"සෝමවංශලා, විජේවීරලා එදා කරපු දේ අනුරගේ ආණ්ඩුවෙන් පාවා දෙනවාද?" - වෛද්‍ය වසන්ත බණ්ඩාරගෙන් අනාවරණයක්

Jun 24, 2026 at 01:21 PM

|

Lanka Leader

ජනතා විමුක්ති පෙරමුණේ (JVP) නිර්මාතෘ රෝහණ විජේවීරයන් සහ පක්ෂය වෙනුවෙන් ජීවිතය පරදුවට තබා කටයුතු කළ සෝමවංශ අමරසිංහ වැනි නායකයන් එදා ආරක්ෂා කළ ප්‍රතිපත්ති, වත්මන් ජනාධිපති අනුර කුමාර දිසානායක මහතාගේ රජය යටතේ පාවා දෙමින් පවතිනවාද යන්න පිළිබඳව බරපතළ සැකයක් මතුවන බව දේශහිතෛෂී ජාතික ව්‍යාපාරයේ මහ ලේකම් වෛද්‍ය වසන්ත බණ්ඩාර මහතා පවසයි.

එහිදී වැඩිදුරටත් අදහස් දැක්වූ වෛද්‍ය වසන්ත බණ්ඩාර මහතා කියා සිටියේ, එදා ජනතා විමුක්ති පෙරමුණ රටේ ඒකීයභාවය සහ බෙදුම්වාදයට එරෙහිව දැඩි ස්ථාවරයක සිටිමින් විශාල කැපකිරීම් සිදුකළ පක්ෂයක් බවයි. 

විශේෂයෙන්ම ඉන්දු-ලංකා ගිවිසුම සහ 13 වැනි ආණ්ඩුක්‍රම ව්‍යවස්ථා සංශෝධනය හරහා රට බෙදීමට ගිය අවස්ථාවලදී ඊට එරෙහිව දිවිහිමියෙන් සටන් වැදුණු ඉතිහාසයක් එම පක්ෂයට ඇති බවත් ඒ මහතා සිහිපත් කළේය.

කෙසේ වෙතත්, වත්මන් ජාතික ජන බලවේගය (NPP) රජය යටතේ එම පැරණි ප්‍රතිපත්ති සහ ස්ථාවරයන් වෙනස් වෙමින් පවතින බවත්, පැරණි නායකයන් දිවි පුදා රැකගත් දේශපාලන ස්ථාවරයන් වත්මන් පාලනය යටතේ දියකර හරිමින් පවතින බවත් වෛද්‍ය බණ්ඩාර මහතා චෝදනා කරයි.

රටේ ඒකීයභාවයට බලපෑම් එල්ල වන තීරණ හමුවේ වත්මන් රජය දක්වන මෘදු පිළිවෙත ප්‍රශ්නකාරී බවද සඳහන් කරන ඒ මහතා, ජනතාව විශාල බලාපොරොත්තු සහිතව පත්කරගත් මෙම රජය, එදා ජනතා විමුක්ති පෙරමුණේ සැබෑ මතවාදය නියෝජනය කරන්නේද නැතහොත් බලය වෙනුවෙන් පැරණි ප්‍රතිපත්ති පාවා දෙමින් සිටින්නේද යන්න පිළිබඳව රට හමුවේ පැහැදිලි කළ යුතු බවද අවධාරණය කර සිටියේය.

ඒ මහතා මේ බව පැවසුවේ සෝමවංශ අමරසිංහ මහතාගේ 10 වන ගුණානුස්මරණය වෙනුවෙන් විශේෂ වැඩසටහනකට එක්වෙමිනි.

සවිස්තරාත්මක වීඩියෝව නරඹන්න..