අතුරුදහන් වූ ඥානසාර හිමි යළි මතුවේ.. ගෝඨාභය, සෞදි සහ නෝර්වේ ඩීල් ගැන හෙළිදරව්වක්..

Sep 16, 2026 at 08:35 AM

|

Lanka Leader

හිටපු පාර්ලිමේන්තු මන්ත්‍රී උදය ගම්මන්පිළ මහතාගේ Udaya Gammanpila යූටියුබ් නාලිකාව ඔස්සේ විකාශය කෙරෙන "චෝදනාගාරය" වැඩසටහනට එක්වෙමින් පූජ්‍ය ගලබොඩඅත්තේ ඥානසාර හිමියන්, උන්වහන්සේට එරෙහිව සමාජයේ පවතින ප්‍රධාන ආන්දෝලනාත්මක චෝදනා කිහිපයකටම සෘජුව පිළිතුරු ලබා දී තිබේ.

බුදුබල සේනා සංවිධානය පිහිටුවූයේ හිටපු ආරක්ෂක ලේකම් ගෝඨාභය රාජපක්ෂ මහතාගේ උවමනාවට නෙවෙයිදැයි නැගුණු ප්‍රශ්නයට පිළිතුරු දෙමින් උන්වහන්සේ සඳහන් කළේ 2012 වසරේදී බුදුබල සේනාව ආරම්භ කළේ කිසිදු දේශපාලනඥයෙකුගේ හෝ පක්ෂයක වුවමනාවට නොවන බවයි ගාලු ප්‍රදේශයේ පැවැති උත්සවයකදී ගෝඨාභය රාජපක්ෂ මහතා හමු වූ ඡායාරූපයක් පදනම් කරගෙන මංගල සමරවීර මහතා ඇතුළු පිරිස මෙම අසත්‍ය චෝදනාව ගොඩනැගූ බව උන්වහන්සේ වැඩිදුරටත් පැහැදිලි කළහ.

ඉස්ලාම් ආගමට අපහාස කරමින් සහරාන් වැනි අන්තවාදීන් බිහිවීමට පදනම දැමූ බවට නැගෙන චෝදනාව ප්‍රතික්ෂේප කළ ඥානසාර හිමියන්, සහරාන් 2011 වසරේදී ජාතික තව්හීත් ජමාත් සංවිධානය පිහිටුවා අන්තවාදී මතවාද පතුරුවන විටත් බුදුබල සේනා සංවිධානය බිහිවී නොතිබූ බව පෙන්වා දුන්හ. ලංකාව තුළ වහබ්වාදය සහ සලෆිවාදය ව්‍යාප්ත වූ ආකාරය පිළිබඳව සාක්ෂි සහිතව උන්වහන්සේ මෙහිදී කරුණු දක්වා ඇත.

එමෙන්ම නෝර්වේ රාජ්‍යය හරහා කොටි බෙදුම්වාදීන් සමඟ ඩීල් දැමූ බවට කෙරෙන චෝදනාවට පිළිතුරු දෙමින් උන්වහන්සේ සඳහන් කළේ, ප්‍රංශයේදී ඇතිවූ අර්බුදකාරී තත්ත්වයක් නිරාකරණය කරගැනීමට සහ පශ්චාත් යුද සමයේ ජාතික සංහිඳියාව වෙනුවෙන් "සිතමු" වැඩසටහන යටතේ නෝර්වේ හිදී සාකච්ඡාවකට සහභාගී වූ අතර එහිදී කිසිදු මුදලක් හෝ රහස් ගිවිසුමක් ඇති කර නොගත් බවයි.

සෞදි අරාබිය සමඟ ඩීල් දමා අන්තවාදයට එරෙහි සටන පාවාදුන්නේදැයි නැගුණු ප්‍රශ්නයට පිළිතුරු දෙමින් උන්වහන්සේ සඳහන් කළේ, සෞදි අරාබියේ රජකුමරුගේ ආරාධනයකට අනුව සෞදියේ නිල සංචාරයක නිරත වූ බවයි.

මියන්මාරයේ බෞද්ධ-මුස්ලිම් ගැටලුව විසඳීම සඳහා සාමදූතයෙකු ලෙස කටයුතු කිරීමට සෞදි පාර්ශ්වයෙන් ඉල්ලීමක් ලැබුණු බවත්, ඒ අනුව සෞදි ජාතික දින උත්සවයට සහභාගී වූ බවත් උන්වහන්සේ වැඩිදුරටත් සඳහන් කළහ.

සවිස්තරාත්මක වීඩියෝව නරඹන්න..