මීගමුව වැනි දරුණු ගැටුම් රට පුරා බන්ධනාගාරවල ඇතිවීමේ දැඩි අවදානමක් තියෙනවා - සිරකරු අයිතිවාසිකම් සුරැකීමේ කමිටුව

Jul 7, 2026 at 05:39 AM

|

Lanka Leader

මීගමුව බන්ධනාගාරයේ මෑතකදී ඇති වූ නොසන්සුන්කාරී තත්ත්වය ශ්‍රී ලංකාවේ සෙසු බන්ධනාගාර පද්ධතිය තුළ ද දරුණු ලෙස පුපුරා යාමේ දැඩි අවදානමක් මතුව ඇති බව සිරකරු අයිතිවාසිකම් සුරැකීමේ කමිටුව පවසයි.

කොළඹදී පැවැති මාධ්‍ය හමුවකදී එම කමිටුවේ කැඳවුම්කරු සුදේශ් නන්දිමාල සිල්වා පෙන්වා දුන්නේ, බන්ධනාගාර තුළ පවතින අමානුෂික තදබදය සහ අවම පහසුකම් මෙවැනි ගැටුම් ඇතිවීමට මූලිකම හේතුව වී ඇති බවයි. 

රැඳවියන් 600–650ක් පමණ රඳවා තැබිය හැකි මීගමුව බන්ධනාගාරය තුළ මේ වන විට 2,000කට අධික පිරිසක් රඳවා සිටින අතර, රැඳවියන් 250–300කට පමණ වෙන්ව ඇත්තේ එකම වැසිකිළියකි. මෙම දැඩි අපහසුතා හේතුවෙන් ඇතැම් රැඳවියන්ට වැසිකිළි තුළ පවා නිදා ගැනීමට සිදුව ඇති අතර, බන්ධනාගාර පාලනය සඳහා සිටින්නේ ද අවශ්‍ය නිලධාරීන් සංඛ්‍යාවෙන් හතරෙන් එකක් වැනි සුළු පිරිසකි. මීට අමතරව, දරුණු අපරාධකරුවන් සහ මත්ද්‍රව්‍යවලට ඇබ්බැහි වූවන් කිසිදු වර්ගීකරණයකින් තොරව එකට රඳවා තැබීම ද තත්ත්වය තවත් උත්සන්න වීමට හේතු වී ඇති බව ඔහු පවසයි.

රජය මෙම සමස්ත අර්බුදය "මත්ද්‍රව්‍ය ජාවාරම්කරුවන් අතර ගැටුමක්" ලෙස හුවා දක්වමින් සැබෑ ප්‍රශ්නය යටපත් කිරීමට උත්සාහ කරන බවට චෝදනා කළ ඔහු, මීට පෙර බින්දුනුවැව, වැලිකඩ සහ මහර බන්ධනාගාරවල සිදු වූ ශෝචනීය සිදුවීම්වලදී ද බලධාරීන් මෙලෙස වගකීමෙන් බැහැර වූ බව සිහිපත් කළේය. 

බන්ධනාගාර තුළ පවතින මෙම දැඩි මානසික පීඩනය සහ අර්බුදකාරී තත්ත්වයට රජය කඩිනම් විසඳුම් ලබා නොදුන්නොත්, රැඳවියන්ගේ සහ නිලධාරීන්ගේ ඥාතීන් සමඟ එක්ව ඉදිරියේදී වීදි බැස දැඩි විරෝධතාවල නිරත වන බව සිරකරු අයිතිවාසිකම් සුරැකීමේ කමිටුව වැඩිදුරටත් අවධාරණය කරයි.