ගෝඨාභයගේ පෙත්සමේ වැඩිදුර කරුණු සලකා බැලීම අද..

Jun 24, 2026 at 07:37 AM

|

Lanka Leader

පාස්කු ඉරුදින ත්‍රස්ත ප්‍රහාර සිද්ධිය සම්බන්ධයෙන් සිදුකරන විමර්ශනවලට අදාළව තමන්ව අත්අඩංගුවට ගැනීම වළක්වාලන නියෝගයක් නිකුත් කරන ලෙස ඉල්ලා හිටපු ජනාධිපති ගෝඨාභය රාජපක්ෂ මහතා ඉදිරිපත් කළ පෙත්සමේ වැඩිදුර කරුණු සලකා බැලීම අද දින සිදුකිරීමට නියමිතව තිබේ.

හිටපු ජනාධිපතිවරයා විසින් ඉදිරිපත් කළ මෙම රිට් පෙත්සම පසුගියදා අභියාචනාධිකරණයේ සභාපති විනිසුරු රොහාන්ත අබේසූරිය සහ සරත් දිසානායක යන මහත්වරුන්ගෙන් සමන්විත විනිසුරු මඩුල්ල ඉදිරියේ සලකා බැලුණි.

මෙහිදී පෙත්සම්කාර ගෝඨාභය රාජපක්ෂ මහතා වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා මහතා අධිකරණය හමුවේ කරුණු දක්වමින් කියා සිටියේ, අපගේ ආණ්ඩුක්‍රම ව්‍යවස්ථාව තුළ අධිකරණ ස්වාධීනත්වය මෙන්ම පුද්ගල නිදහස මූලික අයිතිවාසිකමක් ලෙස පිළිගෙන තිබෙන බවයි.

එම නිදහස සීමා කළ හැක්කේ අතිශය සීමිත අවස්ථාවල පමණක් බව පෙන්වා දුන් ජනාධිපති නීතිඥවරයා, පාස්කු ප්‍රහාරයෙන් වින්දිතයින් බවට පත් පුද්ගලයින්ට යුක්තිය ඉටු කිරීම යනු කිසිදු සාධාරණ පදනමකින් තොරව පුද්ගලයින් අත්අඩංගුවට ගෙන සිරගත කිරීම නොවන බවද අවධාරණය කළේය.

පුද්ගලයින් අත්අඩංගුවට ගෙන රිමාන්ඩ් භාරයට පත්කිරීම සඳහා නීතියෙන් අවසර හිමිවී තිබෙන්නේ සීමිත අවස්ථාවල පමණක් යැයි පෙන්වා දුන් ඔහු, පුද්ගලයෙකු රිමාන්ඩ් භාරයට පත්කිරීම කිසිසේත්ම දඬුවමක් නොවිය යුතු බවද සඳහන් කළේය. 

එමෙන්ම සිය සේවාදායකයා මේ වනතෙක් කිසිදු විමර්ශනයක් සඳහා කැඳවා නොමැති බවත්, ඔහු අදාළ විමර්ශනයේ කිසිදු සාක්ෂිකරුවෙකුට බලපෑම් එල්ල කර නොමැති බවත් නීතිඥවරයා මෙහිදී ප්‍රකාශ කළේය.

කෙසේ වුවද, කිසිදු සාධාරණ පදනමක් නොමැතිව වගඋත්තරකරුවන් සිය සේවාදායකයාට එරෙහිව කොළඹ කොටුව මහෙස්ත්‍රාත් අධිකරණය වෙතින් විදෙස් ගමන් තහනමක් ලබාගෙන ඇති බව ජනාධිපති නීතිඥවරයා සඳහන් කළේය. 

කිසිදු නීතිමය පදනමකින් තොරව ඔහුගේ නිදහස සීමා කිරීමට විමර්ශන අංශ කටයුතු කර තිබෙන බවටද ඔහු මෙහිදී චෝදනා කර සිටියේය.