වසරේ මේ දක්වා කාලය තුළ බෝම්බ ප්‍රහාර 6ක්..

Sep 12, 2026 at 06:39 AM

|

Lanka Leader

මෙම වසරේ මේ දක්වා කාලය තුළ සංවිධානාත්මක අපරාධ කල්ලි විසින් එල්ල කළ අත්බෝම්බ ප්‍රහාර 6ක් වාර්තා වී ඇති අතර, ඉන් ප්‍රහාර 3ක්ම ගල්කිස්ස පොලිස් කොට්ඨාසයෙන් වාර්තා වේ. 

බස්නාහිර පළාත තුළ පාතාල කල්ලි මෙලෙස බෝම්බ භාවිත කිරීම කෙරෙහි පොලිසියේ දැඩි අවධානය යොමුව ඇති අතර, මොවුන් යුද සමයේදී එල්.ටී.ටී.ඊ. සංවිධානයෙන් ලබාගත් බෝම්බ මෙලෙස භාවිත කරන්නේදැයි සැක පළකෙරේ. ඉදිරියේදී අපරාධ මර්දන කටයුතු සඳහා ත්‍රිවිධ හමුදාවේ සහාය ලබාගැනීමටද පොලිසිය සැලසුම් කරයි.

මේ අතර දෙහිවල, සිරිසඟබෝ මාවතේ පිහිටි නිවසකට ඊයේ (11) අළුයම 3.00ට පමණ එල්ල වූ අත්බෝම්බ ප්‍රහාරයකින් එකම පවුලේ සහෝදරයින් දෙදෙනෙකු ජීවිතක්ෂයට පත්ව, ඔවුන්ගේ පියා තුවාල ලබා තිබේ. මෙම ප්‍රහාරයෙන් මියගොස් ඇත්තේ 17 හැවිරිදි කසුන් රශ්මික සහ 11 හැවිරිදි දුමින්ද ගිහාන් යන පාසල් සිසුන් දෙදෙනා වන අතර, පාදයකට තුවාල සිදුවූ 55 හැවිරිදි නලින් තුසන්ත පෙරේරා නමැති ඔවුන්ගේ පියා මේ වන විට රෝහල්ගත කර ඇත.

සැකකරු අදාළ නිවසේ දොරට තට්ටු කර නිවැසියන් දොර විවෘත කිරීමත් සමඟ නිවස තුළට බෝම්බය එල්ල කර ඇති බව පොලිසිය පවසයි. තුවාල ලැබූ පියාට කිසිදු අපරාධ ඉතිහාසයක් නොමැති අතර, මෙම ප්‍රහාරය අත්වැරදීමකින් වෙනත් නිවසක් ඉලක්ක කරමින් එල්ල කරන ලද්දක් බවට සැක කෙරේ.

අසල්වැසි නිවසේ පදිංචි මොවුන්ගේ ඥාතීන් පිරිසක් මත්ද්‍රව්‍ය ජාවාරම්වලට සම්බන්ධ බවට තොරතුරු ඇති අතර, ඔවුන් විදේශගතව සිටින 'බඩෝවිට අංසක' නැමැති අපරාධකරුගේ සමීපතමයන් වේ. පෙරදින කළුබෝවිල පිහිටි නිවසකට එල්ල වූ බෝම්බ ප්‍රහාරයට පළිගැනීමක් ලෙස මෙම ප්‍රහාරය සැලසුම් කර ඇති අතර, නිවස මාරුවීමෙන් මෙම ඛේදනීය සිදුවීම සිදුව ඇති බවට විශ්වාස කෙරේ. 

සිද්ධිය සම්බන්ධයෙන් පොලිස් කණ්ඩායම් 3ක් පරීක්ෂණ පවත්වන අතර, ප්‍රහාරයට පැමිණි සැකකරු අතහැර දමා ගිය ත්‍රිරෝද රථය පහළ බෝපේ ප්‍රදේශයේදී සොයාගෙන ඇත.