ලංකාවේ සමස්ත රාජ්‍ය ණය රුපියල් ට්‍රිලියන 32 ඉක්මවයි..

Sep 1, 2026 at 04:50 PM

|

Lanka Leader

ශ්‍රී ලංකාවේ සමස්ත රාජ්‍ය ණය ප්‍රමාණය අමෙරිකානු ඩොලර් බිලියන 97.952ක් (රුපියල් ට්‍රිලියන 32.977ක්) දක්වා ඉහළ ගොස් ඇති බව මුදල් අමාත්‍යාංශයේ රාජ්‍ය ණය කළමනාකරණ කාර්යාලය නිකුත් කළ අගෝස්තු 28 වැනිදා වාර්තාවේ සඳහන් වේ. මෙම දත්ත සටහන් වී ඇත්තේ පසුගිය ජූනි 30 වන විට පැවැති තත්ත්වය පදනම් කරගනිමිනි.

ණය බෙදීගොස් ඇති ආකාරය:

මධ්‍යම රජයේ මුළු ණය: ඩොලර් බිලියන 95.047 (රුපියල් ට්‍රිලියන 31.999)

රාජ්‍ය ව්‍යවසාය ණය (රජයේ ඇප මත): ඩොලර් බිලියන 2.885

පළාත් සභා හා පළාත් පාලන ආයතන ණය: ඩොලර් මිලියන 20

දේශීය හා විදේශීය ණය තත්ත්වය

ජූනි අවසාන වන විට මධ්‍යම රජයේ දේශීය ණය ප්‍රමාණය ඩොලර් බිලියන 57.039ක් (රුපියල් ට්‍රිලියන 19.203ක්) වේ. මෙයින් නොගෙවූ භාණ්ඩාගාර බැඳුම්කර වටිනාකම රුපියල් බිලියන 16,069ක් වන අතර, නොගෙවූ භාණ්ඩාගාර බිල්පත් ප්‍රමාණය රුපියල් බිලියන 2,372කි.

එමෙන්ම විදේශ ණය ප්‍රමාණය ඩොලර් බිලියන 38.008ක් දක්වා ඉහළ ගොස් ඇති අතර, එය පළමු කාර්තුවට (ඩොලර් බිලියන 37.468) සාපේක්ෂව ඩොලර් මිලියන 540ක වැඩිවීමකි.

බහුපාර්ශ්වික ණය: ඩොලර් බිලියන 14.802 (ආසියානු සංවර්ධන බැංකුව: ඩොලර් බිලියන 6.8851, ලෝක බැංකුව: ඩොලර් බිලියන 4.6662, IMF: ඩොලර් බිලියන 2.6152)

වාණිජ ණය: ඩොලර් බිලියන 12.409 (ජාත්‍යන්තර ස්වෛරීත්ව බැඳුම්කර යටතේ ඩොලර් බිලියන 10.0071ක් ඇතුළුව)

ද්විපාර්ශ්වික ණය: ඩොලර් බිලියන 10.797 (චීනය: ඩොලර් බිලියන 5.0067, ජපානය: ඩොලර් බිලියන 2.2727, ඉන්දියාව: ඩොලර් මිලියන 853.9)

ණය සේවාකරණය සහ ප්‍රතිව්‍යුහගත කිරීම

මෙම වසරේ දෙවන කාර්තුව තුළ රජයේ මුළු ණය සේවා ගෙවීම් ප්‍රමාණය රුපියල් බිලියන 2,698.6කි (දේශීය ණය සඳහා රුපියල් බිලියන 2,441.6ක් සහ විදේශ ණය සඳහා රුපියල් බිලියන 257.0ක් වශයෙන්).

Official Creditor Committee, චීන එක්සිම් බැංකුව, චීන සංවර්ධන බැංකුව සහ ජාත්‍යන්තර ස්වෛරීත්ව බැඳුම්කර හිමියන් (98%ක සහභාගීත්වයක් සහිතව) ඇතුළු පාර්ශ්ව රැසක් සමග ණය ප්‍රතිව්‍යුහගත කිරීමේ පියවර සාර්ථකව අවසන් කර ඇති අතර, ජපානය, ඉන්දියාව, ප්‍රංශය, එක්සත් රාජධානිය ඇතුළු රටවල් සමඟ ද්විපාර්ශ්වික ගිවිසුම් මත සාමාන්‍ය ණය සේවාකරණය නැවත ආරම්භ කර ඇත. කෙසේ වෙතත්, තවත් රටවල් 13කට අදාළ ණය ප්‍රතිව්‍යුහගත කිරීමේ කටයුතු තවදුරටත් සිදුවෙමින් පවතී.