බැසිල්ට එරෙහිව රජයේ සාක්ෂිකරුවෙක් වීමට භාෂ්වර එකඟ වෙලා..

Jun 15, 2026 at 04:53 AM

|

Lanka Leader

හිටපු ජනාධිපති මහින්ද රාජපක්ෂගේ පාලන සමයේ ශ්‍රී ලංකා සංචාරක ප්‍රවර්ධන කාර්යාංශයේ සභාපතිවරයා ලෙස කටයුතු කළ භාෂ්වර ගුණරත්න, හිටපු අමාත්‍ය බැසිල් රාජපක්ෂට එරෙහිව රජයේ සාක්ෂිකරුවකු ලෙස පෙනීසිටීමට එකඟතාව පළකර ඇති බව වාර්තා වේ.

බැසිල් රාජපක්ෂගේ සමීපතම හිතවතකු ලෙස සැලකෙන භාෂ්වර ගුණරත්න, 2014 වසරේදී ශ්‍රී ලංකා සංචාරක ප්‍රවර්ධන කාර්යාංශයට අයත් රුපියල් මිලියන 7.8 ක මුදලක් අවභාවිත කිරීමේ චෝදනාව මත අත්අඩංගුවට පත්ව දැනට රිමාන්ඩ් භාරයේ පසුවේ.

මෙම නඩුව කොළඹ කොටුව මහේස්ත්‍රාත් පසන් අමරසේන ඉදිරියේ කැඳවූ අවස්ථාවේදී, භාෂ්වර ගුණරත්න වෙනුවෙන් පෙනීසිටි ජනාධිපති නීතිඥ රියන්සි අර්සකුලරත්න අධිකරණයට දන්වා සිටියේ, අපරාධ නඩු විධාන සංග්‍රහයේ 127 වගන්තිය යටතේ තම සේවාදායකයා මහේස්ත්‍රාත්වරයා වෙත ප්‍රකාශයක් ලබා දී ඇති බවයි.

ඒ අනුව තම සේවාදායකයා මෙම නඩුවේ රජයේ සාක්ෂිකරුවකු ලෙස නම්කර ඇප මත මුදාහරින ලෙස ඔහු අධිකරණයෙන් ඉල්ලා සිටියේය.

මේ අතර, අපරාධ පරීක්ෂණ දෙපාර්තමේන්තුව අධිකරණයට දැනුම්දුන්නේ, මෙම නඩුවේ සැකකරුවකු ලෙස බැසිල් රාජපක්ෂව නම්කරන බවයි.

ඒ අනුව, දැනට විදේශගතව සිටින බැසිල් රාජපක්ෂව අත්අඩංගුවට ගැනීම සඳහා මහේස්ත්‍රාත් අමරසේන විසින් වරෙන්තු නිකුත් කරනු ලැබීය.

එසේම භාෂ්වර ගුණරත්නව රුපියල් ලක්ෂයක (100,000) මුදල් ඇපයක් සහ රුපියල් මිලියන 10 බැගින් වූ ශරීර ඇප දෙකක් මත මුදාහැරීමට මහේස්ත්‍රාත්වරයා නියෝග කළේය.

නඩුවේ තෙවැනි සැකකරු වන සංචාරක ප්‍රවර්ධන කාර්යාංශයේ හිටපු කළමනාකාර අධ්‍යක්ෂ රූමි ජවුෆර් මහතාව ජුනි 17 වැනිදා දක්වා තවදුරටත් රිමාන්ඩ් භාරයේ තැබීමටද නියෝග කෙරිණි.

බැසිල් රාජපක්ෂ වෙත අන්තර්ජාතික සිතාසි (International Summons) නිකුත් කිරීමට අධිකරණ නියෝගයක් අවශ්‍ය වන්නේ නම්, ඒ සඳහා දිවුරුම් ප්‍රකාශයක් ඉදිරිපත් කරන ලෙස මහේස්ත්‍රාත්වරයා අපරාධ පරීක්ෂණ දෙපාර්තමේන්තුවට වැඩිදුරටත් නියෝග කළේය.

ඌව පළාත් සභා මැතිවරණය වෙනුවෙන් ටී-ෂර්ට් මුද්‍රණය කර ඒවා මැතිවරණ ප්‍රචාරක කටයුතු සඳහා භාවිත කිරීමේ සිද්ධියක් සම්බන්ධයෙන් මෙම නඩුව පවරා ඇත.