ගුවන් යානාවලට හෙණ ගහනවාද?.. - පහළ උසාවියෙන්ම නඩුව විසිවෙන හැටි ගැන කියන කැප්ටන් එල්මෝ ජයවර්ධන..

Jun 20, 2026 at 10:20 AM

|

Lanka Leader

ඔස්ට්‍රේලියාවේ සිඩ්නි නුවර බලා ඉකුත් දා කටුනායක ගුවන් තොටුපොළෙන් අලුයම පිටත්ව ගිය ශ්‍රීලන්කන් ගුවන් යානයකට අකුණු පහරක් වැදී තිබූ සිදුවීම මේ වන විට සසමාජ මාධ්‍ය තුළ ආන්දෝලනයට ලක්වූ මාතෘකාවක් වී තිබේ.

මෙම අකුණු පහර හේතුවෙන් එම යානය යළිත් කටුනායක ගුවන් තොටුපොළ වෙත ගොඩබැස්සවීමට පියවර ගත් බවත්, අනතුරුව වෙනත් ගුවන් යානයකින් අදාළ මගීන් පිරිස ඔස්ට්‍රේලියාව බලා පිටත්කර ඇති බවත් එම හේතුවෙන් ගුවන් ගමන පැය 5කට අධික කාලයක් ප්‍රමාද වී තිබූ බවත් තොරතුරු වාර්තා වී තිබිණි.

මේ පිළිබඳව ක්ෂේත්‍රයේ දශක ගණනාවක අත්දැකීම් ඇති ප්‍රවීණ ගුවන් නියමු කැප්ටන් එල්මෝ ජයවර්ධන මහතා සමඟ පැවැත්වූ විශේෂ සාකච්ඡාවකදී විද්‍යාත්මක සහ ප්‍රායෝගික කරුණු රැසක් අනාවරණය කර තිබේ.

ඒ මහතා මෙහිදී පවසන්නේ කිසිවෙකුටක් අනතුරක් නොවූ මෙම සිදුවීම පහළ උසාවියෙන්ම හරවා යැවිය හැකි බවයි.

සාකච්ඡාව අතරතුරදී නැඟුණු ප්‍රශ්න සහ ඊට කැප්ටන් එල්මෝ ජයවර්ධන මහතා ලබා දුන් පිළිතුරු ඇතුළත් කරුණු මෙසේය.

ගුවන් යානාවලට අකුණු වදින්න පුලුවන්ද?

ඔව්, ගුවන් යානාවලට අහසේදී අකුණු වැදීමේ හැකියාව පවතින අතර, සාමාන්‍යයෙන් ලෝකය පුරා වසරකට වරක් හෝ දෙවරක් බැගින් ඕනෑම සක්‍රීය වාණිජ ගුවන් යානයකට අකුණු වැදීම සාමාන්‍ය සිදුවීමකි. විශේෂයෙන්ම ගිගුරුම් සහිත වැසි වලාකුළු (Cumulonimbus clouds) හරහා හෝ ඒ අසලින් පියාසර කිරීමේදී මෙම තත්ත්වය ඇති විය හැක.

අකුණක් වැදුණු සැණින් යානය අනතුරට පත් වෙනවාද?

කැප්ටන් එල්මෝ ජයවර්ධන මහතා පෙන්වා දෙන්නේ අකුණක් වැදුණු සැනින් යානය කඩා වැටීමක් හෝ මගීන්ට විදුලි සැර වැදීමක් සිදු නොවන බවයි. ඒ සඳහා නූතන ගුවන් යානා සැලසුම් කර ඇති සුවිශේෂී තාක්ෂණික ක්‍රමවේදයන් හේතු වේ.

මෙහිදී අදහස් දක්වමින් කැප්ටන් එල්මෝ සඳහන් කළේ, අකුණු වැදීමට වඩා එවැනි අයහපත් කාලගුණයකදී ඇති වන දැඩි කැළඹිලි ස්වභාවය (Severe Turbulence) පාලනය කිරීම නියමුවා සතු ප්‍රධාන අභියෝගය බවයි.

එවැනි අවස්ථාවකදී ගුවන් නියමුවා සතු අත්දැකීම්, ක්ෂණික තීරණ ගැනීමේ හැකියාව සහ මානසික ඒකාග්‍රතාවය මගීන් සිය ගණනකගේ ජීවිත ආරක්ෂා කිරීමට සෘජුවම බලපාන බව මෙම සාකච්ඡාවේදී වැඩිදුරටත් අවධාරණය කෙරිණි. නූතන ගුවන් ක්ෂේත්‍රයේ පවතින ඉහළ තාක්ෂණය සහ නියමුවන්ගේ දැඩි පුහුණුව හේතුවෙන් අකුණු වැදීම නිසා සිදුවන අනතුරු වර්තමානයේ අතිශයින්ම දුර්ලභ මට්ටමක පවතින බවත් ඒ මහතා අනාවරණය කරයි.

වීඩියෝව නරඹන්න..