''22 වන සංශෝධනය ඉදිරියට ගෙන යනවා නම් ජනමත විචාරණයකට යන්න'' - නීතිඥ සංගමය ඇතුළු වෘත්තීය සමිති 40ක් එක්වෙයි

Sep 1, 2026 at 05:10 AM

|

Lanka Leader

යෝජිත 22 වන ආණ්ඩුක්‍රම ව්‍යවස්ථා සංශෝධන පනත් කෙටුම්පතට තරයේ විරෝධය පළ කරමින් ශ්‍රී ලංකා නීතිඥ සංගමය (BASL) ගෙන ඇති ස්ථාවරයට සහය පළ කරමින්, දිවයින පුරා පිහිටි වෘත්තීය සමිති සහ වෘත්තීය සංවිධාන 40 ක නියෝජිතයින් එක්ව අද (31) ඒකාබද්ධ නිවේදනයකට අත්සන් තබා තිබේ.

විශ්වවිද්‍යාල ආචාර්ය සමිති සම්මේලනය (FUTA), රජයේ වෛද්‍ය නිලධාරීන්ගේ සංගමය (GMOA), දුම්රිය ස්ථානාධිපති සංගමය, සමස්ත ලංකා ශ්‍රේණිගත විදුහල්පති සංගමය, තැපැල් වෘත්තීය සමිතිය සහ රජයේ හෙද සංගමය ඇතුළු වෘත්තීය සංවිධාන හා වෘත්තීය සමිති 40 ක් ශ්‍රී ලංකා නීතිඥ සංගම් මූලස්ථානයට රැස්ව මෙම තීරණයට එළඹ ඇත.

නිවේදනයක් නිකුත් කරමින් ශ්‍රී ලංකා නීතීඥ සංගමය සඳහන් කරන්නේ, ශ්‍රේෂ්ඨාධිකරණ සහ අභියාචනාධිකරණ විනිසුරුවරුන්ගේ විශ්‍රාම යෑමේ වයස දීර්ඝ කිරීමට යෝජනා කිරීම මගින් අධිකරණයේ ස්වාධීනත්වයට, නීතියේ ආධිපත්‍යයට, ප්‍රජාතන්ත්‍රවාදයට සහ ජනතා පරමාධිපත්‍යයට ඍජු තර්ජනයක් එල්ල වන බව මෙම සංවිධාන පෙන්වා දෙන බවයි.

මෙම රැස්වීමේදී සහභාගී වූ වෘත්තීය සමිති සහ සංවිධාන ඒකමතිකව පහත තීරණවලට එළඹ තිබේ.

යෝජිත 22 වන ආණ්ඩුක්‍රම ව්‍යවස්ථා සංශෝධන පනත් කෙටුම්පතට එකහෙළා විරෝධය පළ කිරීම.

යෝජිත ව්‍යවස්ථා සංශෝධනය වහාම හකුලා ගන්නා ලෙස රජයෙන් ඉල්ලා සිටීම.

ඉහළ අධිකරණවල පවතින සියලුම පුරප්පාඩු ප්‍රමාදයකින් තොරව පිරවීමට රජය කටයුතු කිරීම.

රජය මෙම සංශෝධනය ඉදිරියට ගෙන යාමට උත්සාහ කරන්නේ නම්, ඒ සඳහා ජනමත විචාරණයකින් ජනතාවගේ තීරණය ලබා ගැනීම, යන තීරණ ඒ සඳහා ඇතුළත්ය.