ඩොලර් බිලියන ගණන් රට පැන්නූ බැංකු හතරක මැනේජර්ලා මෙන්න..

Aug 18, 2026 at 05:04 AM

|

Lanka Leader

භාණ්ඩ ආනයනය කිරීමේ මුවාවෙන් අමෙරිකානු ඩොලර් බිලියනයකට ආසන්න විදේශ විනිමය ප්‍රමාණයක් නීතිවිරෝධී ලෙස මෙරටින් පිටකිරීමේ මහා පරිමාණ ජාවාරමකට සම්බන්ධ බවට චෝදනා ලැබූ දිවයිනේ ප්‍රමුඛ පෙළේ පෞද්ගලික වාණිජ බැංකු හතරක කළමනාකරුවන් සිව්දෙනෙකු ලබන අගෝස්තු 20 වනදා දක්වා රක්ෂිත බන්ධනාගාරගත කිරීමට කොළඹ අතිරේක මහේස්ත්‍රාත් ලියාන් වරුසවිතාන මහතා නියෝග කර තිබේ.

අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන කොට්ඨාසය මගින් අත්අඩංගුවට ගෙන මෙලෙස රිමාන්ඩ් භාරයට පත් කෙරුණේ පහත සඳහන් නිලධාරීන්ය.

• සම්පත් බැංකුව - උමේෂ් රන්දික
• සෙලාන් බැංකුව - ශිරාන් මාරියෝ
• යූනියන් බැංකුව - ධර්මලිංගම් ප්‍රසාන්ත්
•  NDB - අමිල උදාර

ශ්‍රී ලංකාවට කිසිදු භාණ්ඩයක් සැබැවින්ම ආනයනය නොකර, කොටුව ප්‍රදේශයේ පිහිටි මුදල් හුවමාරු ආයතනයක් මාර්ගයෙන් විදේශ විනිමය රටින් පිටකර ඇති බවට ලද පැමිණිල්ලක් මත මෙම විමර්ශන ආරම්භ කර ඇත. බැංකු පහසුකම් අවභාවිත කරමින් සහ වංචාසහගත ලෙස මෙරට විදේශ සංචිතවල පැවති ඩොලර් මිලියන ගණනින් විදේශයන් වෙත යැවීමට මොවුන් කටයුතු කර ඇති බව මූලික විමර්ශනවලදී තහවුරු වී තිබේ.

පොලිස් මූල්‍ය අපරාධ විමර්ශන කොට්ඨාසය වෙනුවෙන් පෙනී සිටි ජ්‍යෙෂ්ඨ රජයේ නීතිඥ ඔස්වල්ඩ් ලක්ෂ්මන් පෙරේරා මහතා අධිකරණය හමුවේ කරුණු දක්වමින් කියා සිටියේ, මෙම ජාවාරමට සම්බන්ධ අනෙකුත් පුද්ගලයන් හඳුනා ගැනීම සඳහා තවදුරටත් පුළුල් පරීක්ෂණ ක්‍රියාත්මක වන බවයි.

මෙම අවස්ථාවේදී සැකකරුවන්ට ඇප හිමිවුවහොත් එය විමර්ශනවලට දැඩි බාධාවක් වන බැවින් ඔවුන් රක්ෂිත බන්ධනාගාරගත කරන ලෙසත්, සිද්ධියට අදාළ තවත් සැකකරුවන් කිහිපදෙනෙකු අත්අඩංගුවට ගැනීමට නියමිත බවත් ජ්‍යෙෂ්ඨ රජයේ නීතිඥවරයා වැඩිදුරටත් අවධාරණය කළේය.