රුසියාවෙන් තෙල් ගන්නා ඉන්දියාව හා චීනය ඇතුළු රටවලට 100%ක බද්දක් පැනවීමට අමෙරිකාව සැරසෙයි..

Sep 18, 2026 at 11:30 AM

|

Lanka Leader

රුසියාවෙන් බොරතෙල් සහ ගෑස් මිලදී ගන්නා රටවල් සඳහා සියයට 100ක් දක්වා වූ දැවැන්ත තීරුබදු පැනවීමට සහ රුසියාවට එරෙහිව සම්බාධක දැඩි කිරීමට ජනාධිපති ඩොනල්ඩ් ට්‍රම්ප් වෙත පුළුල් බලතල ලබා දෙන නව පනත් කෙටුම්පතක් අමෙරිකානු නියෝජිත මන්ත්‍රී මණ්ඩලය විසින් සම්මත කර ඇති බව බීබීසී පුවත් සේවය වාර්තා කරයි.

මෙම පනත් කෙටුම්පත ජනාධිපති ට්‍රම්ප්ගේ අත්සනින් යුතුව නීතියක් බවට පත්වීමට නියමිත අතර, ඒ හමුවේ දැඩි අවදානමකට ලක්ව සිටින ප්‍රධානතම රටවල් වන්නේ රුසියානු බොරතෙල් විශාල වශයෙන් මිලදී ගන්නා ඉන්දියාව සහ චීනය බව අදාළ වාර්තාවේ සඳහන් වේ.

යුක්‍රේන ආක්‍රමණයත් සමඟ බටහිර වෙළෙඳපොළෙන් ඉවත් කෙරුණු රුසියානු බොරතෙල්, ඉහළ වට්ටම් සහිතව මිලදී ගනිමින් පසුගිය වසර හතරක කාලය තුළ සිය ආර්ථික වාසිය සලසා ගැනීමට ඉන්දියාව සමත් විය. එමඟින් ඉන්දියාව ඩොලර් බිලියන 12.6ක පමණ මුදලක් ඉතිරි කරගෙන ඇති බව ගණන් බලා තිබේ.

කෙසේ වෙතත්, අමෙරිකාවේ මෙම නව නීතිමය පියවරත් සමඟ එම ආර්ථික වාසිය ඉන්දියාව හමුවේ බරපතළ භූ-දේශපාලනික අවදානමක් බවට පත්ව ඇතැයි බීබීසී වාර්තාව පෙන්වා දෙයි.

අදාළ නීතිය යටතේ රුසියාවෙන් ඉන්ධන ආනයනය සීමා කිරීමට හෝ වොෂින්ටනය සමඟ සාකච්ඡා කිරීමට රටවලට දින 180ක කාලයක් හිමිවන නමුත්, ජනාධිපතිවරයාට එම කාලසීමාව කෙටි කිරීමේ බලයද පවතී.

මේ සම්බන්ධයෙන් අදහස් දක්වමින් ඉන්දීය රජය නිවේදනය කර ඇත්තේ, මෙම තත්ත්වය පිළිබඳ දැඩි විමසිල්ලෙන් පසුවන බවත්, සිය රටේ බිලියන 1.4ක් වන ජනතාවගේ බලශක්ති සුරක්ෂිතතාව තහවුරු කිරීමට කැපවී සිටින බවත්ය. මෙම කරුණ සම්බන්ධයෙන් පසුගිය මාස කිහිපය පුරා අමෙරිකානු බලධාරීන් සමඟ ඉහළ මට්ටමේ සාකච්ඡා පැවැත්වූ බවද ඉන්දියාව පවසයි.

අමෙරිකාව පැනවීමට සූදානම් වන මෙම තීරුබදු ඉන්දියාවට ආනයනය කෙරෙන රුසියානු තෙල් මත පනවන බද්දක් නොව, ඉන්දියාවෙන් අමෙරිකාවට අපනයනය කරනු ලබන ඉලෙක්ට්‍රොනික උපාංග, ඖෂධ, යන්ත්‍ර සූත්‍ර ඇතුළු භාණ්ඩ මත පනවන බද්දක් බැවින් එය ඉන්දීය අපනයන ක්ෂේත්‍රයට, ඉන්දීය රුපියලට මෙන්ම සමස්ත වෙළෙඳ ශේෂයට දැඩි බලපෑමක් එල්ල කරනු ඇතැයි ආර්ථික විශ්ලේෂකයෝ අනතුරු අඟවති.