ක්‍රිප්ටෝ ප්‍රවර්ධනයට උඩගෙඩි දුන් ට්‍රම්ප් තමන්ගේ ඔහුගේ පෞද්ගලික ධනය සාම්ප්‍රදායික කොටස්වල ආයෝජනය කරලා.. - රොයිටර් අනාවරණය කරයි

Jul 16, 2026 at 08:46 AM

|

Lanka Leader

අමෙරිකානු ජනාධිපති ඩොනල්ඩ් ට්‍රම්ප් සහ ඔහුගේ පවුලේ සාමාජිකයින් ප්‍රසිද්ධියේ ඩිජිටල් වත්කම් (Cryptocurrency) ප්‍රවර්ධනය කළ ද, ඔහුගේ පෞද්ගලික ධන කළමනාකරුවන් විසින් එමඟින් උපයන ලාභ විශාල වශයෙන් වඩාත් සුරක්ෂිත සාම්ප්‍රදායික කොටස් සහ බැඳුම්කරවල ආයෝජනය කර ඇති බව රොයිටර් පුවත් සේවය පවසයි. 

නවතම නිල මූල්‍ය අනාවරණ දත්ත විශ්ලේෂණයකට අනුව හෙළි වී ඇත්තේ, පසුගිය වසරේදී ‘World Liberty Financial’ සහ ‘Trump meme coin’ වැනි පවුලේ ක්‍රිප්ටෝ ව්‍යාපෘති හරහා ට්‍රම්ප් ඇමරිකානු ඩොලර් බිලියන 1.4කට අධික ආදායමක් උපයා ඇති බවයි. මෙම ක්‍රිප්ටෝ ආදායම් ගලා ඒමත් සමඟ, 2024 වසරේ අගභාගයේ පැවති ඔහුගේ සාම්ප්‍රදායික කොටස් සහ බැඳුම්කර කළඹ (Portfolio) 2025 වසරේ අග වන විට සිව්ගුණයකින් පමණ ඉහළ ගොස් තිබේ.

ට්‍රම්ප් සහ ඔහුගේ පුතුන් වන එරික් ට්‍රම්ප් සහ ඩොනල්ඩ් ට්‍රම්ප් ජූනියර් විසින් බිට්කොයින් වැනි ඩිජිටල් වත්කම්වල අනාගතය ඉතා ඉහළ අගයක් ගනු ඇති බව පවසමින් මහජනතාව ආකර්ෂණය කර ගැනීමට උත්සාහ කළ ද, 2026 අප්‍රේල් වන විට මීට ආයෝජනය කළ සාමාන්‍ය සිල්ලර ආයෝජකයින්ට (Retail investors) ඩොලර් බිලියන 2.3ක අතිදැවැන්ත පාඩුවකට මුහුණ දීමට සිදුවූ බව වාර්තා වේ.

මේ සම්බන්ධයෙන් හාවඩ් විශ්වවිද්‍යාලයේ දත්ත ප්‍රතිපත්ති ව්‍යාපෘතියේ අධ්‍යක්ෂ තිමොති මැසාඩ් පෙන්වා දෙන්නේ, ට්‍රම්ප් දේශපාලනිකව ඇමරිකාව ක්‍රිප්ටෝ අගනගරය කරන බව පැවසුවත්, පෞද්ගලිකව ක්‍රිප්ටෝ හරහා කඩිනම් ලාභ ලබාගෙන (quick buck) තම ස්ථාවර ධනය සුරක්ෂිත කරගැනීමට සාම්ප්‍රදායික මූල්‍ය ක්ෂේත්‍රය භාවිතා කර ඇති බවයි. 

කෙසේ වුවත්, ධවල මන්දිරය ප්‍රකාශ කර ඇත්තේ ජනාධිපතිවරයාගේ වත්කම් ස්වාධීන තෙවන පාර්ශවීය මූල්‍ය ආයතන විසින් මෙහෙයවනු ලබන පූර්ණ අභිමත ගිණුම් (Fully discretionary accounts) හරහා පාලනය වන බැවින් ඔහු ඊට සෘජුව මැදිහත් නොවන බවයි. එමෙන්ම ට්‍රම්ප් සංවිධානය (Trump Org) ද ප්‍රකාශ කර ඇත්තේ තම සමාගම සතුව ඉතා ස්ථාවර මූල්‍ය තත්ත්වයක් සහ ශක්තිමත් වත්කම් පවතින බවයි.