ඉම්රාන් ඛාන්ගේ සොහොයුරිය හා ඥාතීන් පැහැරගත් බවට පුත් කාසිම්ගෙන් චෝදනා..

Sep 21, 2026 at 11:44 AM

|

Lanka Leader

පාකිස්ථානයේ හිටපු අගමැති ඉම්රාන් ඛාන්ගේ සොහොයුරිය ඇතුළු ඥාතීන් පිරිසක්, ඔවුන් සිටින තැනක් පවා හෙළි නොකර අත්අඩංගුවට ගෙන රඳවාගෙන සිටින බවට ඔහුගේ පුත් කාසිම් ඛාන් චෝදනා කරයි.

මෙම චෝදනාව එල්ල වී ඇත්තේ ඉම්රාන් ඛාන්ගේ පාකිස්ථාන තෙහ්රීක්-ඊ-ඉන්සාෆ් (PTI) පක්ෂය විසින් සැප්තැම්බර් 27 වැනිදා පැවැත්වීමට නියමිත දැවැන්ත විරෝධතා පාගමනට දින කිහිපයකට පෙරයි.

X සමාජ මාධ්‍ය ගිණුම හරහා සටහනක් තබමින් කාසිම් පවසා ඇත්තේ, බලධාරීන් විසින් තම නැන්දණිය වන වෛද්‍ය උස්මා සහ නෝරීන් මෙන්ම ඥාති සොහොයුරන් වන ෂර්ෂා සහ ෂාරෙස් යන අය ඔවුන්ගේ නිවෙස්වලට කඩා වැදී මෙසේ අත්අඩංගුවට ගෙන ඇති බවයි.

"ඔවුන් මගේ නැන්දණියගේ සහ සොහොයුරන්ගේ නිවෙස්වලට කඩා වැදී කිසිදු පැහැදිලි කිරීමකින් තොරව බලහත්කාරයෙන් වාහනවලට පටවාගෙන ගිහින් තියෙනවා. අත්අඩංගුවට ගැනීමට කිසිම හේතුවක් දක්වා නැහැ. ඔවුන්ව අරන් ගියේ කොහෙද කියලා කිසිම තොරතුරක් නිකුත් කරලා නැහැ," යනුවෙන් කාසිම් චෝදනා කරයි.

මෙම සිදුවීම අපරාධකාරී හැසිරීමක් ලෙස හඳුන්වා දෙන කාසිම්, පවතින තත්ත්වය පිළිබඳව ජාත්‍යන්තරයේ අවධානය යොමු විය යුතු බවද පවසයි.

හිටපු පාකිස්ථාන අගමැති ඉම්රාන් ඛාන්ගේ ඥාති සොහොයුරු ෂාරෙස්ගේ අවුරුදු හතරක් සහ හයක් වයසැති කුඩා දරුවන් දෙදෙනා මුලින් අතුරුදන්ව සිටි බවත්, පසුව ඔවුන් සුරක්ෂිතව සිටින බව තහවුරු වූ බවත් ඉම්රාන්ගේ පුත් කාසිම් ඛාන් තවත් සමාජ මාධ්‍ය සටහනක් තබමින් පවසා ඇති බව සඳහන්.

කෙසේ වෙතත්, අසීම් සහ සකීනේ නමැති තම තවත් ඥාති සොහොයුරන් දෙදෙනෙකු ද බලධාරීන් විසින් භාරයට ගෙන ඇති බවයි ඔහු වැඩිදුරටත් චෝදනා කරන්නේ.

"මගේ ඥාති සොහොයුරාගේ දරුවන් දැන් සුරක්ෂිතව සිටින බවට ආරංචි වුණා. නමුත් ඒ අතරතුර මගේ තවත් ඥාති සොහොයුරන් දෙදෙනෙකු වන අසීම් සහ සකීනේ අත්අඩංගුවට ගෙන තියෙනවා. ඊට කිසිම හේතුවක් දක්වා නැහැ. ඔවුන් රඳවා සිටින ස්ථානයක් ගැනත් තොරතුරක් නැහැ," යනුවෙන් ඔහු සඳහන් කර තිබුණි.

මේ මස අගදී පැවැත්වීමට නියමිත PTI පක්ෂයේ දැවැන්ත විරෝධතා පාගමනට පෙර, මහජන සාමය පවත්වාගෙන යාමේ (MPO) පනත යටතේ ඉම්රාන් ඛාන්ගේ සහෝදරියක වන අලීමා ඛාන් ද ලාහෝර් නුවරදී අත්අඩංගුවට ගැනීමෙන් අනතුරුවයි කාසිම් විසින් මෙම බරපතල චෝදනා එල්ල කර තිබෙන්නේ.

මූලාශ්‍ර: ANI