මාලිමා සංවිධායක පහර දී මන්ත්‍රී රෝහලේ..

Jul 22, 2026 at 05:30 PM

|

Lanka Leader

කොටගල ප්‍රාදේශීය සභාවේ ඊරොස්ට් ප්‍රජාතන්ත්‍රවාදි පක්ෂයේ ප්‍රාදේශීය සභා මන්ත්‍රී ගනේෂන් රාජේන්ද්‍රන්ට ජාතික ජන බලවේගයේ කොටගල ප්‍රදේශයේ සංවිධායක සහ ආධාරකරුවෙකු විසින් පහර දුන් බව කියමින් රෝහල් ගතව නේවාසිකව ප්‍රතිකාර ලබයි.

මෙම පහර දීම කොටගල නගරයේදි 21 වැනිදා පස්වරු 3:00ට පමණ සිදු වූ බවද එම මන්ත්‍රීවරයා පවසයි.

ජාතික ජන බලවේගයේ කොටගල ප්‍රදේශයේ සංවිධායක සහ ඔහුගේ ආධාරකරුවෙකු විසින් තමන් මෝටර් රථයෙන් (21) වැනිදා සවස නිවස වෙත යමින් සිටියදී කොටගල නගරයෙදි සිය මෝටර් රථය හරස් කර නතර කරවාගෙන ඔවුන් දෙදෙනාම තමන්ට පහර දී තුවාල කළ බවයි ඔහු පවසන්නේ.

පහරදීමෙන් පසුව මෝටර් රථයේ යතුර ඔවුන් විසින් රැගෙන ගියේ යැයිද පවසමින් මන්ත්‍රීවරයා දිඹුල පතන පොලිසිය වෙත පැමිණිල්ලක්ද සිදු කර තිබිණි.

කොටගල ප්‍රාදේශීය සභාවේ ජාතික ජන බලවේගයේ උප සභාපතිනියට සභාව තුළදී බැන වැදීම නතර කරන ලෙස බල කරමින් තමන්ට පහර දුන් බවද එම මන්ත්‍රීවරයා කියා සිටි.

මේ අතර සැකකරුවන් ඔහුගේ නිවසට පැමිණ සිද්ධිය පොලිසිය වෙත පැමිණිලි කළහොත් මීට වඩා දේවල්වලට ඉදිරියේදී මුහුණ පෑමට සිදු වන බව කියා බිරිඳට තර්ජනය කර ඇති බවද මන්ත්‍රීවරයා පවසයි.

මේ අතර පහර දුන්නේ යැයි කියන සැකකරුවන් දෙදෙනා අදාළ මන්ත්‍රිවරයා තමන්ට පහර දුන් බව පවසමින් නාවලපිටිය දිස්ත්‍රික් මහ රෝහලට ඇතුළත් වී නේවාසිකව ප්‍රතිකාර ලබන බවත් වාර්තා වේ.

එමෙන්ම සිදුවීමට සම්බන්ධ තිදෙනා රෝහලෙන් බැහැර වීමෙන් පසු අදාළ නෛතික පියවර ගන්නා බවයි දිඹුල පතන පොලිසියේ ස්ථානාධිපතිවරයා කියා සිටියේ.