පඳුරු අස්සේ හැංගිලා වැරදි කරන රියැදුරන් අල්ලන්න යන්න එපා.. – මාර්ග ආරක්‍ෂක දිසාව භාර නි. පොලිස්පති

Aug 17, 2026 at 08:21 AM

|

Lanka Leader

මාර්ග රථවාහන වරදක් සම්බන්ධයෙන් වාහනයක් නතර කිරීමට අවශ්‍ය වූ විට පොලිස් නිලධාරීන් වෙනත් මාර්ග පරිශීලකයන්ට පැහැදිලිව පෙනෙන ස්ථානයක සිට විනිවිදභාවයෙන් සහ වෘත්තීය මට්ටමින් එම මෙහෙයුම සිදු කළ යුතු බවත්, හුදෙකලා ස්ථානවල හෝ පඳුරු අස්සේ සැඟවී සිටිමින් රියැදුරන් නතර කිරීමට උත්සාහ නොකළ යුතු බවත් රථවාහන සහ මාර්ග ආරක්ෂක දිසාව භාර නියෝජ්‍ය පොලිස්පති ඩබ්.පී.ජේ. සේනාධීර මහතා අවධාරණය කරයි.

මහජනතාවට සැකයක් ඇතිවන පරිදි අත්තනෝමතික ලෙස වාහන නතර කිරීම හෝ මුදල් ලබා ගැනීමේ අරමුණින් මෙහෙයුම් නොකළ යුතු බවත්, පාරිසරික වශයෙන් මහජනතාවට පෙනෙන බස් නැවතුම්පොළක් වැනි සුදුසු ස්ථානයක දී පමණක් වාහන නතර කළ යුතු බවත් හෙතෙම සඳහන් කළේය.

රියැදුරන් කිසිදු හේතුවක් මත පොලිස් නිලධාරින්ට ඍජුව මුදල් ලබා නොදිය යුතු අතර දඩ මුදල් ගෙවිය යුත්තේ තැපැල් කාර්යාල වැනි නීත්‍යනුකූල මාර්ග හරහා පමණක් බවද, මාර්ගයේ දී ලබා දෙන අල්ලස් දීම් හෝ ගැනීම් බරපතළ වරදක් බවද හෙතෙම සඳහන් කළේය.

දඹුල්ල අධිවේගී මාර්ග ඒකකයට අනුයුක්ත පොලිස් නිලධාරියකු අල්ලස් ගන්නා ආකාරය දැක්වෙන වීඩියෝවක් සමාජ මාධ්‍ය පුරා ශීඝ්‍රයෙන් සංසරණය වීමත් සමග හෙතෙම එලෙස සඳහන් කළේය.

අදාළ සිද්ධිය සම්බන්ධයෙන් දැනටමත් පරීක්ෂණ ආරම්භ කර ඇති අතර සැකකාර පොලිස් නිලධාරියා රථවාහන රාජකාරිවලින් ඉවත් කර වෙනත් පොලිස් ස්ථානයකට මාරු කර යවා තිබේ.

අල්ලස් හෝ දූෂණ චෝදනා හමුවේ ශ්‍රී ලංකා පොලිසිය කිසිදු නම්‍යශීලීතාවයක් නොදක්වන බවත් වරදකරුවන්ට එරෙහිව අල්ලස් පනත යටතේ දැඩි තීන්දු ගන්නා බවත් නියෝජ්‍ය පොලිස්පතිවරයා කීය.

- දිවයින