"දුර්වල අධිකරණ පද්ධතියක් ස්වභාවික විපතකටත් වඩා වේගයෙන් රටක් විනාශ කරනවා" - අගවිනිසුරු ප්‍රීති පද්මන් සුරසේන

Jul 3, 2026 at 04:55 AM

|

Lanka Leader

ස්වභාවික ආපදාවලින් සිදුවන හානියට වඩා ඉතා කෙටි කාලයකින් රටක් සම්පූර්ණයෙන්ම විනාශ කිරීමට දුර්වල අධිකරණ පද්ධතියකට හැකියාව පවතින බව අගවිනිසුරු ප්‍රීති පද්මන් සුරසේන මහතා පවසයි.

එවැනි බිඳවැටීමක් සිදු වුවහොත්, කිසිදු ජාත්‍යන්තර ආධාරයක් හෝ සහයෝගයක් මඟින් රට නැවත යථා තත්ත්වයට පත් කළ නොහැකි වනු ඇති බව ද ඔහු අවධාරණය කළේය. අගවිනිසුරුවරයා මේ බව සඳහන් කළේ ශ්‍රී ලංකා විනිශ්චයකාරවරුන්ගේ ආයතනයේ පැවැති නව මහේස්ත්‍රාත්වරුන් උදෙසා වූ නිල උත්සවයක් අමතමිනි.

අධිකරණ සංවිධාන පනතේ ප්‍රතිපාදනවලට අනුව නීති වෘත්තියේ හැසිරීම පිළිබඳව අදහස් දක්වමින් ඔහු කියා සිටියේ නීතිඥවරුන් නිරන්තරයෙන්ම සදාචාරාත්මක සහ පිළිගත හැකි උසස් හැසිරීමක් පවත්වා ගත යුතු බවයි. ඒ අනුව නීති ක්ෂේත්‍රයට බඳවා ගත යුත්තේ යහපත් පුද්ගලයන්, හොඳ කීර්තිනාමයක්, නිපුණතාවයක් සහ මනා දැනුමක් ඇති අය පමණක් බවත්, නීතිඥවරයෙකු ලෙස ලියාපදිංචි වීමෙන් පමණක් එම වගකීම අවසන් නොවන බවත් ඔහු පෙන්වා දුන්නේය. එම වෘත්තීය ගරුත්වය සදාකාලිකවම රැකගත යුතු අතර, එසේ නොමැති වුවහොත් අධිකරණ ක්ෂේත්‍රය තුළ බරපතළ ගැටලු මතු විය හැකි බවට ද හෙතෙම අනතුරු ඇඟවීය.

ජනතා ස්වෛරීභාවයේ ප්‍රධාන සංරචක වන විධායකය, ව්‍යවස්ථාදායකය, අධිකරණය සහ ඡන්ද බලය පිළිබඳව සිහිපත් කළ අගවිනිසුරුවරයා, අධිකරණ බලය යනු සෘජුවම ජනතාවගෙන් උරුම වූවක් බව අවධාරණය කළේය. විනිසුරුවරුන් එම බලය තමන්ගේ නිවෙස්වලින් රැගෙන එන්නේ හෝ අධිකරණ සේවා කොමිසමෙන් ලබා දෙන්නේ හෝ නොවන බවත්, එය ජනතාව විසින් ජනතාවගේම ප්‍රයෝජනය සඳහා පවරා ඇති බලයක් බව සැමවිටම මතක තබා ගත යුතු බවත් ඔහු ප්‍රකාශ කළේය.

අධිකරණයේ ස්වාධීනත්වය යනු විනිසුරුවරුන්ගේ පෞද්ගලික වාසිය තකා පවතින දෙයක් නොවන අතර, එය ජනතාවගේ යහපත සහ ඔවුන් තබා ඇති විශ්වාසය ආරක්ෂා කිරීම වෙනුවෙන් පැවතිය යුත්තකි. විනිසුරුවරයෙකු වූ පමණින් තමන්ට රුචි ඕනෑම දෙයක් කිරීමට කිසිවෙකුට අයිතියක් නොමැති බව පවසමින් අගවිනිසුරු ප්‍රීති පද්මන් සුරසේන මහතා සිය අදහස් දැක්වීම අවසන් කළේය.