ලංකාවට එන්න බය සාක්කිකරුවන්ගේ සාක්කි පිටරට ගොස් ලබා ගන්නා ක්‍රමවේදයක් හදනවා..

Jun 25, 2026 at 02:19 PM

|

Lanka Leader

1979 වසරේ සිට වසර 46ක් පුරා මෙරට ක්‍රියාත්මක වූ ත්‍රස්තවාදය වැළැක්වීමේ පනත (PTA) මේ වසර තුළ අහෝසි කරන බව ජනාධිපති අනුර කුමාර දිසානායක මහතා පාර්ලිමේන්තුව අමතමින් විශේෂ ප්‍රකාශයක් කළේය. 

ප්‍රජාතන්ත්‍රවාදය සහ පුරවැසි නිදහස තහවුරු කිරීමේ පියවරක් ලෙස මෙම තීරණය ගත් බවත්, ඒ වෙනුවට සංවිධානාත්මක අපරාධ මැඩලීම සඳහා පමණක් ඉලක්ක කරගත් නව නීති පද්ධතියක් හඳුන්වා දෙන බවත් ජනාධිපතිවරයා අවධාරණය කළේය.

සාක්ෂිකරුවන්ට විදේශයන්හි සිට සාක්ෂි දීමට අවස්ථාව මෙහිදී ජනාධිපතිවරයා පෙන්වා දුන්නේ ඇතැම් අපරාධ සම්බන්ධයෙන් සාක්ෂි දීමට සිටින සාක්ෂිකරුවන් මෙරටට පැමිණ සාක්ෂි දීමට බියක් දක්වන බවයි. 

ඔවුන්ගේ ආරක්ෂාව සහ පහසුව සැලකිල්ලට ගනිමින්, විදේශගතව සිටින සාක්ෂිකරුවන් සඳහා එම රටවල පිහිටි ශ්‍රී ලංකා තානාපති කාර්යාල වෙත නිලධාරීන් ගොස් සාක්ෂි ලබාගැනීමේ විධිමත් ක්‍රමවේදයක් සකස් කරන බව ඔහු පැවසීය.

මෙම නව ක්‍රමවේදය දැනටමත් ප්‍රායෝගිකව ක්‍රියාත්මක කිරීමට පියවර ගෙන ඇති බව හෙළි කළ ජනාධිපතිවරයා, ඒ අනුව විදේශගතව සිටින සාක්ෂිකරුවන්ගෙන් සාක්ෂි ලබාගැනීම සඳහා ළඟදීම ඔස්ට්‍රේලියාව බලා නිලධාරීන් කණ්ඩායමක් පිටත්ව යාමට නියමිත බව විශේෂයෙන් සඳහන් කළේය.

ත්‍රස්තවාදය වැළැක්වීමේ පනත මගින් ඕනෑම ක්‍රියාවක් ත්‍රස්තවාදය ලෙස අර්ථකථනය කර පුද්ගලයන් දඩයම් කිරීමට තිබූ ඉඩකඩ නව නීති හරහා අහුරා දමන බව ජනාධිපතිවරයා පැවසීය. 

නව පනත මගින් සංවිධානාත්මක අපරාධ යන්නට පැහැදිලි සහ සංයුක්ත අර්ථ නිරූපණයක් ලබා දෙන අතර, එමගින් මිනිසුන්ගේ මූලික අයිතිවාසිකම්, භාෂණයේ නිදහස සහ ප්‍රජාතන්ත්‍රවාදී අයිතීන් මුළුමනින්ම ආරක්ෂා වන බව ඔහු සහතික කළේය.