ඉරානය සහ රුසියාව දෙරට අතර ගනු දෙනු වලදී රූබල් සහ රියාල් මගින් ගෙවීම් කිරීම වෙනුවෙන්  ගිවිසුම් ගත වීමෙන් පසු එක්සත් ජනපද ඩොලරය ගනු දෙනු වලදී භාවිතය නිල වශයෙන් අතහැර දමා ඇති බව ඉරාන පුවත් ඒජන්සිය වන IRNA පසුගියදා වාර්තා කළේය.

දෙරටේ මහ බැංකු ප්‍රධානීන් අතර රුසියාවේදී පැවති සාකච්ඡාවකින් පසු මෙම ගිවිසුමට අත්සන් තැබූ බව IRNA පුවත් සේවය පවසයි.

"නව මූල්‍ය සහ බැංකු වේදිකාවක් පිහිටුවීම මගින් ඉරානය සහ රුසියාව අතර සබඳතාවල 'නව පරිච්ඡේදයක්' විවෘත කර ඇත," ඉරාන මහ බැංකුව උපුටා දක්වමින් IRNA වාර්තා කළේය. SWIFT නොවන මුදල්-පණිවිඩ පද්ධති මගින් විකල්ප මූල්‍ය සහ බැංකු වේදිකා නිර්මාණය කිරීමටහ් ඒවා භාවිතා කිරීමට බැංකු සහ වෙනත් ව්‍යවසායකයින්ට  ඉඩ සලසයි. එමෙන්ම ජාතික මුදල් ඒකකවල ද්විපාර්ශ්වික තැරැව්කාර සබඳතා ඇති කර ගැනීමට ද ඉඩ ප්‍රස්ථාව සැලසේ.

එක්සත් ජනපද සම්බාධකවලට දරුණු ලෙස මුහුණ දී සිටින ඉරානය සහ රුසියාව, 2022 ජූලි මාසයේදී දෙරට අතර අන්‍යෝන්‍ය වෙළඳාමේ දී එක්සත් ජනපද ඩොලරය වෙනුවට ඔවුන්ගේ ජාතික මුදල් භාවිතා කිරීමට සැලසුම් කරන බව ප්‍රථමයෙන් ප්‍රකාශයට පත් කරන ලදී. පසුගිය දෙසැම්බර් මස අවසානයේදි, රුසියාව ප්‍රමුඛ යුරේසියානු ආර්ථික සංගමයේ (EEU) සාමාජිකයින් ඉරානය සමඟ සම්පූර්ණ නිදහස් වෙළඳ ගිවිසුමක් අත්සන් තැබූහ. 

ජුලි මාසයේදී ඉරාන ජනාධිපති ඊබ්‍රාහිම් රයිසි, එක්සත් ජනපද මුදල් බටහිර ආධිපත්‍යයේ මෙවලමක් ලෙස භාවිතා කර ඇති බව පවසමින් ගෝලීය වෙළඳාමෙන් ඩොලරය අත්හැර දැමිය යුතු බව අවධාරණය කළේය.

පසුගිය වසර පුරා මොස්කව් සහ ටෙහෙරානය බටහිර ආර්ථික සම්බාධක හමුවේ ආර්ථික සහයෝගීතාව සැලකිය යුතු ලෙස ශක්තිමත් කර ඇත. නිල දත්ත වලට අනුව ද්විපාර්ශ්වික වෙළඳ පිරිවැටුම 2019 දී ඩොලර් බිලියන 1.6 සිට 2022 දී ඩොලර් බිලියන 4.6 දක්වා තුන් ගුණයකින් වැඩි වී ඇත. https://www.rt.com/business/589836-iran-russia-ditch-dollar/