ගෝඨාභයගේ පෙත්සම කරුණු තහවුරු කිරීමට හෙට යළි කැඳවීමට අභියාචනාධිකරණයෙන් නියෝග..

Jun 17, 2026 at 03:04 PM

|

Lanka Leader

පාස්කු ඉරුදින ත්‍රස්ත ප්‍රහාර සිද්ධිය සම්බන්ධයෙන් සිදු කරන විමර්ශනවලට අදාළව තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා හිටපු ජනාධිපති ගෝඨාභය රාජපක්ෂ ඉදිරිපත් කළ පෙත්සමේ කරුණු තහවුරු කිරීම සඳහා හෙට (18) කැඳවන ලෙස අභියාචනාධිකරණය අද (17) නියෝග කළේය.

මෙම පෙත්සම අද (17) අභියාචනාධිකරණයේ සභාපති විනිසුරු රොහාන්ත අබේසූරිය සහ ප්‍රියන්ත ප්‍රනාන්දු යන විනිසුරුවරුන්ගෙන් සමන්විත විනිසුරු මඩුල්ල ඉදිරියේ කැඳවනු ලැබූ අවස්ථාවේදී මෙම නියෝගය නිකුත් කරන ලදී.

මෙම පෙත්සමේ කරුණු තහවුරු කිරීම සදහා හෙට (18) දිනයේ කැඳවීමට මෙහිදී සභාපති විනිසුරුවරයා නියෝග කර සිටියේය.

මෙම නඩුව අද (17) පෙරවරුවේ අධිකරණය හමුවේ කැඳවූ අවස්ථාවේදී සාමාජික විනිසුරු ප්‍රියන්ත ප්‍රනාන්දු ප්‍රකාශ කළේ පුද්ගලික හේතුන් මත තමන් මෙම නඩු විභාගයට සහභාගී නොවන බවයි.

පෙත්සම්කාර හිටපු ජනාධිපති ගෝඨාභය රාජපක්ෂ වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා අධිකරණය හමුවේ කරුණු දක්වමින්, සිය සේවා දායකයා අත්අඩංගුවට ගැනීම වළක්වමින් අතුරු තහනම් නියෝගයක් නිකුත් කරන ලෙස අද (17) පෙරවරුවේ අධිකරණයෙන් ඉල්ලා සිටියේය.

එහිදී වගඋත්තරකරුවන් වෙනුවෙන් පෙනී සිටි නියෝජ්‍ය සොලිසිටර් ජෙනරාල් සුහර්ෂි හේරත් කරුණු දක්වමින් කියා සිටියේ මෙම නඩුකරයට අදාල ලේඛන තමන්ට ලැබුණේ අද (17) උදෑසන බවයි.

ඒ හේතුවෙන් වගඋත්තරකරුවන්ගෙන් තමන්ට කිසිදු උපදෙසක් මේ දක්වා ලැබී නොමැති බවත් ඇය සඳහන් කළාය.

මෙම නඩුවේ වගඋත්තරකරුවන් ලෙස අපරාධ පරීක්‍ෂණ දෙපාර්තමේන්තුවේ අධ්‍යක්‍ෂ ජ්‍යෙෂ්ඨ පොලිස් අධිකාරී ශානී අබේසේකර, නීතිපති ඇතුලු පිරිසක් නම් කර තිබේ.