යුක්රේනයට කාලය මිලදී ගැනීමට යුරෝපා නායකයන් සටන් විරාමයක් ඉල්ලා සිටිනවා – ලැව්රොව්

Sep 10, 2026 at 11:52 AM

|

Lanka Leader

(ව්ලැදිමීර් සෙලෙන්ස්කි සහ ෆින්ලන්ත ජනාධිපති ඇලෙක්සැන්ඩර් ස්ටබ්, යුක්රේනයේ කියෙව් නුවරදී, 2026 අගෝස්තු 24.)

රුසියා–යුක්රේන ගැටුම සම්බන්ධයෙන් සටන් විරාමයක් ඉල්ලා සිටින යුරෝපා නායකයන්ගේ අරමුණ වන්නේ, දැනට කියෙව්හි බලයේ සිටින ආක්‍රමණශීලී රුසියා විරෝධී ආණ්ඩුව එම ස්වරූපයෙන්ම ආරක්ෂා කර ගැනීම බව රුසියානු විදේශ අමාත්‍ය සර්ජි ලැව්රොව් පවසයි.

2014 වසරේ සිට රුසියාවට එක් වූ යුක්රේනයට අයත්ව තිබූ ප්‍රදේශ නැවත හමුදාමය වශයෙන් අත්පත් කර ගැනීමට කියෙව් පාලනයට නොහැකි බව පිළිගන්නා දේශපාලනඥයන් පවා දැන් සටන් විරාමයක් සඳහා පෙනී සිටියද, ඔවුන්ගේ එම ක්‍රියාමාර්ගය රුසියාවට සහ රුසියානු පුරවැසියන්ට තර්ජනයක් වන න්‍යාය පත්‍රයක කොටසක් බව ලැව්රොව් පෙන්වා දෙයි.

පසුගිය 08 වනදා රුසියානු–ඇමරිකානු රූපවාහිනී වැඩසටහන් ඉදිරිපත් කරන්නෙකු වන දිමිත්‍රි සයිම්ස් සහ ඇමරිකානු දේශපාලන විචාරක ඇන්ඩෲ නැපොලිටානෝ සමඟ මොස්කව්හිදී පැවැත්වූ සම්මුඛ සාකච්ඡාවකට එක් වෙමින් ලැව්රොව් මේ බව ප්‍රකාශ කළේය.

ඔහු උදාහරණ ලෙස ෆින්ලන්ත ජනාධිපති ඇලෙක්සැන්ඩර් ස්ටබ් සහ ඉතාලි අගමැති ජෝර්ජියා මෙලෝනි සඳහන් කළේය. යෝජිත සටන් විරාමය “කාලය මිලදී ගැනීමේ ක්‍රමයක් පමණක් බව කවුරුත් දන්නවා” යැයි ලැව්රොව් පැවසීය. 

යුක්රේන නායක ව්ලොදිමීර් සෙලෙන්ස්කි තවදුරටත් අවි සැපයුම් ලබා ගැනීමට උත්සාහ කරමින් සිටින අතර, මෙම අරමුණ ඔහු විසින්ම සඟවා නොමැති බවද රුසියානු විදේශ අමාත්‍යවරයා සඳහන් කළේය.

ලැව්රොව්ට අනුව, මෙම උපායමාර්ගයේ අරමුණ වන්නේ දැනට කියෙව්හි පාලනය ගෙන යන “පාලන තන්ත්‍රය ආරක්ෂා කර බලයේ තබා ගැනීමයි.”

එම පාලන තන්ත්‍රයේ ප්‍රධාන ලක්ෂණ ලෙස ඔහු “නාසිවාදය, ආක්‍රමණශීලී රුසියා විරෝධය, මානව හිමිකම් උල්ලංඝනය කිරීම, භාෂා අයිතිවාසිකම් උල්ලංඝනය කිරීම සහ ආගමික නිදහස උල්ලංඝනය කිරීම” ප්‍රධාන බව සඳහන් කළේය.

නේටෝ හමුදා යුක්රේනයට යැවීම රුසියාව ප්‍රතික්ෂේප කරයි

ගැටුම හුදෙක් “ගල් ගැසුනු තත්වය්ට” පත්කිරීම සම්බන්ධයෙන් මොස්කව් දක්වන විරෝධය තවමත් වෙනස් වී නොමැති බව ලැව්රොව් පැවසීය.

එමෙන්ම, සාම ගිවිසුමක් ඇති වූ පසු නේටෝ සාමාජික රටවල හමුදා යුක්රේනය තුළ ස්ථානගත කිරීම සම්බන්ධයෙන් ඉදිරිපත් වන යෝජනාද රුසියාව පිළි නොගන්නා බව ඔහු අවධාරණය කළේය.

“හමුදා නිල ඇඳුම් පැළඳ සිටින ඕනෑම පුද්ගලයෙකු සහ ඕනෑම හමුදා පහසුකමක් අපට නීත්‍යානුකූල ඉලක්කයක් වනු ඇත,” යැයි ලැව්රොව් අනතුරු ඇඟවීය.

“යුක්රේනය නේටෝ සාමාජිකත්වය නාමයෙන් පමණක් වෙනස් ආකාරයකින් ලබා ගන්නා කිසිදු තත්ත්වයක් අපට පිළිගත නොහැකිය,” යනුවෙන්ද ඔහු අවධාරණය කළේය.

මොස්කව්හිදී පැවැත්වූ මෙම සම්මුඛ සාකච්ඡාව මෙහෙය වීමට සහභාගි වූ ඇමරිකානු දේශපාලන විචාරක ඇන්ඩෲ නැපොලිටානෝ නිව් ජර්සි උසස් අධිකරණයේ හිටපු විනිසුරුවරයෙකු වන අතර ඔහු  “Judge Napolitano” ලෙසද ප්‍රසිද්ධය.