විනිසුරු ධුර කාලය දීර්ඝ කිරීමේ යෝජනාව හමුවේ අධිකරණ ක්ෂේත්‍රය උණුසුම් වෙයි.. විනිසුරු සංගමයේ විශේෂ රැස්වීමක් අද

Jul 11, 2026 at 12:57 PM

|

Lanka Leader

අගවිනිසුරුවරයාගේ ධුර කාලය වසර දෙකකින් දීර්ඝ කිරීම සඳහා රජය ගෙන ඒමට උත්සාහ කරන ව්‍යවස්ථා සංශෝධනය හේතුවෙන් මෙරට අධිකරණ ක්ෂේත්‍රය තුළ දැඩි අර්බුදකාරී තත්ත්වයක් නිර්මාණය වී ඇත. 

මේ තත්ත්වය පිළිබඳව සාකච්ඡා කිරීම සඳහා අධිකරණ සේවා සංගමයේ (JSA) විශේෂ මහ සභා රැස්වීමක් අද (11) කඩුවෙල මහේස්ත්‍රාත් අධිකරණ පරිශ්‍රයේදී පැවැත්වීමට නියමිත බව මාධ්‍යවේදී සරෝජ් පතිරණ මහතා සිය ‘සංදේශය’ යූටියුබ් නාලිකාව ඔස්සේ අනාවරණය කරයි.

මුලින් මෙම රැස්වීම කොළඹ මහේස්ත්‍රාත් අධිකරණ පරිශ්‍රයේ පැවැත්වීමට සැලසුම් කර තිබුණ ද, ඊට අවසර නොලැබීම හේතුවෙන් ස්ථානය කඩුවෙල දක්වා වෙනස් කිරීමට සිදු වූ බව වාර්තා වේ. මෙම රැස්වීමේදී අදාළ ධුර කාලය දීර්ඝ කිරීමේ යෝජනාව සම්බන්ධයෙන් රහස් ඡන්දයක් විමසීමට ද නියමිතය.

රජයේ මෙම ව්‍යවස්ථා සංශෝධන යෝජනාවට අධිකරණ සේවා සංගමයේ බහුතරයක් විනිසුරුවරුන් දැඩි විරෝධය පළ කර ඇති අතර, ඔවුන් එය සලකන්නේ අධිකරණයේ ස්වාධීනත්වයට එල්ල වන බරපතළ තර්ජනයක් වශයෙනි.

මෙම මතභේදාත්මක තත්ත්වය හමුවේ, රජයේ යෝජනාවට පක්ෂපාතී ස්ථාවරයක සිටි බව කියන අධිකරණ සේවා සංගමයේ සභාපති පසන් අමරසේන මහතා සිය ධුරයෙන් ඉල්ලා අස්වී තිබේ. ඔහු සිය ඉල්ලා අස්වීමේ ලිපිය මගින් සංගමයේ ලේකම්වරයා ඇතුළු පිරිසකට චෝදනා එල්ල කර ඇති අතර, ලේකම් සුරංග මුණසිංහ මහතා එම චෝදනා ප්‍රතික්ෂේප කරමින් පවසා ඇත්තේ සැලසුම් කළ පරිදි අද දින රැස්වීම පවත්වන බවයි.

මෙම යෝජනාවට එරෙහි වන විනිසුරුවරුන් මර්දනය කිරීම සඳහා වැටුප් වර්ධක අත්හිටුවීම, විදේශ සංචාර අවලංගු කිරීම සහ විනය පරීක්ෂණ පවත්වන බවට තර්ජනය කිරීම වැනි විවිධ බලපෑම් එල්ල වන බවට තොරතුරු අනාවරණය වී ඇත. මීට අමතරව, මෙම යෝජනාවට විරුද්ධත්වය පළ කළ ඉසුරු නෙත්තිකුමාර සහ උද්දාල සුවඳුරුගොඩ වැනි ජ්‍යෙෂ්ඨ විනිසුරුවරුන් කිහිපදෙනෙකු හදිසියේම මාරු කර යැවීම ද ක්ෂේත්‍රය තුළ දැඩි කතාබහට ලක්ව තිබේ.