සුරේෂ් සලේගේ මවගෙන් ජනපතිට ලිපියක්..

Aug 24, 2026 at 12:53 PM

|

Lanka Leader

රාජ්‍ය බුද්ධි සේවයේ හිටපු අධ්‍යක්ෂ, විශ්‍රාමික මේජර් ජෙනරාල් සුරේෂ් සලේගේ මව විසින් ජනපති අනුර කුමාර දිසානායක වෙත ඊයේ (23) දිනයේ යොමුකර තිබේ.

ජනාධිපති ලේකම් කාර්යාලය වෙත යොමුකර ඇති එම ලිපියේ ඇය සඳහන් කරන්නේ මෙවැනි අදහසක්.

'' මම මේ ලිපිය ලියන්නේ දේශපාලනඥයෙකු ලෙසවත් නීතිඥයෙකු ලෙසවත් නොවේ. මම ලියන්නේ තම පුතු වෙනුවෙන් වේදනාවෙන් සිටින මවක් ලෙසය. මගේ පුතු විශ්‍රාමික මේජර් ජෙනරාල් සුරේශ් සලේ වසර තිස් හතක් ශ්‍රී ලංකා යුද හමුදාවේ සේවය කළේය. ඔහු තම තරුණ කාලයත් පවුල සමග ගත කළ හැකි වටිනා වසර ගණනාවක්ද රට වෙනුවෙන් කැප කළේය. මවක් ලෙස ඔහු කළ ඒ කැපකිරීම මම හොඳින් දනිමි. අද වසර ගණනාවක සේවයෙන් පසු විශ්‍රාම ගොස් සිටින මගේ පුතු රැඳවුම් නියෝගයක් යටතේ සිට තම පුතු සිටිනු දැකීම වයෝවෘද්ධ මවක් වන මට ඉතා වේදනාකාරී අත්දැකීමකි.

ගරු ජනාධිපතිතුමනි,

මම කිසිදුු පරීක්‍ෂණයක් නතර කරන්නැයි ඉල්ලා නොසිටිමි. සාක්ෂි තිබේ නම් ඒවා විමර්ශනය කරන්න සත්‍ය සොයාගන්න.

නමුත් පරීක්ෂණය සිදුවන අතරතුර මගේ පුතුගේ රැඳවුම තවදුරටත් දීර්ඝ නොකරන්නැයි මම මවක් ලෙස ඉතා කරුණාවෙන් ඉල්ලා සිටිමි.

විමර්ශනය සාක්ෂි මත සිදුවිය යුතුය, රැඳවුම සාක්ෂිවලට ආදේශකයක් නොවිය යුතුය.

කරුණාකර මට ඔබතුමා හමුවීමට අවස්ථාවක් දෙන්න

මගේ කතාව ලිපියකින් කියවා අවසන් නොකර මගේ දෑස් දෙස බලා එය අසන්න .

මවකගේ වේදනාව මවකගෙන්ම අසන්න. මම කිසිදු විශේෂ වරප්‍රසාදයක් ඉල්ලා නොසිටිමි.මම ඉල්ලන්නේ යුක්තිය, මනුෂ්‍යත්වය සහ සාධාරණ අවස්ථාව පමණි.මගේ ජීවිතයේ මේ අවසන් කාලයේදී මගේම පුතුගේ නිදහස ඉල්ලා රටේ ජනාධිපතිවරයා ඉදිරියේ මෙලෙස ආයාචනා කිරීමට සිදුවීම මට ඉතා දුක්බර කරුණකි. අතිගරු ජනාධිපතිතුමනි, අද මම ඔබතුමාගෙන් ආයාචනා කරන්නේ ජනාධිපතිවරයා ලෙස පමණක් නොවේ.

පුතෙකු ලෙසත් මනුෂ්‍යයකු ලෙසත් මගේ හඬට සවන් දෙන්න මගේ පුතුට නිදහසේ නීතිය ඉදිරියේ මුහුණ දීමට අවස්ථාව ලබා දෙන්න.