සුරේෂ් සලේ ලබන 28 තෙක් ජාතික රෝහලේ.. ඔහුගේ ලැප්ටොප් පරිගණකයේ මුරපදය වෙනත් මාර්ගයකින් ලබාගන්නා බවත් දන්වයි..

Sep 22, 2026 at 04:42 PM

|

Lanka Leader

පාස්කු ඉරුදින ප්‍රහාර මාලාවට අදාළව රඳවා ප්‍රශ්න කෙරෙන, දැනට කොළඹ ජාතික රෝහලේ ප්‍රතිකාර ලබන හිටපු බුද්ධි ප්‍රධානී සුරේෂ් සලේ රෝහලෙන් මුදා හැරීම සම්බන්ධයෙන් වෛද්‍ය මණ්ඩලය රැස්වීමෙන් අනතුරුව තීරණයක් ගන්නා බව වෛද්‍ය වාර්තාවල සඳහන්ව ඇතැයි අතිරේක සොලිසිටර් ජනරාල් දිලීප පීරිස් කොටුව මහේස්ත්‍රාත් පසන් අමරසේන හමුවේ අද (22) දැනුම් දුන්නේය.

පාස්කු ප්‍රහාර මාලාව සම්බන්ධයෙන් කොටුව මහේස්ත්‍රාත් අධිකරණයේ කැඳවූ නඩුවට වැඩිදුර වාර්තාවක් ඉදිරිපත් කරමින් අතිරේක සොලිසිටර් ජනරාල්වරයා මේ බව සඳහන් කළේය.

අධිකරණ නියෝග ප්‍රකාරව කොළඹ ජාතික රෝහලේ අධ්‍යක්ෂ සම්පත් අධිකාරී අද (22) විවෘත අධිකරණය හමුවේ පෙනී සිටියේ ඔහුට ලැබී තිබූ නොතීසියට අනුවයි.

පැමිණිල්ල වෙනුවෙන් කරුණු දක්වමින් අතිරේක සොලිසිටර් ජනරාල්වරයා කියා සිටියේ, සැකකරු දින 100ක් ඉක්මවමින් කොළඹ ජාතික රෝහලේ ප්‍රතිකාර ලබමින් සිටින බවයි.

විමර්ශනවලට බාධා කරමින් කුමන්ත්‍රණකාරී ලෙස රෝහලේ ප්‍රතිකාර ලබන සැකකරු වහාම ප්‍රශ්න කිරීම සඳහා අපරාධ පරීක්ෂණ දෙපාර්තමේන්තුව වෙත ලබාදීමට කොළඹ ජාතික රෝහලේ වෛද්‍ය මණ්ඩලය කටයුතු කරනු ඇතැයි අපේක්ෂා කරන බවත්, ලබන 28 වනවිට ඒ සම්බන්ධයෙන් තීරණයක් ගත හැකි වනු ඇති බවත් අතිරේක සොලිසිටර් ජනරාල්වරයා වැඩිදුරටත් සඳහන් කළේය.

එසේම, මෙම විමර්ශනයට අදාලව මෙතෙක් සැකකාර සුරේෂ් සලේ විසින් ලබා නොදුන් ඔහුගේ ලැප්ටොප් (laptop) පරිගණකයේ මුරපදය වෙනත් මාර්ගයකින් ලබාගන්නා බවද අතිරේක සොලිසිටර් ජනරාල්වරයා අධිකරණය හමුවේ දන්වා සිටියේය.