හිටපු පොලිස්පති සී.ඩී. වික්‍රමරත්නගේ අවසන් කටයුතු පොලිස් ගෞරව සහිතව අද බොරැල්ල පොදු සුසාන භූමියේදී..

Jul 20, 2026 at 07:52 AM

|

Lanka Leader

ශ්‍රී ලංකාවේ 35 වන පොලිස්පතිවරයා ලෙස කටයුතු කළ සී.ඩී. වික්‍රමරත්න මහතාගේ දේහය පිළිබඳ අවසන් කටයුතු අද (20) පස්වරුවේ බොරැල්ල පොදු සුසාන භූමියේදී සිදු කිරීමට නියමිතව ඇත. 

ඒ මහතා වෙනුවෙන් පූර්ණ පොලිස් ගෞරව දැක්වීමට ද කටයුතු සූදානම් කර තිබේ.

මියයන විට 63 වැනි වියේ පසුවූ වික්‍රමරත්න මහතා, පසුගිය සිකුරාදා සිදුවූ වෙඩි වැදීමකින් අවාසනාවන්ත ලෙස ජීවිතක්ෂයට පත්විය. ඔහුගේ මරණය සියදිවි හානිකර ගැනීමක් බවට සැකකෙරෙන අතර, ඔහු සිය ආරක්ෂක නිලධාරියාගේ ගිනි අවියෙන් වෙඩි තබාගෙන ඇති බවට පොලිසිය මූලික විමර්ශන මඟින් සැක පළ කරයි.

නැගෙනහිර කොළඹ රෝහලේ අධිකරණ වෛද්‍ය නිලධාරීවරයා විසින් දේහය සම්බන්ධයෙන් සිදුකළ පශ්චාත් මරණ පරීක්ෂණයේදී විවෘත තීන්දුවක් ලබාදී ඇත. මේ වනවිට ශරීර කොටස් මෙන්ම වෙඩි තැබීමට යොදාගත් බව කියන ගිනි අවිය ද වැඩිදුර පරීක්ෂණ සඳහා රජයේ රස පරීක්ෂකවරයා වෙත යොමු කර තිබේ.

බස්නාහිර පළාත දකුණ දිසා අපරාධ කොට්ඨාසය සහ මාලබේ පොලිසිය සිද්ධිය සම්බන්ධයෙන් පුළුල් විමර්ශනයක් අරඹා ඇති අතර, එහි පියවරක් ලෙස හිටපු පොලිස්පතිවරයාගේ බිරිඳගෙන් සහ ආරක්ෂක නිලධාරීන් තිදෙනෙකුගෙන් ප්‍රකාශ සටහන් කරගෙන ඇත.

1986 වසරේදී පොලිස් සේවයට එක්වූ සී.ඩී. වික්‍රමරත්න මහතා, 2019 පාස්කු ඉරුදින ත්‍රස්ත ප්‍රහාරයෙන් පසු එවකට පොලිස්පති පූජිත් ජයසුන්දර මහතාගේ සේවය අත්හිටුවීමත් සමඟ වැඩබලන පොලිස්පති ලෙස පත් කෙරිණි. අනතුරුව 2020 නොවැම්බර් 27 වනදා ඔහු ස්ථිර වශයෙන්ම පොලිස්පති ධුරයට පත් විය.

2023 මාර්තු මාසයේදී විශ්‍රාම යාමට නියමිතව සිටියද, නව පොලිස්පතිවරයකු පත් කරන තෙක් එවකට ජනාධිපති රනිල් වික්‍රමසිංහ මහතා විසින් අවස්ථා කිහිපයකදීම සේවා දිගු ලබාදීම නිසා ඔහු තවත් මාස 8ක පමණ කාලයක් එම ධුරයේ කටයුතු කළේය. ඒ අනුව ඒ මහතා නිල වශයෙන් විශ්‍රාම ගනු ලැබුවේ 2023 නොවැම්බර් 23 වනදාය.