දයාසිරි අත්අඩංගුවට ගන්න හදනවා.. - සජිත් හෙළිකරයි..

Jul 10, 2026 at 12:40 PM

|

Lanka Leader

පාර්ලිමේන්තු මන්ත්‍රී දයාසිරි ජයසේකර මහතා ඉලක්ක කරගනිමින් ආණ්ඩුව දේශපාලන දඩයමක් ක්‍රියාත්මක කරමින් සිටින බවත්, ඔහුව අත්අඩංගුවට ගැනීම සඳහා අවශ්‍ය පසුබිම මේ වන විට සකස් කරමින් පවතින බවත් විපක්ෂ නායක සජිත් ප්‍රේමදාස මහතා පාර්ලිමේන්තුවේදී චෝදනා කළේය.

තමන් සතු සමාජ මාධ්‍ය ජාල සහ විවිධ පාර්ශව උපයෝගී කරගනිමින් දයාසිරි ජයසේකර මහතාට එරෙහිව ජනමතයක් ගොඩනැගීමට ආණ්ඩුව උත්සාහ කරන බව පැවසූ විපක්ෂ නායකවරයා, මෙය ඉතා ලැජ්ජා සහගත ක්‍රියාවක් බව ද අවධාරණය කළේය.

2019 වසරේදී දයාසිරි ජයසේකර මහතාට වෛද්‍ය ප්‍රතිකාර සඳහා රුපියල් ලක්ෂ පහක  දීමනාවක් හිමිව ඇති බවත්, ඔහු සිය ප්‍රතිකාර සඳහා රුපියල් 868,000ක මුදලක් වැය කර ඇති බවත් එම දීමනාව ලබා දීමේදී ඉදිරිපත් කළ බිල්පත්වල දෝෂ පවතින බව පවසමින් ඔහුව අත්අඩංගුවට ගැනීමට ආණ්ඩුව සූදානම් වන බව සජිත් ප්‍රේමදාස මහතා පෙන්වා දුන්නේය.

"කරුණා සහගත දීමනාවක් කියන්නේ විධායක ජනාධිපතිවරයාගේ අභිමතය පරිදි ලබා දෙන ප්‍රදානයක්. ඒ සඳහා බිල්පත් ඉදිරිපත් කළ යුතු බවට කොහේවත් සඳහන් වෙලා නැහැ. එවැනි තත්ත්වයක් තුළ බිල්පත්වල ගැටලු පවතින බව පවසමින් ඔහුව අත්අඩංගුවට ගැනීමට උත්සාහ කිරීම පැහැදිලිවම දේශපාලන පළිගැනීමක්," යැයි විපක්ෂ නායකවරයා පැවසීය.

රටේ පවතින බරපතළ ගැටලු පිළිබඳව අවධානය යොමු කරනවා වෙනුවට ආණ්ඩුව මෙවැනි දේශපාලන දඩයම්වල නිරත වීම කණගාටුදායක බව ද ඔහු සඳහන් කළේය.

බන්ධනාගාර පද්ධතිය කළමනාකරණය කිරීම, කඩා වැටෙන ආර්ථිකය පණ ගැන්වීම, දිළිඳුකම සහ මන්දපෝෂණය පිටුදැකීම මෙන්ම සීඝ්‍රයෙන් පැතිර යන ඩෙංගු රෝගය මර්දනය කිරීම වැනි අත්‍යවශ්‍ය කාර්යයන් පසෙකලා ආණ්ඩුව මෙලෙස දේශපාලන පළිගැනීම්වල නිරත වන බවට ඔහු චෝදනා කළේය.

දයාසිරි ජයසේකර මහතාගේ අයිතිවාසිකම් වෙනුවෙන් තමන් ඇතුළු විපක්ෂය ඕනෑම අවස්ථාවක පෙනී සිටින බව ද සජිත් ප්‍රේමදාස මහතා වැඩිදුරටත් ප්‍රකාශ කළේය.