ඩොලරය අතහැර රුපියල්වලින් ගණුදෙනු කරන්න ඉන්දු - ලංකා අවධානය..

Jun 16, 2026 at 06:13 PM

|

Lanka Leader

ශ්‍රී ලංකාව සහ ඉන්දියාව අතර සිදු කෙරෙන ද්විපාර්ශ්වික වෙළඳ කටයුතුවලදී ඇමෙරිකානු ඩොලරය මත යැපීම අවම කර, දෙරටේ දේශීය මුදල් ඒකක වන රුපියල් භාවිතයෙන් සෘජුවම ගනුදෙනු පියවීම කෙරෙහි අවධානය යොමුව ඇති බව වාර්තා වේ.

මේ පිළිබඳව දීර්ඝ වශයෙන් කරුණු සාකච්ඡා කෙරුණේ කොළඹදී පැවති "රුපියලෙන් රුපියලට ඉන්දු ශ්‍රී ලංකා වාණිජ්‍ය කොරඩෝව ශක්තිමත් කිරීම" යන තේමාවෙන් පැවති විශේෂ සාකච්ඡාවකදීය. මෙම අවස්ථාව සඳහා ශ්‍රී ලංකා මහ බැංකුවේ අධිපති ආචාර්ය නන්දලාල් වීරසිංහ මහතා, ශ්‍රී ලංකාවේ ඉන්දීය මහ කොමසාරිස් සන්තෝෂ් ජා මහතා මෙන්ම ප්‍රමුඛ පෙළේ බැංකු ප්‍රධානීන් සහ ආනයන-අපනයනකරුවන් පිරිසක් ද එක්ව සිටියහ.

මෙහිදී අදහස් දැක්වූ ඉන්දීය මහ කොමසාරිස් සන්තෝෂ් ජා මහතා පෙන්වා දුන්නේ 2025 වසර වන විට දෙරට අතර ද්විපාර්ශ්වික වෙළඳාම ඇමෙරිකානු ඩොලර් බිලියන 5.5 ඉක්මවා ගොස් ඇති බවයි. 

ඉන්දියාව ශ්‍රී ලංකාවේ විශාලතම වෙළඳ හවුල්කරුවා වුවද, තවමත් වෙළඳාමෙන් බහුතරයක් තෙවන පාර්ශවීය මුදල් ඒකකයක් වන ඇමෙරිකානු ඩොලර් හරහා සිදුවීම ගැටලුසහගත බව ඔහු සඳහන් කර තිබේ. 

මේ හේතුවෙන් දෙපාර්ශවයටම අනවශ්‍ය විදේශ විනිමය අවදානමකට මෙන්ම අමතර පරිවර්තන පිරිවැයකට ද මුහුණ දීමට සිදුව ඇතැයි මහ කොමසාරිස්වරයා අවධාරණය කළේය.

ගෝලීය වෙළඳපොළේ පවතින අස්ථාවරත්වය හමුවේ එකම මුදල් ඒකකයක් මත පමණක් යැපීම අවදානම් සහගත බව මෙහිදී පොදුවේ පිළිගැනීමට ලක්විය.

විශේෂයෙන්ම 2021 වසරේදී ශ්‍රී ලංකාව මුහුණ දුන් දරුණු ආර්ථික අර්බුදයේදී ඩොලර් සංචිත සිඳී යාම හේතුවෙන් ඉන්ධන, ඖෂධ සහ ආහාර වැනි අත්‍යාවශ්‍ය ද්‍රව්‍ය ආනයනය කිරීමට දැඩි බාධා එල්ල වූ ආකාරය ද සාකච්ඡාවේදී නැවත සිහිපත් කෙරිණි.