දකුණු කොරියාවට කිම් සමඟ ඇති “ඉතා යහපත් සබඳතාව” ඩොනල්ඩ් ට්‍රම්ප්ගේ කනගාටුවට හේතුවෙලා

Aug 17, 2026 at 04:39 AM

|

Lanka Leader

උතුරු කොරියානු නායක කිම් ජොන් උන් සමඟ දකුණු කොරියාවට ඇති “ඉතා යහපත් සබඳතාව” හේතුවෙන්, දකුණු කොරියාව සමඟ පවත්වන ඒකාබද්ධ හමුදා අභ්‍යාස සැලකිය යුතු ලෙස සීමා කරන ලෙස ඇමරිකානු ජනාධිපති ඩොනල්ඩ් ට්‍රම්ප් පෙන්ටගනයට නියෝග කර තිබේ.

ඊයේ(16) Truth Social සමාජ මාධ්‍ය වේදිකාවේ පළ කළ සටහනක ට්‍රම්ප් සඳහන් කළේ අද (16) ආරම්භ වීමට නියමිත වාර්ෂික හමුදා අභ්‍යාස සඳහා සහභාගි වීමට වොෂින්ටනය එකඟ වී තිබීම සම්බන්ධයෙන් තමන් “සතුටු නොවන” බවයි.

“මෙම අභ්‍යාස මිල අධික වනවා පමණක් නොව, එම වියදම්වලින් විශාල කොටසක් වෙනදා මෙන්ම ඇමරිකා එක්සත් ජනපදය විසින් දරනු ලබනවා. එමෙන්ම, ඒවා සම්පූර්ණයෙන්ම නුසුදුසු සහ සතුරු සංඥාවක් ලබා දෙනවා,” යනුවෙන් ඔහු ලියා තිබේ.

තම ජනාධිපති ධුර කාලය තුළ උතුරු කොරියාව “තර්ජනයක් නොවන සහ ගෞරවාන්විත” රටක් ලෙස හැසිරී ඇති බවද ට්‍රම්ප් සඳහන් කළේය.

හමුදා අභ්‍යාස සම්පූර්ණයෙන්ම අවලංගු කිරීමට දැන් ප්‍රමාද වැඩි බැවින්, ඒවා “සැලකිය යුතු ලෙස අඩු කරන” ලෙස යුද ලේකම් පීට් හෙග්සෙත්ට උපදෙස් දුන් බවද ට්‍රම්ප් පැවසීය.

දින 11ක් පුරා පැවැත්වීමට නියමිත Ulchi Freedom Shield හමුදා අභ්‍යාස අගෝස්තු 27 දක්වා පැවැත්වීමට සැලසුම් කර තිබූ අතර, දකුණු කොරියානු හමුදා භටයන් 18,000ක් පමණ සහ ඇමරිකානු හමුදා භටයන් 5,000ක් පමණ ඊට සහභාගි වීමට නියමිතව තිබිණි.

ඉරානයට එරෙහි වොෂින්ටනයේ මෙහෙයුමට එක්වීම දකුණු කොරියාව ප්‍රතික්ෂේප කිරීම සම්බන්ධයෙන්ද ට්‍රම්ප් සෝල් පාලනය විවේචනය කළේය.

“ඉරාන ඉස්ලාමීය ජනරජය න්‍යෂ්ටික අවිවලින් තොර කිරීමේ අපගේ මෙහෙයුමට අප සමඟ එක්වීමට කැමතිදැයි මම මෑතකදී දකුණු කොරියානු ජනාධිපතිවරයාගෙන් විමසුවා. ඔවුන් ‘නැහැ, ස්තූතියි!’ යනුවෙන් පැවසුවා,” යනුවෙන්ද ඔහු ලියා තිබේ.