ආණ්ඩුවේ බලු බද්දට පසු තන බද්දකුත් එයි ද?

Sep 16, 2026 at 06:16 AM

|

Lanka Leader

ශ්‍රී ලංකාවේ සුනඛයින් වසරක් පාසා ලියාපදිංචි කිරීම සහ සුනඛයන් ලියාපදිංචියට ගාස්තුවක් අයකර ගැනීම සම්බන්ධයෙන් නව පනත් කෙටුම්පතක් හදුන්වාදීමට ආණ්ඩුව විසින් පියවර ගෙන ඇත.

මේ සම්බන්ධයෙන් අදහස් දක්වන බොහෝ පාර්ශ්ව පෙන්වා දෙන්නේ 1848 බ්‍රිතාන්‍ය පාලන සමයේදී පනවන ලද ආන්දෝලනාත්මක "බලු බද්ද" මතකයට නංවමින්, වර්තමාන ආණ්ඩුව මගින් ද සුනඛයන් ලියාපදිංචි කිරීම සහ බදු අය කිරීම සම්බන්ධයෙන් නව තීරණයක් ගෙන ඇති බවය.

අතීතයේදී බ්‍රිතාන්‍ය ආණ්ඩුකාර ටොරිංටන් සාමිවරයා විසින් 1848 අංක 9 දරන පනත යටතේ බලු බද්ද හඳුන්වා දුන්නේ ද රාජ්‍ය ආදායම වැඩිකර ගැනීමට සහ ජලභීතිකා මර්දනයටයි. එදා එම බද්දට එරෙහිව දැඩි මහජන විරෝධයක් එල්ල වූ අතර, එය වීරපුරන් අප්පු ප්‍රමුඛ පිරිස 1848 සිදුකළ මාතලේ ඓතිහාසික කැරැල්ල හටගැනීමට ද ප්‍රධාන හේතුවක් විය.

එම ඓතිහාසික සිදුවීමට සමානව, වර්තමාන ආණ්ඩුව විසින් ද පළාත් පාලන ආයතන හරහා ගෘහස්ථ සුනඛයන් ලියාපදිංචි කිරීම සහ ඊට අදාළ ගාස්තු අය කිරීමට පියවර ගෙන ඇති අතර,  ආණ්ඩුව පෙන්වා දෙන්නේ මෙය ජලභීතිකා රෝගය පාලනය කිරීමට, වීදි සුනඛ ගහනය නිසි ලෙස කළමනාකරණය කිරීමට සහ මහජන සෞඛ්‍යය සුරක්ෂිත කිරීමට ගත් පියවරක් ලෙසය.

කෙසේ වෙතත්, අතීතයේ මෙන්ම වර්තමානයේ ද ජනතාව අතර මේ පිළිබඳව දැඩි සංවාදයක් සහ විවේචන මතුවෙමින් පවතී. ජනතාව පවසන්නේ පවතින ආර්ථික අපහසුතා හමුවේ මෙවැනි බදු අය කිරීම් හරහා තමන් තවදුරටත් පීඩාවට පත්වන බවයි. 

එමෙන්ම ඉදිරියේ දී බලු බද්දට අමතරව තන බද්දක් ද මෙලෙසම පැමිණිය හැකි බවටද විවිධ පාර්ශ්ව විසින් අදහස් පළකරමින් සිටී.

එදා බලු බද්දට එරෙහිව වීරපුරන් අප්පු ප්‍රමුඛ පිරිස විසින් සිදුකළ මාතලේ කැරැල්ල පිළිබඳව ප්‍රවීන ගායන ශිල්පී සුනිල් එදිරිසිංහයන් විසින් ගායන කළ පහත වීඩියෝවේ දැක්වෙන ගීතය මගින් මෙම සිදුවීම මනා ලෙස නිරූපනය වන බැවින් එම ගීතය මෙම සිදුවීමත් සමග යළි අපට සිහිපත් වන හෙයින් මෙසේ පළ කරමු.