බ්‍රිතාන්‍යයේ මීළඟ අගමැති ධුරය සඳහා ඇන්ඩි බර්න්හැම් තරග බිමට..

Jun 22, 2026 at 05:19 PM

|

Lanka Leader

කීර් ස්ටාමර්ගේ ඉල්ලා අස්වීමෙන් පසු බ්‍රිතාන්‍යයේ මීළඟ අගමැති ධුරය සහ ලේබර් පක්ෂ නායකත්වය සඳහා ඇන්ඩි බර්න්හැම් සිය අපේක්ෂකත්වය නිල වශයෙන් ප්‍රකාශයට පත් කර ඇති බව වාර්තා වේ.

බ්‍රිතාන්‍ය අග්‍රාමාත්‍ය කීර් ස්ටාමර් (Keir Starmer) සිය ධුරයෙන් ඉල්ලා අස්වන බව ප්‍රකාශ කිරීමත් සමඟ, පුරප්පාඩු වන ලේබර් පක්ෂයේ නායකත්වය සහ බ්‍රිතාන්‍යයේ මීළඟ අග්‍රාමාත්‍ය ධුරය සඳහා තමන් තරඟ කරන බව ග්‍රේටර් මැන්චෙස්ටර් හි හිටපු නගරාධිපති ඇන්ඩි බර්න්හැම් (Andy Buham) නිල වශයෙන් නිවේදනය කර තිබේ.

පසුගියදා පැවැති 'මේකර්ෆීල්ඩ්' අතුරු මැතිවරණයෙන් 55%කට අධික විශිෂ්ට ඡන්ද ප්‍රතිශතයක් ලබා ගනිමින් ඇන්ඩි බර්න්හැම් නැවත වරක් බ්‍රිතාන්‍ය පාර්ලිමේන්තුවට තේරී පත් විය.

බ්‍රිතාන්‍ය දේශපාලනය තුළ "උතුරේ රජු" (King of the North) යන අන්වර්ථ නාමයෙන් ද හඳුන්වන බර්න්හැම් මහතා අත්කර ගත් මෙම දැවැන්ත ජයග්‍රහණයත් සමඟ, කීර් ස්ටාමර් මහතාට සිය ධුරයෙන් ඉල්ලා අස්වන ලෙස පක්ෂ අභ්‍යන්තරයෙන් දැඩි පීඩනයක් එල්ල වන්නට විය.

සිය අපේක්ෂකත්වය ප්‍රකාශයට පත් කරමින් 56 හැවිරිදි ඇන්ඩි බර්න්හැම් සඳහන් කළේ, බ්‍රිතාන්‍යය නව මාවතක් වෙත රැගෙන යාමට සහ වෙස්ට්මිනිස්ටර් (Westminster) කේන්ද්‍රීය දේශපාලනය හේතුවෙන් මෙතෙක් නොසලකා හැර තිබූ ප්‍රදේශවලට සාධාරණත්වය ඉටු කිරීමට තමන් කටයුතු කරන බවයි.

බ්‍රිතාන්‍ය දේශපාලන විචාරකයන් පෙන්වා දෙන්නේ ලේබර් පක්ෂයේ බහුතර මන්ත්‍රීවරුන් පිරිසකගේ සහාය දැනටමත් බර්න්හැම් වෙත හිමිව ඇති බැවින්, වැඩිදුර තරගයකින් තොරවම ඔහු බ්‍රිතාන්‍යයේ මීළඟ අග්‍රාමාත්‍යවරයා ලෙස පත්වීමට ඉහළ සම්භාවිතාවක් පවතින බවයි.