කොළඹ වරාය නගරයේ චීන ජාතිකයන් පිරිසක් අතර ගැටුමක්.. එක් අයෙකු ඝාතනය කරලා.. දෙදෙනෙකුට තුවාල..

Jul 23, 2026 at 07:36 PM

|

Lanka Leader

කොළඹ වරාය නගර (Colombo Port City) පරිශ්‍රය තුළදී චීන ජාතිකයින් පිරිසක් අතර ඇති වූ දරුණු ප්‍රචණ්ඩකාරී ගැටුමකින් එක් චීන ජාතිකයෙකු ඝාතනය වී තවත් දෙදෙනෙකු බරපතල තුවාල ලබා ඇති බව කොළඹ වරාය පොලිසිය පවසයි.

පොලිස් පරීක්ෂණවලට අනුව මෙම සිදුවීම අලුයම 2:00 ත් 3:00 ත් අතර කාලයේදී සිදුව තිබේ. වරාය නගරයේ පාදක පාලම (suspension bridge) ආසන්නයේ මසුන් අල්ලමින් සිටි චීන ජාතිකයින් තිදෙනෙකු වෙත කළු පැහැති වෑන් රථයකින් පැමිණි 15 ත් 20 ත් අතර පිරිසක් විසින් මෙලෙස ප්‍රහාරය එල්ල කර ඇත. ආයුධ සන්නද්ධව පැමිණි එම පිරිස, මසුන් අල්ලමින් සිටි පුද්ගලයින්ගේ දෑත් සහ දෑස් බැඳ, දරුණු ලෙස පහරදී බලහත්කාරයෙන් වෙනත් වාහනවලට පටවාගෙන පැහැරගෙන ගොස් තිබේ.

පැහැරගනු ලැබූ පුද්ගලයින් දෙදෙනෙකු පසුව වරාය නගර පරිශ්‍රයේම පිහිටි රථ ගාලක අතහැර දමා ගොස් තිබියදී, ඔවුන් විසින්ම බැඳුම් ලිහාගෙන අලුයම 5:00 ට පමණ කොළඹ වරාය පොලිසිය වෙත පැමිණිලි කර ඇත. පසුව ඔවුන් දෙදෙනා වැඩිදුර ප්‍රතිකාර සඳහා පෞද්ගලික රෝහලකට ඇතුළත් කෙරිණි. කෙසේ වෙතත්, පැහැරගනු ලැබූ තෙවැනි චීන ජාතිකයා වන හාවෝ සොං (Hao Song) නමැත්තා අතුරුදහන්ව සිටි අතර, පසුව ඔහුගේ මළ සිරුර ඇහැලියගොඩ, කරඳන ප්‍රදේශයේ කැලෑබද ස්ථානයක ගල් ගොඩකට යටකර තිබියදී සොයාගන්නා ලදී. සොයාගන්නා අවස්ථාවේදීද ඔහුගේ දෑස් සහ දෑත් බඳින ලදුව තිබූ බව පොලිසිය තහවුරු කරයි.

සිදුවීම වූ ස්ථානයේ තිබී පොලිසිය විසින් ගිනිඅවියක් සහ සන්නිවේදන උපකරණයක් සොයාගෙන ඇති අතර, චීන සංවිධානාත්මක කල්ලියක් අතර පැවති ආරවුලක් මත මෙම පැහැරගැනීම සහ ඝාතනය සිදුවන්නට ඇති බවට පොලිසිය සැක කරයි. සිද්ධියෙන් පසුව ශ්‍රී ලංකාවෙන් පලායාමට උත්සාහ කළ චීන ජාතිකයින් දෙදෙනෙකු බණ්ඩාරනායක ජාත්‍යන්තර ගුවන්තොටුපළේදී (BIA) ආරක්ෂක අංශ මගින් අත්අඩංගුවට ගෙන තිබෙන අතර, සිද්ධිය සම්බන්ධයෙන් කොළඹ වරාය පොලිසිය සහ විශේෂ පොලිස් කණ්ඩායම් කිහිපයක් වැඩිදුර විමර්ශන පවත්වයි.

මෙම සිදුවීම සම්බන්ධයෙන් විශේෂ නිල ප්‍රකාශයක් නිකුත් කරමින් ශ්‍රී ලංකාවේ චීන තානාපති කාර්යාලය සඳහන් කළේ, තානාපති කාර්යාලය මෙම සිදුවීම පිළිබඳව දැඩි අවධානයෙන් පසුවන බවයි. සිද්ධියට අදාළ තොරතුරු හැකි ඉක්මනින් තහවුරු කර ගැනීමට සහ චීන ජාතිකයන්ගේ පුද්ගලික ආරක්ෂාව මෙන්ම නීත්‍යානුකූල අයිතිවාසිකම් සුරක්ෂිත කිරීමට පූර්ණ පරීක්ෂණයක් පවත්වන ලෙස ශ්‍රී ලංකා පොලිසියෙන් ඉල්ලා සිටින බවත්, ශ්‍රී ලංකාවේ වෙසෙන චීන ජාතිකයන්ට තම ආරක්ෂාව පිළිබඳ දැනුවත්භාවය ඉහළ නැංවීමටත්, හදිසි අවස්ථාවකදී වහාම පොලිසියට වාර්තා කර උපකාර සඳහා තානාපති කාර්යාලය ඇමතීමටත් තානාපති කාර්යාලය වැඩිදුරටත් මතක් කර සිටී.