වෙනිසියුලාවේ භූමිකම්පාව සම්බන්ධයෙන් ශ්‍රී ලංකාවේ ජාතික සංවිධාන රැසකගෙන් ශෝක ප්‍රකාශයක්..

Jun 26, 2026 at 12:53 PM

|

Lanka Leader

වෙනිසියුලාවේ උතුරු මැද වෙරළබඩ ප්‍රදේශයක් වන 'ලගවයිරා' (La Guaira) ප්‍රාන්තයේ සිදු වූ දරුණු භූමිකම්පාවෙන් පීඩාවට පත් ජනතාවට සහ එරට බොලිවේරියානු රජය වෙත ශ්‍රී ලංකාවේ ප්‍රමුඛ පෙළේ ජාතික සංවිධාන කිහිපයක් සිය සාතිශය සංවේගය පළ කර තිබේ.

දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර, ප්‍රජාතන්ත්‍රවාදී වාමාංශික පෙරමුණේ ප්‍රධාන ලේකම් වාසුදේව නානායක්කාර, ශ්‍රී ලංකාවේ බොලිවේරියානු සහයෝගිතාවයේ ලේකම් ජීවන්ත ජයතිස්ස,  අධිරාජ්‍ය විරෝධී ජාතික සංසදයේ කැඳවුම්කරු සුමිත් වන්නිආරච්චි සහ දෙවන පරපුර පක්ෂයේ නායක උවිඳු විජේවීර යන මහත්වරුන්ගේ එකතුවෙන් වෙනිසියුලාවේ වැඩබලන ජනාධිපතිනි ඩෙල්සි රොඩ්‍රිගුස් මැතිණිය වෙත මෙම නිල ශෝක ප්‍රකාශය යොමු කර ඇත. 

ඉන්දියාවේ සිටින වෙනිසියුලානු තානාපතිනි කපායා රොඩ්‍රිගුස් ගොන්සාලෙස් මැතිණිය හරහා මෙම ලිපිය රාජ්‍යතාන්ත්‍රික මට්ටමින් භාරදීමට කටයුතු යොදා තිබේ.

එම ඒකාබද්ධ නිවේදනය මඟින් ඔවුන් පෙන්වා දෙන්නේ, වෙනිසියුලානු ජනතාවගේ ආදරණීය නායකයා වන ජනාධිපති නිකොලස් මදුරෝ ඇමෙරිකානු බලවේග විසින් පැහැරගෙන ගොස් හරියටම දින 172ක් ගතවන මොහොතක මෙම ස්වභාවික විපත සිදුවීම එරට ජන ජීවිතයට එල්ල වූ දැඩි පීඩනයක් බවයි.

කෙසේ වෙතත්, ඓතිහාසිකව ඕනෑම ව්‍යසනයක් දරාගනිමින් ඉදිරියට යා හැකි ශක්තිමත් ජාතියක් ලෙස වෙනිසියුලානු වැසියන්ට මෙම අභියෝගයටද සාර්ථකව මුහුණ දිය හැකි බව තමන් විශ්වාස කරන බව එම සංවිධාන පවසයි. එමෙන්ම, මෙම දුෂ්කර අවස්ථාවේදී වෙනිසියුලාවට මානුෂීය ආධාර සැපයීමට ලතින් ඇමෙරිකානු කලාපයේ සෙසු රටවල් ඉදිරිපත් වීමද ඔවුන්ගේ අගය කිරීමට ලක්ව ඇත.

නිවේදනයේ සිංහල සහ ඉංග්‍රීසි පිටපත් පහළින්..

ගරු වැඩබලන ජනාධිපතිනි ඩෙල්සි රොඩ්‍රිගුස් මැතිණිය,

වෙනිසියුලාවේ බොලිවේරියානු මහජන සමූහාණ්ඩුව,

වෙනිසියුලාව.

ඉන්දියාවේ වෙනිසියුලානු තානාපතිනි

ගරු කපායා රොඩ්‍රිගුස් ගොන්සාලෙස් මැතිණිය මගින්,

ගරු ජනාධිපති තුමියනි,

වෙනිසියුලාවේ උතුරු මැද වෙරලබඩ පලාතක් වූ  La Guaira ප්‍රාන්තයේ ඇතිවූ දරුණු භූමි කම්පාවෙන් වෙනිසියුලානු ජනතාවට සිදුවූ හානිය සම්බන්ධයෙන් කණගාටුව පල කිරීම සඳහායි.

පසුගිය බදාදා (24) වෙනිසියුලාවේ උතුරු මැද වෙරලබඩ පාලාතේ  La Guaira ප්‍රාන්තයේ ඇතිවූ දරුණු භූමි කම්පාව පිළිබඳව මාධ්‍ය මගින් දැනගන්නට ලැබුණු අතර භූමි කම්පාව හේතුවෙන් සිදුවූ හානි දැක අප අතිශය කම්පනයට පත් වුනෙමු. වෙනිසියුලානු ජනයාගේ සදාදරණීය නායකයා ජනාධිපති නිකොලොලොස් මදුරෝ අමෙරිකානු ආක්‍රමණිකයා විසින් පැහැරගෙන ගොස් හරියටම දින 172ක් ගතවන දිනයේදී වෙනිසියුලාවේ සිදුවූ මෙම ස්වභාවික විපත වෙනිසියුලානු ජන ජීවිතයට දැඩි පීඩනයක් ඇති කළ ස්වභාවික ආපදාවක් බව අපගේ පිළිගැනීමයි. මේ අතිශය සංවේදී මොහොතේදී වෙනිසියුලාවෙන් සැතපුම් දහස් ගණනක් එපිටින් සිටින ශ්‍රී ලාංකිකයන් වන අප වෙනිසියුලාවේ බොලිවේරියානු රජයටත්, එහි නායකයා ලෙස ඔබ තුමියටත් පීඩාවට පත් ජනයාටත් අපගේ සාතිශය කණගාටුව පල කරමු. ඓතිහාසිකව ව්‍යසනයන් දරා ගනිමින් ඉදිරියට යා හැකි ජාතියක් බව ලොවට පෙන්වා දුන් ජාතියක් ලෙස වෙනිසියුලානු ජනයාට මේ ව්‍යසනයට සාර්ථකව මුහුණ දී ගැලවී යා හැකි බව අපගේ දැඩි විශ්වාසයයි.

එලෙසම ලතින් අමෙරිකාවේ විවිධ රටවල නායකයින් සහ ජනතාව වෙනිසියුලානු ජනයාට මේ ව්‍යසනයෙන් මිදීමට අවශ්‍ය සහය පලකරමින් මානුෂීය ආධාර ලබාදීමට පෙරට පැමිණ සිටිනු දැකීම අපගේ සිත් සතුටු කරවන බවද දන්වා සිටීමට මෙය අවස්ථාවක් කරගනිමු.

අවසාන වශයෙන් මේ ව්‍යසනයෙන් මිදීමට වෙනිසියුලානු ජනතාවගේ නායකයා ලෙස ඔබටත් වෙනිසියුලාවේ බොලිවේරියානු රජයටත් එහි ජනතාවටත් ශක්තිය ධෛර්ය ලැබේවායි ප්‍රාර්ථනා කරමු.

ස්තුතියි.