2025ට වඩා තේ නිෂ්පාදනය කිලෝග්‍රෑම් මිලියන 3.88කින් පහළට.. - නවතම වාර්තාවකින් හෙළිවෙයි

Jul 17, 2026 at 01:38 PM

|

Lanka Leader

ජූලි මස 14 සහ 15 යන දිනවල පැවැත්වූ ෆෝබ්ස් ඇන්ඩ් වෝකර් තේ බ්‍රෝකර්වරුන්ගේ 27 වන සතිපතා තේ වෙන්දේසියේදී සමස්ත තේ කිලෝග්‍රෑම් 6,160,485ක් අඩංගු පැකේජ 12,208ක් ඉදිරිපත් කර තිබිණි.

මෙවර වෙන්දේසියේදී වෙළෙඳපොළේ පොදු ඉල්ලුම සාමාන්‍ය මට්ටමක පැවති බවයි වාර්තා වෙන්නේ.

2026 වසරේ ජනවාරි සිට ජූනි දක්වා ගතවූ පළමු මාස හයක සමුච්චිත තේ නිෂ්පාදනය කිලෝග්‍රෑම් මිලියන 131.89ක් වන අතර, එය 2025 වසරේ එම කාලසීමාවේ නිෂ්පාදනය වූ කිලෝග්‍රෑම් මිලියන 135.77ට වඩා කිලෝග්‍රෑම් මිලියන 3.88ක පසුබෑමක් පෙන්නුම් කරයි. එය 2.86%ක පසුබෑමකි.

පහතරට තේ සඳහා ලීෆි (Leafy), සෙමි-ලීෆි (Semi Leafy) සහ ටිපී (Tippy) කාණ්ඩ යටතේ යහපත් ඉල්ලුමක් දක්නට ලැබුණද, ප්‍රිමියම් කාණ්ඩයේ තේ සඳහා පැවතියේ අඩු ඉල්ලුමකි.

බටහිර බෑවුම්වලින් පැමිණි ඉහළ මිල ගණන් යටතේ පැවති ඕතඩොක්ස් සහ රොටොවේන් තේ වර්ග සඳහා සුදුසු මිලක් ඉදිරිපත් නොවීම හේතුවෙන් සැලකිය යුතු තේ ප්‍රමාණයක් අලෙවි නොවී ඉවත් කර ගැනීමට නිෂ්පාදකයන්ට සිදු විය.

නුවරඑළිය කලාපයේ තේ වෙළෙඳපොළද මන්දගාමී ස්වභාවයක් ගත් අතර, ඌව සහ උඩපුස්සැල්ලාව ප්‍රදේශවල උසස් තත්ත්වයේ තේ ස්ථාවර මට්ටමක පැවති නමුත් බාල වර්ගයේ තේ මිල ගණන් සීඝ්‍රයෙන් පහත වැටිණි.

මේ අතර, ශ්‍රී ලංකාවේ ජාතික තේ නිෂ්පාදනය පිළිබඳ නවතම සංඛ්‍යාලේඛනද නිකුත් කර ඇති අතර 2026 වසරේ ජූනි මාසය සඳහා සමස්ත තේ නිෂ්පාදනය කිලෝග්‍රෑම් මිලියන 22.56ක් ලෙස සටහන්ව තිබේ.

එය 2025 වසරේ ජූනි මාසයේ වාර්තා වූ කිලෝග්‍රෑම් මිලියන 21.71ක නිෂ්පාදනයට සාපේක්ෂව කිලෝග්‍රෑම් මිලියන 0.85ක එනම් සියයට 3.94ක වර්ධනයකි.

2025 වසරේ මුල් මාස හයට සාපේක්ෂව උඩරට සහ හරිත තේ හැර සෙසු සියලුම මට්ටම්වල නිෂ්පාදනයේ අඩුවීමක් මෙවර දක්නට ලැබිණි.