නන්දා මාලිනී මාලිමාවක් වගේ.. - ඇමති බිමල් කියයි..

Aug 21, 2026 at 02:40 PM

|

Lanka Leader

අභාවප්‍රාප්ත ප්‍රවීණ ගායන ශිල්පිනී, විශාරද නන්දා මාලිනී මහත්මිය සිය අසමසම ගීත කලාව තුළින් මෙරට පරම්පරා ගණනාවකට සමාජ සාධාරණත්වය සහ විමුක්තිය වෙනුවෙන් මඟපෙන්වූ මාලිමාවක් බඳු වූ බව ප්‍රවාහන, මහාමාර්ග, වරාය හා සිවිල් ගුවන් සේවා අමාත්‍ය බිමල් රත්නායක මහතා පාර්ලිමේන්තුවේදී පැවසීය. 

ඇයගේ අභාවය වෙනුවෙන් ශෝකය පළ කරමින් අමාත්‍යවරයා සඳහන් කළේ, තමන් ඇතුළු පිරිස දේශපාලන ව්‍යාපාර වෙත යොමුවීමටත් ප්‍රථම ඇයගේ නිර්මාණ හරහා සමාජ අවබෝධය සහ සාධාරණත්වය පිළිබඳ මූලික සංකල්ප ලබාගත් බවයි.

ඇය හුදෙක් ගායිකාවක පමණක් නොව එක්තරා යුගයක ආත්මය නියෝජනය කළ කලාකාරිනියක් වූ අතර 1948 න් පසු සිංහල සුභාවිත සංගීතය පෝෂණය කිරීමට අතිමහත් මෙහෙවරක් කළාය. 

ජාතිවාදී බෙදීම්වලට එරෙහිව හඬ අවදි කරමින් 'සිහල ගිනි දණ්ඩේ - දමිළ වෙඩි උණ්ඩේ' වැනි ප්‍රබල නිර්මාණ හරහා සමාජයට ප්‍රබල පණිවිඩයක් ලබා දුන් ඇයගේ නිර්මාණාත්මක දායකත්වය, ජාත්‍යන්තර තලයේ බොබ් ඩිලන් (Bob Dylan) හෝ මිරියම් මාකෙබා (Miriam Makeba) වැනි ලෝකප්‍රකට විප්ලවීය කලාකරුවන්ගේ භූමිකාවට සමාන කළ හැකි බවත් ඔහු පැවසීය. 

එමෙන්ම 'සත්‍යයේ ගීතය', 'හේමන්තය' සහ 'පවන' වැනි ඇයගේ ප්‍රසංග මාලාවන් මෙරට ජනතා අරගලවල සහ සාධාරණත්වයේ හඬ බවට පත් වූ බව ඔහු පවසයි.

රජය විසින් ප්‍රකාශයට පත් කළ තෙදින ශෝක කාලය පිළිබඳවද මතක් කළ අමාත්‍යවරයා, නන්දා මාලිනිය සහ මහාචාර්ය සුනිල් ආරියරත්නයන් එක්ව මෙරට සංගීත ක්ෂේත්‍රයට සිදුකළ අනුපමේය මෙහෙවර සමස්ත ජාතියේම ප්‍රණාමයට ලක්විය යුතු බව වැඩිදුරටත් අවධාරණය කළේය.