වසන්ත' ලෙස හඳුන්වන අසංක නාලක විජේසිංහ යන අය ඇතුළත් වන බව 'The Sunday Times' පුවත්පත් වාර්තාවේ සඳහන් වේ.