තිලීපන්ගේ උපවාසය සහ සැමරුම් පිළිබඳ නැවතත් කතාබහක්: ඉතිහාසයේ සැබෑ තත්ත්වය සහ දේශපාලන භාවිතය පිළිබඳ ශමීන්ද්‍ර ෆෙර්ඩිනැන්ඩෝගෙන් අනාවරණයක්..

Sep 25, 2026 at 02:09 PM

|

Lanka Leader

එල්.ටී.ටී.ඊ. සංවිධානයේ හිටපු ප්‍රබලයෙකු වූ තිලීපන්ගේ අනුස්මරණ සැමරුම් පිළිබඳව නැවතත් රට තුළ දේශපාලන හා සමාජීය සංවාදයක් ගොඩනැගී ඇති බවත්, මාරාන්තික උපවාසයකින් මියගිය එකම ශ්‍රී ලාංකිකයා වන තිලීපන් සම්බන්ධයෙන් පවතින මතවාදයන් කාලයත් සමඟ දේශපාලනික අවශ්‍යතාවලට අනුව වෙනස් වී ඇති බවත් ජ්‍යෙෂ්ඨ මාධ්‍යවේදී ශමීන්ද්‍ර ෆෙර්ඩිනැන්ඩෝ පවසයි.

'දිවයින ඔන්ලයින්' වැඩසටහනට එක්වෙමින් ශමීන්ද්‍ර ෆෙර්ඩිනැන්ඩෝ සඳහන් කළේ, 1987 දී සිදු වූ මෙම සිදුවීම සම්බන්ධයෙන් එකිනෙකට පරස්පර වාර්තාකරණයන් පවතින බවයි. 

වර්තමානයේ ඇතැම් මාධ්‍ය හා සංවිධාන විසින් තිලීපන්ගේ ඉල්ලීම් 5ක් මුල් කරගනිමින් මෙම උපවාසය සිදු වූ බව පැවසුවද, එල්.ටී.ටී.ඊ. කාන්තා බළකායේ හිටපු සාමාජිකාවක වන නිරෝමි ඩිසෝයිසා (Nromi de Soyza) විසින් රචිත "Tamil Tigers" ග්‍රන්ථයේ දක්වා ඇත්තේ මෙම මාරාන්තික උපවාසයේ ප්‍රධානතම අරමුණ වූයේ ඉන්දීය හමුදාව ශ්‍රී ලංකාවෙන් පිටකිරීම බවයි.

තවද, මෙවැනි සැමරුම් සහ මතවාදයන් සම්බන්ධයෙන් කාලයෙන් කාලයට බලයට පත්වූ සෑම රජයක්ම විවිධ ප්‍රතිපත්ති අනුගමනය කර ඇති බවත්, ජාතික මට්ටමේ පැහැදිලි ප්‍රතිපත්තියක් හෝ සීමාවන් නොමැතිකම නිසා දේශපාලනඥයන් තමන්ගේ දේශපාලන වාසියට අනුව මෙම සිදුවීම් පාවිච්චි කරන බවත් ඔහු පෙන්වා දුන්නේය.

පසුගියදා අනුරාධපුරයේ පැවැති ජනරැලියකදී පාර්ලිමේන්තු මන්ත්‍රී රාමනාදන් අර්ජුනා විසින් කරන ලද ප්‍රකාශ සහ උතුරේ පැවැත්වෙන සැමරුම් සම්බන්ධයෙන් අදහස් දක්වමින් ශමීන්ද්‍ර ෆෙර්ඩිනැන්ඩෝ අවධාරණය කළේ, අවි ගත් කණ්ඩායම් හෝ ත්‍රස්තවාදී සංවිධානවල සාමාජිකයන් සැමරීම සම්බන්ධයෙන් පවතින නීතිමය හා රාජ්‍ය අධීක්ෂණ තත්ත්වය නිරවුල් විය යුතු බවයි.