සෞදි අරාබියේ බටහිර කලාපයේ වෙසෙන ශ්‍රී ලාංකිකයන්ට හදිසි ආරක්ෂිත උපදෙස් මාලාවක්..

Sep 16, 2026 at 07:20 AM

|

Lanka Leader

සෞදි අරාබියේ බටහිර කලාපයේ මතුවෙමින් පවතින තත්ත්වය හමුවේ එහි වෙසෙන සියලුම ශ්‍රී ලාංකික පුරවැසියන් දැඩි අවධානයෙන් හා විමසිල්ලෙන් පසුවන ලෙස ජෙඩා හි පිහිටි ශ්‍රී ලංකා කොන්සල් ජනරාල් කාර්යාලය විශේෂ නිවේදනයක් නිකුත් කරමින් දැනුම් දෙයි.

එම නිවේදනය මගින් පෙන්වා දෙන්නේ ජංගම දුරකථන වෙත හදිසි අනතුරු ඇඟවීමේ සංඥා (National Waing Alerts) ලැබෙන අවස්ථාවලදී වහාම ක්‍රියාත්මක වන පරිදි පහත ආරක්ෂිත පියවර අනුගමනය කරන ලෙසයි.

ආරක්ෂිත ස්ථාන කරා යොමුවීමේදී ගොඩනැගිලි තුළ රැඳී සිටිමින් ජනේල, වීදුරු, බැල්කනි සහ වහලවල්වලින් ඈත්ව ආරක්ෂිත ස්ථාන තෝරාගන්නා ලෙසයි දැනුම් දෙන්නේ.

එළිමහනේ සිටී නම් වහාම ළඟම ඇති ආරක්ෂිත ගොඩනැගිල්ලකට ඇතුළු වීම හෝ ශක්තිමත් බිත්තියකට මුවා වන්නැයිද උපදෙස් දී තිබේ.

එමෙන්ම ජනතාව ඒකරාශී වන ස්ථානවලට යාමෙන් වළකින්නැයිද රථවාහන පදවමින් සිටින්නේ නම් වාහනය මාර්ගයේ පසෙකට ගෙන නවත්වා පාලම් සහ උස් ගොඩනැගිලිවලින් ඈත්ව සිටින්නැයිද දැනුම් දෙයි.

මේ අතර සිදුවීම් ඡායාරූපගත කිරීම, වීඩියෝ කිරීම, සමාජ මාධ්‍ය වෙත එක්කිරීම හෝ අදහස් දැක්වීමෙන් වළකින ලෙසත්, සෞදි අරාබියේ නීති රෙගුලාසි දැඩි ලෙස පිළිපදින ලෙස සඳහන් කරයි.

එමෙන්ම තහවුරු නොකළ තොරතුරු ප්‍රචාරය නොකර බලධාරීන්ගේ නිල නිවේදන මත පමණක් විශ්වාසය තබන ලෙසද උපදෙස් දෙයි.

මේ අතර හදිසි අවස්ථා සඳහා ඇමතුම් අංක වශයෙන්,

මක්කා සහ මදීනා කලාප සඳහා: 911

රාජධානියේ අනෙකුත් ප්‍රදේශ සඳහා: 998 දක්වා තිබේ.

ශ්‍රී ලංකා කොන්සල් ජනරාල් කාර්යාලයේ හදිසි සම්බන්ධතා අංකය: 056 098 6671 වන අතර එය හදිසි අවස්ථා සඳහා පමණක් භාවිතා කරන ලෙසයි දැනුම් දෙන්නේ.