ජූලි සිට සැප්තැම්බර් දක්වා එල් නිනෝ තත්ත්වය දරුණු වන ලකුණු!..

Jul 6, 2026 at 05:43 AM

|

Lanka Leader

ලොවපුරා උණුසුම් කාලගුණයක් ඇති කිරීමට හේතුවන එල් නිනෝ (El Niño) දේශගුණික සංසිද්ධිය ඉදිරි ජූලි මාසයේ සිට සැප්තැම්බර් මාසය දක්වා කාලය තුළ වඩාත් තීව්‍ර වීමට ඉඩ ඇති බවට ලෝක කාලගුණ විද්‍යා සංගමය අනාවැකි පළකරයි. 

මධ්‍යම සහ නැගෙනහිර පැසිෆික් සාගර කලාපයේ මුහුදු පෘෂ්ඨයේ උෂ්ණත්වය සාමාන්‍ය මට්ටමට වඩා අසාමාන්‍ය ලෙස ඉහළ යාමේ මෙම ස්වභාවික රටාව සාමාන්‍යයෙන් වසර 2ක් හෝ 7ක් අතර කාලයකට වරක් ඇති වන අතර එය මාස 9 සිට අවුරුද්දක් දක්වා කාලයක් පැවතිය හැකිය.

එල් නිනෝ කාලගුණ සංසිද්ධීන් ඒවායේ දරුණුකම අනුව දුර්වල, මධ්‍යස්ථ, දැඩි සහ ඉතා දැඩි වශයෙන් කාණ්ඩ 4කට වර්ගීකරණය කෙරෙන අතර මෙවර බලපාන තත්ත්වය වර්ගීකරණය කර තිබෙන්නේ 3 වැනි උපරිම මට්ටමට හෙවත් දැඩි කාණ්ඩයටය. මෙයින් අදහස් කරන්නේ සාගර උෂ්ණත්වය සාමාන්‍ය තත්ත්වයට වඩා සෙල්සියස් අංශක 1.5°C සිට 2.0°C දක්වා ප්‍රමාණයකින් ඉහළ යාමයි.

ශ්‍රී ලංකාව වැනි සමකයට ආසන්න රටවලට මෙම එල් නිනෝ තත්ත්වයෙන් සෘජු බලපෑම් එල්ල වන බැවින් ඉදිරියේදී ගැටලු කිහිපයකට මුහුණ දීමට සිදු වනු ඇතැයි කාලගුණ විද්‍යාඥයෝ පෙන්වා දෙති. 

ඒ අනුව වී සහ අනෙකුත් බෝග වගාවන්ට අවශ්‍ය ජලය හිඟ වීම නිසා අස්වැන්න අඩු විය හැකි අතර ප්‍රධාන ජලාශවල ජල මට්ටම වේගයෙන් පහත වැටීම නිසා ජල විදුලි උත්පාදනය අඩාල වීමේ අවදානමක් ද පවතී. මීට අමතරව අධික උෂ්ණත්වය හේතුවෙන් මිනිස් සිරුර විජලනය වීම, සූර්යතාපයට ලක්වීම සහ උණ රෝග පැතිරීමේ ප්‍රවණතාව වැඩි විය හැකිය.

ගෝලීය දේශගුණික විපර්යාස හේතුවෙන් මිනිසා විසින් සිදුකරන හරිතාගාර වායු විමෝචනය නිසා, ස්වභාවිකව ඇතිවන මෙම එල් නිනෝ තත්ත්වයන්හි දරුණුකම වෙනදාට වඩා බෙහෙවින් වැඩි වී ඇති බව පරිසර විද්‍යාඥයන් වැඩිදුරටත් සඳහන් කරයි.