රට අනතුරේ හෙලමින් NATO සරණ පතන්නේ නොදන්නාකමට ද?, මෝඩකමට ද?.. - වෛද්‍ය ජී. වීරසිංහ ගෙන් අනාවරණයක්

Sep 14, 2026 at 01:28 PM

|

Lanka Leader

ශ්‍රී ලංකා ආරක්ෂක ලේකම් සම්පත් තුයියකොන්තා මහතා කැනඩාවේදී NATO හමුදා ප්‍රධානීන් හමුවී, මෙරට අවි ආයුධ නවීකරණය කිරීමටත්, යුධ ගබඩා සැලසුම් කිරීමටත්, NATO සංවිධානය සහ ශ්‍රී ලංකාව අතර සබඳතා තවදුරටත් ඉහළ නැංවීමටත් කළ ආරාධනාව සම්බන්ධයෙන් ශ්‍රී ලංකාවේ කොමියුනිස්ට් පක්ෂය සිය දැඩි විරෝධය පළ කර සිටියි. 

Lanka Voice යූටියුබ් නාලිකාව සමඟ පැවැති සංවාදයකට එක්වෙමින් එම පක්ෂයේ ප්‍රධාන ලේකම් වෛද්‍ය ජී. වීරසිංහ මහතා සඳහන් කළේ, ආණ්ඩුවේ මෙම ක්‍රියාමාර්ගය දශක ගණනාවක් තිස්සේ ශ්‍රී ලංකාව අනුගමනය කළ නොබැඳි විදේශ ප්‍රතිපත්තියෙන් මුළුමනින්ම බැහැර වීමක් බවයි.

මෙවැනි හමුදා සන්ධානයක් සමඟ සම්බන්ධතා පැවැත්වීම හරහා ආණ්ඩුව ගෙන ඇත්තේ දැඩි අදූරදර්ශී තීරණයක් බවත්, මෙරට පාලකයින් ගන්නා මෙවැනි පියවර හේතුවෙන් ඉන්දියාව තුළද දැඩි අවධානයක් සහ කථිකාවක් නිර්මාණය වී ඇති බවත් වෛද්‍ය වීරසිංහ මහතා පෙන්වා දුන්නේය.

ඉන්දියාව වැනි අසල්වැසි බලවතුන් අසන්තෝෂයට පත් කරගැනීමෙන් මීට පෙරද රටට නරක අත්දැකීම්වලට මුහුණ දීමට සිදු වූ බව මතක් කර දුන් ඒ මහතා, ඉන්දියාව සහ ඇමෙරිකාව වැනි රටවල් සමඟ අත්සන් කරන ලද ආරක්ෂක ගිවිසුම්වල අන්තර්ගතය පිළිබඳවද රටට පැහැදිලි අනාවරණයක් සිදු කර නොමැති බව සඳහන් කළේය.

එසේම, ජාත්‍යන්තර මූල්‍ය අරමුදල මත පමණක් යැපෙන්නේ නැතිව, දකුණු කොරියාව වැනි රටවල් අනුගමනය කළ සැලසුම්ගත ආර්ථික ක්‍රමවේදයක් ඔස්සේ රටේ රාජ්‍ය හා පුද්ගලික අංශ රැකගත යුතු බව ඔහු අවධාරණය කළේය. තවද ආසියානු කලාපීය සහ ගෝලීය දකුණේ රටවල් සමඟ වෙළඳ හා ආර්ථික සබඳතා වැඩිදියුණු කරගනිමින් මෙරට ආර්ථික ස්වෛරීභාවය තහවුරු කරගැනීමේ අවශ්‍යතාවද ඔහු මෙහිදී වැඩිදුරටත් පෙන්වා දුන්නේය.

සවිස්තරාත්මක වීඩියෝව නරඹන්න..