ඉරාන යුද්ධයට ඇමෙරිකානුවන්ගේ සහාය පහළට - Reuters මතවිමසුමෙන් හෙළිවෙයි..

Jul 28, 2026 at 01:03 PM

|

Lanka Leader

අමෙරිකා එක්සත් ජනපදය සහ ඉරානය අතර පවතින සන්නද්ධ ගැටුම් සඳහා ඇමෙරිකානු ජනතාවගෙන් හිමිවන සහාය පහත වැටී ඇති බවත්, එම හමුදා ක්‍රියාමාර්ගවල පැහැදිලි අරමුණක් ප්‍රකාශ කිරීමට ජනාධිපති ඩොනල්ඩ් ට්‍රම්ප් අසමත් වී ඇති බවත් නවතම Reuters මතවිමසුමකින් හෙළි වී ඇති බවට තොරතුරු වාර්තා වේ.

මාස පහක් තිස්සේ ඇදී යන මෙම යුදමය තත්ත්වය සම්බන්ධයෙන් සිදුකළ මතවිමසුමට අනුව, ඉරානයට එරෙහි යුද්ධයට සහාය දක්වන්නේ ඇමෙරිකානුවන්ගෙන් තුනෙන් එකක ප්‍රමාණයක් බවයි එම මතවිමසුමෙන් අනාවරණය වි ඇත්තේ.

ඉරාන නායකයින් බලයෙන් පහකිරීමට සහාය වීම, ඉරානයේ බැලස්ටික් මිසයිල බලපෑම නැති කිරීම සහ න්‍යෂ්ටික ආයුධ ලබා ගැනීම වැළැක්වීම වැනි විවිධ අරමුණු ට්‍රම්ප් විසින් වරින් වර ඉදිරිපත් කර තිබේ.

එහෙත් මතවිමසුමට අනුව, ඇමෙරිකානුවන්ගෙන් 69% ක් (ඊට රිපබ්ලිකන් පාක්ෂිකයන් 10 දෙනෙකුගෙන් 4 දෙනෙකුද ඇතුළත් වේ) විශ්වාස කරන්නේ ඉරානයට එරෙහි හමුදා මැදිහත්වීමේ ප්‍රධාන අරමුණු මොනවාදැයි ට්‍රම්ප් විසින් පැහැදිලි කර නොමැති බවයි.

ධවල මන්දිර ප්‍රකාශිකා ඔලිවියා වේල්ස් සඳහන් කළේ ජනාධිපති ට්‍රම්ප් තීරණ ගනු ලබන්නේ වෙනස් වන ජනමත විචාරණ මත පදනම්ව නොවන බවයි.

ඉරානය කිසිදිනෙක න්‍යෂ්ටික ආයුධ ලබා ගැනීම වැළැක්වීම ඇමෙරිකාවේ ප්‍රධාන අරමුණ බව අවධාරණය කළ ඇය, "ඇමෙරිකානු ජනතාවට වඩාත්ම වැදගත් වන්නේ ඔවුන්ගේ ආරක්ෂාව උදෙසා තීරණාත්මක පියවර ගන්නා සේනාධිනායකයෙකු සිටීමයි" යනුවෙන් ඇය පවසයි.

පෙබරවාරි 28 වන දින ඇමෙරිකාව සහ ඊශ්‍රායලය විසින් ඉරානයට ප්‍රහාර එල්ල කිරීමෙන් පසුව, මෙම යුද්ධය සඳහා ලැබෙන ජනප්‍රියතාව 40% ට වඩා අඩු මට්ටමක පවතින බවයි වාර්තා වෙන්නේ.

මෙය ඇමෙරිකාව මැදිහත් වූ පසුගිය අනෙකුත් යුද්ධවල මුල් කාලසීමාවන්ට සාපේක්ෂව කැපී පෙනෙන අඩුවීමක් බව සඳහන්.

පසුබිම් වෙනස් වුවද, 2003 සිට 2011 දක්වා පැවැති ඉරාක යුද්ධයේ මුල් මාසවලදී 70% ක පමණ ඇමෙරිකානු ජනතාවගේ සහාය ඊට හිමිවිය.

එළඹෙන නොවැම්බර් මාසයේ පැවැත්වෙන කොංග්‍රස් මණ්ඩල මැතිවරණයට පෙර, යුද්ධය කෙරෙහි පවතින ජනප්‍රියතාව අඩුවීම ට්‍රම්ප්ට සහ රිපබ්ලිකන් පක්ෂයට දැඩි අභියෝගයක් වී ඇති බවයි වාර්තා වෙන්නේ.