ජනපති වෙන්න පක්ෂ රැසකම ලොකු පොරයක්... පක්ෂ අභ්‍යන්තර පිල් බෙදීමත් දරුණුවටම

Jan 7, 2024 at 11:46 AM

|

Lanka Leader

දේශපාලන ආරංචි මාර්ගවලින් පැවසෙන පරිදි ජනාධිපති අපේක්ෂක ධූර සම්බන්ධයෙන්  දේශපාලන පක්ෂ රැසක බරපතළ ගැටුම්කාරී තත්වයක් නිර්මාණයවී තිබේ.

බොහෝ පක්ෂවල මන්ත්‍රීවරුන් කිහිප දෙනෙකුම ජනාධිපති අපේක්ෂක ධූර සඳහා ඉදිරිපත්වීමට කැමැත්ත පළ කිරීම සහ ඒ ඒ පක්ෂ තුළම අපේක්ෂක ධූර සම්බන්ධයෙන් පිල් බෙදීම් ඇතිවීම මෙම ගැටුම්කාරී තත්වයට හේතු වී ඇති බව එම ආරංචි මාර්ග සඳහන් කරයි.

ශ්‍රී ලංකා නිදහස් පක්ෂයේ සභාපති හිටපු ජනාධිපති මෛත්‍රිපාල සිරිසේන මහතා  ජනාධිපති ධුරයට තරග වැදීමට දැනටමත් කැමැත්ත පළ කර ඇති අතර කුරුණෑගල දිස්ත්‍රික් පාර්ලිමේන්තු මන්ත්‍රී දයාසිරි ජයසේකර මහතාද පක්ෂය සහයෝගය ලබා දෙන්නේ නම් ජනාධිපති අපේක්ෂක ධුරයට තරග වැදීමට සූදානම් බව පසුගියදා ප්‍රකාශ කර තිබිණි.

මේ අතර, ලංකා පොදු ජනපෙරමුණේ අපේක්ෂකයා ලෙස ඉදිරිපත් කිරීමට හය දෙනෙකු පිළිබඳ අවධානය යොමු කර ඇති බව වාර්තා වෙයි.

බැසිල් රාජපක්ෂ, නාමල් රාජපක්ෂ, දිනේෂ් ගුණවර්ධන, ධම්මික පෙරේරා යන මන්ත‍්‍රීවරුන්ට අමතරව මාධ්‍ය ආයතනයක හිමිකරුවකු මෙන්ම තවත් විශේෂ පුද්ගලයෙකු ගැනද ජනාධිපති අපේක්ෂකත්වය ලබාදීම සම්බන්ධයෙන් අවධානය යොමු කර ඇතැයි වාර්තා වේ.

දෙමළ ජනතාවගේ පක්ෂ එකඟත්වයකට පැමිණෙන්නේ නම් දෙමළ ජනතා සන්ධානයේ නායක උතුරු පළාතේ හිටපු ප්‍රධාන අමාත්‍ය සී.වී විග්නේෂ්වරන් මහතාද ජනාධිපති ධූරයට තරඟ වැදීමට සූදානම් බව  ප්‍රකාශ කළේය. එහෙත් ඔහුට අපේක්ෂක ධූරය ලබාදීමට දෙමළ ජාතික සන්ධානය ඇතුළු දේශපාලන පක්ෂ කිහිපයක්ම කැමැත්ත නොදක්වන බව ද වාර්තාවේ.