මාස 4කට පසු ටෙහෙරානයම හඬවමින් ඇරඹි අවමංගල්‍යය: අයතුල්ලා අලි කමේනිගේ දේහයට අවසන් ගෞරව දැක්වීමට ඉරාන ජනයා දහස් ගණනින් පෙළගැසෙති..

Jul 4, 2026 at 01:57 PM

|

Lanka Leader

ඊශ්‍රායල ගුවන් ප්‍රහාරයකින් ජීවිතක්ෂයට පත් වූ ඉරානයේ හිටපු උත්තරීතර ආධ්‍යාත්මික නායක අයතුල්ලා අලි කමේනිගේ අවමංගල්‍ය උත්සවය අද (4) අලුයම ටෙහෙරාන් නුවරදී නිල වශයෙන් ආරම්භ විය.

පසුගිය පෙබරවාරි 28 වැනිදා එල්ල වූ ප්‍රහාරයෙන් ඔහු මියගිය ද, එකල පැවති දැඩි යුද වාතාවරණය හේතුවෙන් ඉස්ලාමීය සම්ප්‍රදායානුකූල භූමදාන කටයුතු සිදු කිරීමට නොහැකි විය. ඒ අනුව, මාස 4කට පසු තම ආධ්‍යාත්මික නායකයාට අවසන් ගෞරව දැක්වීමේ අවස්ථාව ඉරාන ජනතාවට මේ වන විට හිමිව ඇත.

දැනට ටෙහෙරාන් නුවර ග්‍රෑන්ඩ් මොසල්ලා ඉස්ලාම් දේවස්ථානයේ තැන්පත් කර ඇති දේහයට අවසන් ගෞරව දැක්වීම සඳහා අලුයම සිටම දහස් සංඛ්‍යාත ජනතාවක් දිගු පෝලිම්වල රැඳී සිටිති. මෙම අවස්ථාවට ඉරාන ජනාධිපති මසූඩ් පෙසෙශ්කියන් ඇතුළු දේශපාලන හා මිලිටරි ප්‍රබලයින් රැසක් එක්ව සිටිති.

වසර 37ක් පුරා ඉරානය මෙහෙයවූ මෙම නායකයාගේ අවමංගල්‍ය උත්සවයට රටවල් 100කට වැඩි සංඛ්‍යාවක නියෝජිතයින් සහභාගී වීමට නියමිත අතර, ශ්‍රී ලංකාව නියෝජනය කරමින් නියෝජ්‍ය කථානායක රිස්වි සාලි සහ පාර්ලිමේන්තු මන්ත්‍රී රවුෆ් හකීම් යන මහත්වරු එක්ව සිටිති. මීට අමතරව පාකිස්තාන අග්‍රාමාත්‍ය ෂෙබාස් ෂරීෆ් ඇතුළු ලෝක නායකයින් රැසක් ද මීට සහභාගී වේ.

අවමංගල්‍ය උත්සවය වෙනුවෙන් ටෙහෙරාන් නුවර දැඩි ආරක්ෂක විධිවිධාන යොදා ඇති අතර ගුවන් සීමාවන් ද තාවකාලිකව වසා දමා ඇත. දින 3ක් ටෙහෙරාන් නුවර තැන්පත් කර තැබෙන දේහය, අනතුරුව ෂියා දහමේ ශුද්ධ වූ නගර වන කොම්, නජාෆ් සහ කර්බාලා වෙත රැගෙන යාමට නියමිතය. අවසානයේ ඔහුගේ උපන් නගරය වන මෂාඩ් හි පිහිටි ඉමාම් රේසා දේවස්ථානයේදී භූමදාන කටයුතු සිදු කෙරෙන අතර, ඉන් පසුව දින 40ක නිල ශෝක කාලයක් ප්‍රකාශයට පත් කර ඇත.